Адыгеим и ЛIышъхьэу КъумпIыл Мурат Херсон хэкум и Геническэ район щыIагъ. Ащ игъусагъэх АР-м псэолъэшIынымкIэ, транспортымкIэ, унэ-коммунальнэ ыкIи гъогу хъыз­мэ­тымкIэ и Министерствэ, республикэм ипсэолъэшI организациехэм ялIыкIохэр. Адыгеим ыцIэкIэ координаторэу Хъоткъо Хъызыр ахэм къапэгъокIыгъ.

КъумпIыл Мурат агъэцэкIэ­жьыгъэ социальнэ псэуалъэхэм язытет зэригъэлъэгъугъ, районым тапэкIи хэхъоныгъэ егъэшIыгъэнымкIэ зэшIохыгъэн фэе Iофхэр къыгъэнэфагъэх.

Адыгэ Республикэм и ЛIышъхьэу КъумпIыл Мурат Херсон хэкум игубернаторэу Владимир Сальдорэ, джащ фэдэу Херсон хэкум и Правительствэ итхьаматэу Андрей Алексеенкэмрэ заIокIэм а Iофыгъохэр ары зытегущыIагъэхэр. Адыгеим и ЛIышъхьэрэ республикэм щы­псэухэрэмрэ IэпыIэгъу къызэрафэхъухэрэм пае зэрафэра­зэхэр ахэм къаIуагъ. КъумпIыл Мурат къызэрэхигъэщыгъэмкIэ, хэгъэгум ишъолъыркIэ тапэкIи хэхъоныгъэ ышIыным пае республикэм фэлъэкIыщт IэпыIэгъур ригъэгъотыщт.

«Урысые Федерацием и Президентэу Владимир Путиным Херсон хэкум IэпыIэгъу еты­гъэным пае къыгъэуцугъэ пшъэ­рылъхэр зэшIохыгъэ хъунхэмкIэ тфэлъэкIыщтыр зэкIэ тшIэщт. ТынаIэ зытетынэу къытфэгъэзэгъэ чIыпIэр зыпкъ игъэуцо­жьыгъэнымкIэ ыкIи тапэкIи хэхъоныгъэ ышIынымкIэ ищыкIагъэр зэкIэ IэкIэдгъэхьащт.

А чIыпIэм щыпсэухэрэм тынаIэ зэратедгъэтырэмрэ Iэпы­Iэгъоу яттырэмрэ зэхашIэным пае лъэ­ныкъуабэхэмкIэ Iоф­тхьабзэхэр зэрэзэшIотхыхэрэр лъыдгъэкIотэщт», — къыIуагъ АР-м и ЛIышъхьэ.

Адыгеим ихэбзэ къулыкъухэм яIэпыIэгъу хэлъэу Геническэ общественнэ чIыпIэхэр щызэтырагъэпсыхьэх, цIыфхэм япсауныгъэ зыщагъэпытэщт, пшъэрылъыбэ зэшIозыхыщт гупчэхэр щагъэпсыщтых, гурыт еджапIэу N 1-р игъэкIотыгъэу агъэцэкIэжьыщт.

Подряднэ организациехэм ялIыкIохэр игъусэхэу АР-м и ЛIышъхьэ псэуалъэхэр ыкIи псэолъэшIын IофшIэнхэр зыщыкIохэрэ чIыпIэхэр зэригъэлъэгъугъэх. IофшIэнэу къапыщы­лъыр зыфэдизым тегущыIагъэх, ахэм ягъэцэкIэнкIэ пшъэрылъ заули ЛIышъхьэм афишIыгъ.

КъумпIыл Мурат къызэрэхигъэщыгъэмкIэ, Адыгеим ипсэо­лъэшI организациехэм мы ма­зэм ыкIэм ехъулIэу Геническэ дэт социальнэ псэуалъэхэм яшIынрэ ягъэцэкIэжьынрэ фе­жьэщтых. НэмыкI Iофыгъоу зытегущыIагъэхэм ащыщых ин­фраструктурэр зыпкъ игъэуцо­жьыгъэныр, санитарием ишапхъэхэм къапкъырыкIырэ Iофыгъохэр зэшIохыгъэнхэр, нэбгырэ пэпчъ IэпыIэгъу гъэнэфагъэ етыгъэныр.

АР-м и ЛIышъхьэ ипресс-къулыкъу