АР-м и ЛIышъхьэу КъумпIыл Мурат Адыгеимрэ Мыекъуапэрэ яепархие ипащэу, архиепис­копэу Тихон АР-м и Прави­тельствэ зычIэт унэм непэ зэIукIэгъу щыдыриIагъ. АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэри мы Iофтхьабзэм хэлэжьагъ.

Республикэм и ЛIышъхьэ архиепископэу Тихони, чыристанхэми ямэфэкI лъапIэу Пас­хэмкIэ къафэгушIуагъ, псау­ныгъэ пытэрэ щыIэкIэ-псэукIэ дэ­гъурэ яIэнэу афэлъэIуагъ.

Мамырныгъэмрэ зэгурыIо­ныгъэмрэ республикэм щы­гъэ­пы­тэгъэнхэмкIэ дин шъхьа­Iэхэм мэхьанэшхо зэряIэр КъумпIыл Мурат къыхигъэщыгъ.

«Дин зэфэмыдэхэр зылэ­жьыхэрэр зэгурыIонхэм лъэшэу тынаIэ тетэгъэты. Общест­веннэ-политикэ Iофхэр зыпкъ итынхэр, мамырныгъэмрэ зэ­гурыIоныгъэмрэ республикэм къыщыухъумэгъэнхэр лъэшэу гъунэ зылъытфырэ лъэныкъохэм ащыщых. Анахь шъхьаIэр — чылысым кIорэ цIыфхэм, унагъохэм фыщытыкIэу афыряIэр ары. Ахэм IэпыIэгъу ягъэгъотыгъэным, дин орга­ни­зациехэр просветительскэ Iоф­шIэным кIэгъэгушIугъэнхэм мэхьанэшхо яI», — къыIуагъ КъумпIыл Мурат.

Архиепископэу Тихон рес­публикэм ипащэ тхьауегъэпсэу риIуагъ ынаIэ къызэратыри­гъэтырэм ыкIи IофышIоу ра­хьыжьэхэрэмкIэ IэпыIэгъу къызэрафэхъурэм афэшI. Джыдэдэм чылыс 20 фэдиз республикэм щагъэпсы е щагъэцэкIэжьы. Проект шъхьаIэхэм зэу ащыщ кафедральнэ Свято-Успенскэ чылысышхо Мыекъуапэ щыгъэ­псыгъэныр.

«О пшъхьэкIи, гупыкI зиIэхэри IэпыIэгъу шъукъызэрэтфэ­хъурэм ишIуагъэкIэ чылысышхом ишIын лъагъэкIуатэ, чылысхэр республикэм зыпкъ щырагъэуцожьых. ЦIыфхэр мэщытхэм-рэ чылысхэмрэ зэрэкIохэрэр гушIуагъоу щыт. Ащ къегъэлъагъо цIыфхэм шIум зызэрэ­фащэирэр, ягушъхьэлэжь байныгъэ зэрэхагъахъорэр», — къы­Iуагъ архиепископэу ­Тихон.

Адыгеим и ЛIышъхьэ респуб­ликэм хэхъоныгъэ езыгъэшIыщт проектхэм тапэкIи къазэра­дыригъэштэщтыр, мамырныгъэм­рэ зэгурыIоныгъэмрэ респуб­ликэм къыщыухъумэгъэнхэмкIэ дин шъхьаIэхэм япащэхэмрэ хэбзэ къулыкъухэмрэ язэдэлэ­жьэныгъэ лъагъэкIотэным мэ­хьанэшхо зэриIэр къыIуагъ.

Бирамым ехъулIэу

Адыгеим и ЛIышъхьэу КъумпIыл Мурат АР-мрэ Пшызэ шъолъыррэ ямуфтиеу Къэрдэнэ Аскэрбый джащ фэдэу непэ зэIукIэгъу дыриIагъ.

Республикэм ипащэ быс­лъымэнхэм яIофхэм язытет, НэкIмазэр зэрэкIорэм, мы лъэ­хъаным ДиндэлэжьапIэм шIушIэ Iофтхьабзэу зэрихьэхэрэм, нэкI зыIыгъхэр хэгъэIэжьыгъэнхэм- кIэ республикэ Iофтхьабзэу зэрахьащтым зызэрэфагъэхьазырырэм къакIэупчIагъ.

«НэкIмазэр икIынкIэ бэп къэнэжьыгъэр. Республикэм ис быслъымэн пстэуми псауныгъэ пытэ, хахъо яIэнэу, щыIэныгъэм фэблэнхэу сафэлъаIо. НэкIмэзэ мазэм цIыфхэм агукIэ заукъэбзы, шэнышIоу ахэлъхэр: хьалэлныгъэр, гукIэгъур, къапэблагъэхэм зэрафэгумэкIыхэрэр нахь къахэщы. НэкI зыIыгъхэм псапэу ашIэхэрэм Тхьэм къаферэгъэгъэзэжь», — къыIуагъ КъумпIыл Мурат.

Республикэмрэ краимрэ ащыпсэурэ быслъымэнхэм ацIэкIэ муфтием республикэм ипащэ тхьауегъэпсэу риIуагъ гущыIэ фабэхэр къазэрари­Iуагъэм ыкIи быслъымэнхэм яIофхэм язытет ренэу ынаIэ зэрэтыригъэтырэм афэшI. Джащ фэдэу Къэрдэнэ Аскэрбый зэрэхигъэунэфыкIыгъэмкIэ, Адыгеим и ЛIышъхьэ IэпыIэгъу къафэхъузэ, нэкI зыIыгъхэр зы­щыхагъэIэжьыщтхэ респуб­ли­кэ Iофтхьабзэу мэлылъфэгъум и 18-м щыIэщтым зыфагъэхьазыры. Джыдэдэм ящыкIэгъэщтхэр къащэфы, мэщытым дэжь щыбылыкъхэр щагъаIэх, мы Iоф­тхьабзэм къыхэлажьэ зышIоигъохэм макъэ арагъэIу. Ащ нэ­мыкIэу ДиндэлэжьапIэм илIыкIохэр зэщыгъэкъокIо кIуа­чIэхэм апэуцужьыгъэным тегъэ­псыхьэ­гъэ республикэ, край Iофтхьэ-бзэ зэфэшъхьафхэм ахэ­лэ­жьа­гъэх, кIэлэцIыкIухэм атегъэпсы­хьэгъэ зэнэкъокъухэр ыкIи нэ­мыкI Iофтхьабзэхэр зэхащагъэх.

ДиндэлэжьапIэмрэ бизнесменхэмрэ къадеIэхэзэ, респуб­ликэм имэщытыбэмэ нэкI зы­Iыгъхэр пчыхьэ къэс зэрэщыхагъэIэжьыщтыгъэхэр, нэжъ­-Iужъхэм, гъот макIэ зиIэхэм, сабыибэ зэрыс унагъохэм IэпыIэгъу зэрафэхъущтыгъэхэр шъхьафэу зэIукIэгъум щыха­гъэунэфыкIыгъ.

Шъхьэлэхъо Аскэр къызэри­IуагъэмкIэ, Сирием къикIыжьхи бэмышIэу Адыгеим къэзыгъэзэжьыгъэ тилъэпкъэгъухэри хагъэIэжьыгъэх. Джащ фэдэ лъэхъаным ахэр адыгэ къуа­джэхэм адэс нэбгырабэмэ нэIуасэ ахэр афэхъугъэх.

Чыристанхэмрэ быслъымэнхэмрэ янэкIмазэ мыгъэ бэкIэ зэрэзэшъхьащимыдзыгъэм мэхьанэшхо зэриIэр КъумпIыл Мурат къыхигъэщыгъ.

«Республикэм исхэмрэ ихьа­кIэхэмрэ Пасхэмрэ Бирамымрэ зыхагъэунэфыкIыщтхэм азыфагу мэфэ заул ныIэп къыдэ­фэщтыр. Быслъымэнхэми чыристанхэми лъытэныгъэу, зэгъу­нэгъушIу зэфыщытыкIэу зэфыряIэр гъэпытэгъэным мы мэфэкIхэр зэрэфэIорышIэщтхэм сицыхьэ телъ», — къыIуагъ КъумпIыл Мурат.

Адыгеимрэ Пшызэ шъолъыррэ арыс быслъымэнхэм дин, лъэпкъ зэгурыIоныгъэм игъэпытэн яIахьэу хашIыхьэрэм тапэкIи зыкъегъэIэтыгъэным мэхьанэшхо зэриIэр Адыгеим и ЛIышъхьэ зэIукIэгъум икIэух къыщыхигъэшыгъ.

АР-м и ЛIышъхьэ ипресс-къулыкъу Сурэтхэр: А. Гусев.