Гъэтхэ дзэ дэщыгъор аублагъ, ныбжьыкIэхэр къулыкъум шIэхэу дэкIыщтых.

Ащ емыпхыгъэу, дзэ комиссариатхэм зэзэгъыныгъэ шIыкIэм тетэу къулыкъу зэрагъэ­хьыщтхэм къя­джэх, а лъэны­къомкIэ Iоф ашIэ.

Зэзэгъыныгъэ шIыкIэм имэхьанэ, ащ фэдэ къулыкъум шIуагъэу пылъхэм къатегущыIагъ нахьыжъхэм я Советэу АР-м и ЛIышъхьэ дэжь щыIэм итхьаматэу ГъукIэлI Нурбый.

— Дунаир зэхъокIы, ау лъэ­хъэ­нэ чыжьэми, благъэми, не­пэрэ мафэр тштагъэми, зэмы­хъокIырэр узщыщ лъэпкъыр, уиунагъо, уихэгъэгу гупсэ къэб­гъэ­гъунэнхэр, заор ашъхьарыпхыныр, цIыфхэр мамырэу бгъэ­псэунхэр ары. Сыд фэдэрэ хэгъэгуи зэзэгъыныгъэ шIыкIэм тетэу дзэкIолIхэр къулыкъум щахагъахьэх, яуIэшыгъэ кIуа­чIэхэр нахь агъэлъэшых. Тэ ти­къэралыгъуи а шIыкIэр ыгъэ­федэу зиублагъэр тIэкIу шIагъэ, ащ сэ десэгъаштэ ыкIи тэрэзэу сэлъытэ. Зэзэгъыныгъэм кIэтхэгъэ дзэкIолIхэм пшъэрылъэу афэпшIырэр нахь агъэцэкIэщт, яIэпэIэсэныгъи нахь агъэлъэшыщт. ЕгъэзыгъэкIэ дзэм хэбгъэхьагъэм щыгугъугъуай, мыдрэхэр уипытапIэх, уиухъумакIох.

Непэрэ заохэм уалъыплъэмэ, техникэр зэрэзэхъокIыгъэр спутникхэр, самолетыкIэ­хэр, дронхэр, роботхэр щыIэхэу зэрагъэфедэхэрэр олъэгъу. Непэрэ дзэкIолIхэм ащыщыбэхэр компьютерхэм акIэлъырысхэу роботхэр агъэзаох. Ар зышIэн зылъэкIыхэрэр а Iофым хэшIыкI фызиIэхэр, фе­джагъэхэр ары. Ащ пае зэ­зэгъыныгъэм зыфыкIэтхэщтхэмэ аIэпкъ-­лъэпкъхэр псыхьа­гъэхэ за­къокIэ икъущтэп, акъыл яIэу, еджа­гъэхэу щытынхэ фаеу сэлъытэ.

Тихэгъэгу шIу зылъэгъухэу, ащ къыгъэуцугъэ пшъэрылъхэр ыгъэцэкIэнхэм фэхьазырхэу кIэлакIэхэр зэрэщыIэм сицыхьэ телъ, ахэм заор тпэчыжьэ ашIынэу тащэгугъы, — къы-Iуагъ ГъукIэлI Нурбый.

Шъугу къэдгъэкIыжьын, къэра­лыгъом ыпашъхьэкIэ гъэхъагъэ зышIы зышIоигъохэр зы­гъэгу­мэкIырэ Iофыгъохэм ­яджэуап ра­гъотэшъущт телеграм-каналэу «Адыгея — Служу Родине» зыфиIорэм. Зэзэгъыныгъэ шIыкIэкIэ къулыкъум зыхязыгъатхэ зышIоигъохэр зыщыпсэухэрэм елъытыгъэу дзэ комиссариатым екIуалIэхэмэ, ялъэIу ащафагъэцэкIэщт.