ФедерациемкIэ Советым мыщ фэгъэхьыгъэ Iофтхьабзэ щыкIуагъ. Ар зэрищагъ ащ и Тхьаматэу Валентина Матвиенкэм.

ХэбзэшIу зэрэхъугъэу мыщ фэдэ зэIукIэгъухэр ФедерациемкIэ Советым щэкIох. Ахэр гъэшIэгъонэу, шIуагъэ къытэу зэхэщэ­гъэнхэм ренэу тынаIэ тет. ЗэкIэми пшъэрылъ шъхьа­Iэу тиIэр тикъэралыгъо хэхъоныгъэ ышIыныр ыкIи тицIыфхэм ящыIэкIэ-псэу­кIэ нахьышIу шIыгъэныр ары, къыIуагъ Валентина Матвиенкэм.

ФедерациемкIэ Со­ветым и Тхьаматэ зэрэхи­гъэунэ­фыкIыгъэмкIэ, мы аужырэ илъэсхэм Палатэм имэхьа­нэ лъэшэу зыкъыIэтыгъ. Ащ Iоф зишIэрэм щегъэ­жьагъэу гухэлъ, про­ект пчъагъэ щыIэныгъэм щыпхырыщыгъэ хъугъэ. Ана­хьэу зигугъу къэпшIын плъэкIыщтыр ныбжьыкIэ политикэм фэгъэхьыгъэ хэбзэгъэуцугъэр зэраштагъэр ары. Джащ фэдэу сэкъатныгъэ зиIэ кIэлэ­цIыкIухэм аратырэ пен­сие­хэм социальнэ тегъэ­хъон­хэр афэшIыгъэнхэр зэрэгъэпсыгъэщтым Палатэм хэт ныбжьыкIэхэр тегущы­Iагъэх, ащкIэ предложение гъэнэфагъэхэр къахьыгъэх.

Мы структурэм тапэкIэ Iоф зэришIэщым, анахьэу ынаIэ зытыригъэтыщт лъэ­ныкъохэм къэзэрэугъои­гъэхэр атегущыIагъэх. Ва­лентина Матвиенкэм къызэриIуагъэмкIэ, Палатэм хэт ныбжьыкIэхэм ащыщхэр ФедерациемкIэ Советым икомиссиехэм ахагъэхьанхэ фае.

Чанэу Iоф зышIэрэ ыкIи къэралыгъом фэгумэкIырэ, ащ шIуагъэ къыфэзыхьын гухэлъ зиIэ ныбжьыкIэхэр арых Палатэм хэтхэр. Не­пэрэ мафэм ехъулIэу мы­хэм IофшIэнышхо агъэца­кIэ, яшъолъырхэм хэхъоныгъэ ашIыным яIахьышIу халъхьэ. Палатэр зыщыIэм щегъэжьагъэу ащ хэтхэм мэхьанэшхо зиIэ законопроектхэм гъэтэрэзыжьынхэр афашIыгъэх. КъэбарлъыгъэIэс-медийнэ лъэныкъомкIэ пшъэдэкIыжь зы­хьыщт IофшIэкIо куп зэхэщэгъэнымкIэ зэхэсыгъом предложение къы­щыс­хьыгъ, ащ къэзэрэугъои­гъэхэм дырагъэштагъ, къы­Iотагъ Бэрзэдж Асиет.