КIэтхапкIэм процент 30 къыщыкIагъ
Мэлылъфэгъум и 10-м къыщегъэжьагъэу и 20-м нэс Урысыем и Почтэ икъутамэхэми, сайтми процент 30-кIэ нахь пыутэу гъэзетхэмрэ журналхэмрэ шъуащыкIэтхэн шъулъэкIыщт.
Компаниеми, тедзэгъухэр къыдэзыгъэкIыхэрэми гъэзет, журнал 2100-м ехъумэ ауасэ нахь къырагъэIыхыщт. Общественнэ-политическэ гъэзетхэри журналхэри ахэм ахэхьэх. Урысыем и Почтэ мобильнэ гуадзэу иIэм, почтэм икъутамэхэм ахэм уащыкIэтхэн плъэкIыщт, почтальонхэми а фэIо-фашIэр агъэцакIэ. Онлайн шIыкIэм тетэу кIатхэхэрэм амал яI къыратхыкIыхэрэм ацIэкIэ е кIэгъэтхэн индексэу яIэмкIэ, темэмкIэ, хьарыфылъэмкIэ, ежьхэм нахь ашIогъэшIэгъонымкIэ къыхахынхэу, ащ зэкIэмкIи такъикъ заул ныIэп тырагъэкIодэщтыр.
Шъо шъушъхьэ нэмыкIэу, Урысыем ичIыпIэ зэфэшъхьафхэм ащыпсэурэ шъуигупсэхэмрэ шъуиIахьылхэмрэ апаий гъэзетхэмрэ журналхэмрэ къишъутхыкIышъущтых. Джащ фэдэу Урысыем и Почтэ кIэщакIо зыфэхъугъэ шIушIэ Iофтхьабзэу «ШIум ичъыг» зыфиIорэм тетэу кIэлэцIыкIу ибэхэр зычIэс унэм, еджэпIэ-интернатым, нэжъ-Iужъхэр зыщаIыгъырэ унэм е къоджэ тхылъеджапIэм шъуафыкIэтхэн шъулъэкIыщт. Ащ пае учреждениеу къыхэшъухырэм сайтымкIэ е почтэмкIэ гъэзетыпкIэм ыуасэ фэшъутын фае. Мы акциер Урысыем и Почтэ 2015-рэ илъэсым къыщегъэжьагъэу зэхещэ.
Шъугу къэтэгъэкIыжьы федеральнэ почтэ зэпхыныгъэм Адыгэ РеспубликэмкIэ и ГъэIорышIапIэ почти 137-рэ къызэрепхыгъэр, ахэм ащыщэу 110-р къуаджэхэм зэрадэтыр. ГъэIорышIапIэм IофышIэ 912-рэ Iут, ахэм ащыщэу нэбгырэ 398-р письмэзехьэх. Километрэ мини 8 хъурэ автомобиль гъогу 38-кIэ журналхэмрэ гъэзетхэмрэ аIэкIагъахьэх. Ащ пае автомобиль 45-рэ къызфагъэфедэ. ТикъэбарыкIэмэ ренэу шъуащыгъозэнэу шъуфаемэ шъукIатх Почтэм ителеграм-канал: https://t.me/napochte
ГущыIэм пае, мэлылъфэгъум и 20-м нэс 2023-рэ илъэсым иятIонэрэ мэзих телъытагъэу республикэ гъэзетэу «Адыгэ макъэр» нахь пыутэу къишъутхыкIын шъулъэкIыщт.
Урысыем и Почтэ къызэIуихырэ фэгъэкIотэн зыхэлъ уахътэр къызфэжъугъэфедэмэ, мэзихым къышъуфахьыщт гъэзетым ыосэщтыр сомэ 953,58-рэ (индексэу П 4326-рэ). Ар соми 165-кIэ нахь макIэу къышъуфикIыщт.
Уахътэр блэшъумыгъэкI, шъуифедэ зыIэкIэшъумыгъэкI, шъукIатх лъэпкъ гъэзет закъом!