ЛъэсрыкIохэм атехьагъэх
2023-рэ илъэсым мэлылъфэгъум и 5-м сыхьатыр 9.30-м Урысыем хэгъэгу кIоцI IофхэмкIэ и Министерствэ МыекъуапэкIэ иотдел идежурнэ часть макъэ къырагъэIугъ Лениным ыцIэ зыхьырэ урамымрэ Крестьянскэмрэ зыщызэуалIэхэрэм дэжь тхьамыкIагъо къызэрэщыхъугъэмкIэ.
Следственнэ-оперативнэ купымрэ Къэралыгъо автоинспекциемрэ яIофышIэхэм нафэ къызэрафэхъугъэмкIэ, IэкIыб къэралыгъом къыщашIыгъэ автомобилыр зезыфэщтыгъэр Мыекъуапэ щыщ хъулъфыгъэу илъэс 65-рэ зыныбжьыр ары. СэмэгумкIэ ащ къыгъазэзэ, нэфрыгъуазэ зытемыт лъэсгъогур зэпызычыщтыгъэ бзылъфыгъэм техьагъ. Илъэс 63-рэ зыныбжь бзылъфыгъэу шъобжхэр зытещагъэхэр Адыгэ республикэ клиникэ сымэджэщым нагъэсыгъ.
Мы мэфэ дэдэм Урысыем хэгъэгу кIоцI IофхэмкIэ и Министерствэ Джэджэ районымкIэ иотдел Мыекъуапэрэ Карачаевскэрэ зэзыпхырэ гъогуми тхьамыкIагъо зэрэтехъухьагъэмкIэ макъэ къырагъэIугъ. Къытпэгъунэгъу республикэхэм ащыщ горэм щыпсэурэ хъулъфыгъэу илъэс 47-рэ зыныбжьыр, IэкIыб къэралыгъом къыщыдагъэкIыгъэ автомобилыр ыгъэIорышIэзэ, амыгъэнэфэгъэ чIыпIэм гъогур щызэпызычыщтыгъэ лъэсрыкIом техьагъ. Мыекъуапэ щыщ хъулъфы-гъэу илъэс 61-рэ зыныбжьэу сымэджэщым нагъэсыгъэм идунай ыхъожьыгъ.
Къэралыгъо автоинспекцием мы тхьамыкIагъохэр къызыхэкIыгъэхэмкIэ уплъэкIунхэр зэхещэх. Гъогухэм тхьамыкIагъохэр къатемыхъухьанхэм пае хэгъэгу кIоцI IофхэмкIэ Министерствэр водительхэм къяджэ сакъынхэу, скоростым рамыгъэхъунэу, лъэсрыкIохэм зэпырыкIыпIэ закъохэм гъогур ащызэпачынэу.
Адыгэ Республикэм хэгъэгу кIоцI IофхэмкIэ и Министерствэ къэбархэмкIэ ыкIи общественнэ зэпхыныгъэхэмкIэ иотдел