Адыгеим и ЛIышъхьэу КъумпIыл Мурат хэлажьэзэ, Росгвардием и ГъэIорышIапIэу Адыгэ Рес­публикэм щыIэм идзэкъулыкъушIэхэу ыкIи иIофышIэхэу пшъэрылъхэм ягъэцэкIэнкIэ анахь къахэщыгъэхэм къэралыгъо тынхэу афагъэшъошагъэхэр республикэм и Правительствэ зычIэт унэм щаратыжьыгъэх.

Мы Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м и Къэралыгъо Совет — Хасэм и Тхьаматэ игуадзэу Цэй Эдуард, Росгвардием Адыгэ РеспубликэмкIэ и ГъэIоры­шIапIэ ипащэу Олег Якушевыр.

Iофтхьабзэм хэлажьэхэрэм шIуфэс къарихызэ республикэм и ЛIышъхьэ къыхигъэщыгъ Iэпэ­Iэсэныгъэ ин ахэлъэу ыкIи гуе­тыныгъэ фыряIэу зиIофшIэн зы­гъэцэкIэрэ цIыфхэу къэра­лыгъо тынхэр къызыфагъэшъошагъэхэм зэрафэразэр.

Росгвардием щылажьэхэрэм хэушъхьафыкIыгъэ дзэ операци­ем непэ яIахь хашIыхьэ, Урысыем и Президентэу Владимир Путиным къыгъэуцугъэ пшъэрылъхэр агъэцакIэх. Ахэм ащыщыбэхэм къэралыгъо тынхэр къафагъэшъошагъэх. Ти­кIалэхэм зэрахьэгъэ лIыхъужъныгъэмрэ псэемыблэжьныгъэм­рэ ренэу тыгу илъыщтых. Непэ Росгвардием ыпашъхьэ пшъэ­рылъыбэ ит. Сицыхьэ телъ зэ­рищыкIагъэм тетэу, анахь лъэгэпIэ иным диштэу ахэр шъо зэрэжъугъэцэкIэщтхэм», — къы­Iуагъ КъумпIыл Мурат.

Афагъэшъошэгъэ тын лъапIэхэм ащыщых орденэу «Хэгъэгум ыпашъхьэ гъэхъагъэу щыриIэхэм апае» зыфиIорэм имедалэу а I-рэ шъуашэр зиIэр, медалэу «За отвагу», «Жуковым ыцIэкIэ щыт медалыр», джащ фэдэу «Общественнэ порядкэм икъэухъумэнкIэ гъэ­хъагъэу ышIыгъэхэм афэшI» зы­фиIорэ медалыр.

Республикэм и ЛIышъхьэ дзэкъулыкъушIэхэм янэ-ятэхэм ыкIи ахэм ягупсэхэм щэIэгъэшхо зэрахэлъым пае инэу зэрафэразэр къыхигъэщыгъ. Хабзэм икъулыкъухэм афэлъэ­кIыщтыр зэкIэ ашIэ ахэм яунагъохэр зыми фэмыныкъонхэм ыкIи IэпыIэгъоу ящыкIагъэр игъом аIэкIэхьаным пае.

Росгвардием Адыгэ Рес­публикэмкIэ и ГъэIорышIапIэ итарихъ 2016-рэ илъэсым чъэпыогъум и 1-м къыщежьэ, ащыгъум республикэм чIыпIэ ведомствэ щызэхащэгъагъ. Нэ­ужым Темыр Кавказым ишъо­лъырхэм къулыкъу пшъэрылъхэр ащыгъэцэкIэгъэнхэм чанэу хэлэжьагъэх, федеральнэ лъэгапIэм диштэрэ Iофтхьабзэхэр зэшIуахыгъэх.

Непэ Росгвардием иIофы­шIэхэр хабзэр мыукъогъэным, хэбзэухъумэкIо къулыкъухэм IэпыIэгъу ятыгъэным хэлажьэх, псэуалъэхэр къаплъыхьэх, цIыфхэр зыщыпсэухэрэ ыкIи инфраструктурнэ псэолъэ зэ­фэшъхьафхэр къаухъумэх, Iашэм игъэфедэн тэрэзэу анаIэ тырагъэтыным, джащ фэдэу унэе организациехэу къэгъэ­гъунэн Iофхэм афэгъэзагъэхэм яIофшIэн зэрэкIорэм лъэплъэх. Мы ГъэIорышIапIэм идзэкъулыкъушIэхэмрэ иIофышIэхэмрэ хэушъхьафыкIыгъэ дзэ операциеми хэлажьэх.

ГъэIорышIапIэм ипащэхэм къызэрэхагъэщыгъэмкIэ, об­щественнэ порядкэм икъэу-хъу­мэнкIэ ыкIи щынэгъончъэу цIыф­хэр псэунхэмкIэ пшъэрылъ 330-м ехъу агъэцэкIагъ, хэбзэу­къоныгъэ 90-рэ фэдиз къыхагъэщыгъ. Ядзэ къулыкъу пшъэ­рылъ агъэцакIэзэ лIыхъужъныгъэрэ блэнагъэрэ зэрэзэрахьагъэм пае ащ иIофышIэ ыкIи идзэкъулыкъушIэ нэбгыри 100-м ехъумэ тынхэр афагъэшъошагъэх.

Къэралыгъо тынхэр заратыжьхэ нэужым республикэм и ЛIышъхьэ мы ГъэIорышIапIэм щылажьэхэрэм гущыIэгъу афэхъугъ, хэбзэгъэуцугъэу щы­Iэр къэухъумэгъэнымкIэ ахэм Iофэу агъэцакIэрэм мэхьанэшхо зэриIэр ащ къыхигъэщыгъ.

ГъэIорышIапIэм ипащэхэмрэ иIофышIэхэмрэ Адыгеим и ЛIы­шъхьэ ахэм яфэныкъоныгъэхэм ренэу ынаIэ зэратыригъэтырэм, яунагъохэм социальнэ IэпыIэгъу зэраригъэгъотырэм апае зэрэфэразэхэр къаIуагъ.

АР-м и ЛIышъхьэ ипресс-къулыкъу ­­