Урысыем и Следственнэ комитет иследственнэ отделэу Мыекъуапэ щы­Iэм зыныбжь имыкъугъэ нэбгыритIум алъэныкъокIэ къызэIуахыгъэ уголовнэ Iофыр зэхифыгъ.

Мыекъопэ районым ипсэупIэу Табачнэм ыкIи Мыекъуапэ ащыпсэурэ кIэлэ Iэтахъохэм тыгъон бзэджэшIагъэхэр зэрахьагъэхэу агъэмысэх.

Следствием зэригъэунэфыгъэмкIэ, мы нэбгыритIур мобильнэ телефонхэр зыщэрэ тучанхэм ятыгъуагъэх. 2023-рэ илъэсым щылэ мазэм чэщым нэбгыритIум язым пчъэр къызэрэзэIуахырэ пкъыгъор къызыфи­гъэфеди, тучаным чIэлъыгъэ телефонхэр, ахэм ягъусэ пкъыгъо зэфэшъхьафхэр, джащ фэдэу кассэм дэлъы­гъэ ахъщэр чIитыгъукIыгъэх. А уахътэм ятIонэрэ Iэтахъор урамым тетэу къэхъурэм лъыплъэщтыгъ. Тучаным зэрарэу рахыгъэр сомэ мин 338-м ехъу.

Зыныбжь имыкъугъэ нэбгыритIум язым нэужми бзэджэшIагъэхэр зэрихьагъэх. 2023-рэ илъэсым ищылэ­мэзэе мазэхэм Мыекъуапэ ыкIи поселкэу Красно­октябрьскэм адэт тучанхэм ятыгъуагъ, зэрарыр сомэ мини 177-м ехъугъ.

КIэлэ Iэтахъохэм яунэхэр къызалъыхъухэм аты­гъугъэм щыщ пкъыгъохэр ыкIи ахъщэм изы Iахь къа­рагъотагъэх.

Джы уголовнэ Iофым хьыкумыр хэплъэщт ыкIи унашъо ышIыщт.

Адыгэ Республикэм хэгъэгу кIоцI IофхэмкIэ и Министерствэ къэбархэмкIэ ыкIи общественнэ зэпхыныгъэхэмкIэ иотдел