Адыгэ РеспубликэмкIэ следственнэ ГъэIорышIапIэм икъутамэу къалэу Мые­къуапэ щыIэм уголовнэ Iоф къа­пи­гъэтэджагъ мы къалэм щыщ кIалэ­хэу илъэс 16 зыныбжьхэм.

Урысые Федерацием и Уголовнэ кодекс ия 228-рэ статья ия 2-рэ Iахь (IуагъэкIын гухэлъ ямыIэу наркотикхэр бэу хэбзэнчъэу зыIыгъхэм) къызэрэдилъытэрэм тетэу Iэтахъохэм ягуцафэх бзэджэшIагъэ зэрахьагъэу. АР-м хэгъэгу кIоцI IофхэмкIэ и Министерствэ наркотикхэм ягъэзекIонкIэ уплъэкIун Iофхэр зэшIозыхырэ и ГъэIорышIапIэ къызэрэщатыгъэмкIэ, уголовнэ Iоф ахэм къафызэIуахыгъ.

2023-рэ илъэсым щылэ мазэм зыныбжь имыкъугъэ кIэлитIумэ къалэу Мыекъуапэ ичIыпIэ горэм наркотикхэр зыкIоцIылъ зэкIоцIыщыхьагъэ горэ къыщыхагъэщыгъ. Ежь нэбгыритIум зэдагъэфедэзэ ашIыным пае ар агъэбылъынэу рахъухьагъ. ПстэумкIи наркотик грамм 18-м ехъу хэбзэухъумэкIо къулыкъухэм яIофышIэхэм ахэм къакъуахыгъ.

Мы лъэхъаным а хъугъэ-шIагъэхэм япхыгъэ лъэныкъохэм ягъэунэфынкIэ зэхэфын Iофтхьабзэхэр макIох.

Адыгэ Республикэм хэгъэгу кIоцI IофхэмкIэ и Министерствэ къэбархэмкIэ ыкIи общественнэ зэпхыныгъэхэмкIэ иотдел