Iофэу агъэцакIэхэрэм къахэхъощт
Илъэситфым телъытэгъэ программэхэм адиштэу гъэстыныпхъэ шхъуантIэр аIэкIэгъэхьэгъэнымкIэ ыкIи газрыкIуапIэхэм ягъэпсынкIэ IофшIэн гъэнэфагъэхэр республикэм щагъэцакIэх.
Гъэстыныпхъэ шхъуантIэр зэращэлIэщт псэуалъэхэр, пIалъэхэр, инвестициехэу къахалъхьащтыр зыфэдизыр, мылъку къэкIуапIэхэр ахэм ащыгъэнэфагъэх. Iахьзэхэлъ обществэу «Газпромымрэ» Адыгэ Республикэмрэ 2021 — 2025-рэ илъэсхэм ателъытэгъэ программэу зыкIэтхэжьыгъэхэр заухэсыгъэр 2020-рэ илъэсыр ары. Газ инфраструктурэм республикэм зыщегъэушъомбгъугъэн фаеу непэ пшъэрылъ къэуцугъ.
Ащ епхыгъэу а гъэстыныпхъэм иIэкIэгъэхьанкIэ ыкIи газрыкIуапIэхэм ягъэпсынкIэ программэу зыхэIэзыхьажьыгъэхэм Iахьзэхэлъ обществэу «Газпромымрэ» Адыгэ Республикэмрэ бэмышIэу кIэтхагъэх. Мыекъопэ, Тэхъутэмыкъое, Джэджэ, Красногвардейскэ, Шэуджэн, Теуцожь районхэм япсэупIэ 19-мэ газыр алъыгъэIэсыгъэныр, индустриальнэ паркэу «Инэмым» пае газрыкIуапIэхэр Тэхъутэмыкъое районым щыгъэпсыгъэнхэр ащ къыщыдэлъытагъэх. ПсэупIэхэу Псэкъупсэ, Прикубанскэм, Хьащтыку газ станциеу адэтхэри агъэкIэжьыщтых. Джэджэ районымкIэ къутырэу Колхознэмрэ Красногвардейскэ районымкIэ къутырэу Богурсуковымрэ газрыкIуапIэхэр ащагъэпсынхэу документыкIэм итхагъ.
— Социальнэ газификациемкIэ программэм игъэцэкIэн тапэкIи лъыдгъэкIотэщт. ЦIыфхэм гъэстыныпхъэ шхъуантIэр нахьышIоу аIэкIэгъэхьэгъэнымкIэ республикэм щызэрахьэрэ амалхэм яшIуагъэкIэ 2025-рэ лъэсым ыкIэм ехъулIэу Адыгеим ипсэупIэхэм япроцент 96,65-мэ ар ящэлIагъэ хъущт, — къыIуагъ Адыгеим и ЛIышъхьэ.