Космонавтикэм и Мафэ тефэу тичIыпIэгъоу, Советскэ Союзым и ЛIыхъужъэу, летчик-космонавтэу Анатолий Березовоим ишIэжь хэмыкIокIэжьынэу Адыгеим щашIыгъ. Мэ­лылъфэгъум и 11-м ащ ыныбжь илъэс 81-рэ хъущтгъагъэ.

ПсэупIэу Инэм дэт еджапIэу N 2-м цIыф шIагъоу, космонавт цIэрыIоу ­«Эльбрус 1-кIэ» заджэщтыгъэхэ Анатолий Николай ыкъом ибюст къыщызэ­Iуахыгъ. Мы еджапIэр къэзыухыгъэ цIыф шIагъом ыцIэ илъэсыбэ хъугъэу ащ ехьы. ЕджапIэм имузеи, культурэм и Унэ къыщызэIуахыгъэ музеими ащ иунэе пкъыгъохэр, исурэтхэр, письмэхэу ыкIи телеграммэхэу орбитэм къыщитIупщыгъагъэхэр ачIэлъых.

Енэгуягъо зыныбжь нахь хэкIотэгъэ цIыфхэм агу къэкIыжькIэ 1982-рэ илъэ­сым къэбарлъыгъэIэс амалхэм къы­зэрэхаутыгъэхэр космосым апэрэ советскэ экспедициеу цIыфыр зэрысыр — «Союз Т-5-р» научнэ станциеу «Салют Т-7-м» ылъэныкъокIэ зэрэбыбыгъагъэр. Командирэу Анатолий Березовоим игъусагъ бортинженерэу Ва­лентин Лебедевыр, ащыгъум чэщ-зымэфэ 211-рэ ахэм орбитэм щагъэкIуагъ. А лъэхъанымкIэ рекордэу ар щытыгъ. Гъэхъагъэ хэлъэу программэр зэригъэ­цэкIагъэм пае Анатолий Березовоим «Советскэ Союзым и ЛIыхъужъ» зыфиIорэ медалыр къыфагъэшъошэгъагъ.

Лъэшэу игуапэу Анатолий Березовоир Адыгеим къакIощтыгъ, ичIыпIэгъухэм, кIэлэеджакIохэм зэIукIэгъухэр адишIыщтыгъэх, ренэу нэгуихыгъэу, цIыфышIоу щытыгъ. ЕджапIэу къыухыгъэм Анатолий Березовоим ыцIэ епхыгъэ хэбзэ шIэгъуабэ чIэлъ хъугъэ.

«Космонавтикэм зищыIэныгъэ езыпхы зышIоигъо шъэожъые ыкIи пшъэшъэ­жъыябэхэмкIэ тичIыпIэгъу цIэрыIо щы­сэшIу зэрэхъущтым сицыхьэ телъ.

Джыри сигуапэу игугъу къэсшIынэу сыфай Адыгеим къыщыхъугъэ Арутюн Кивирян. Ащ Анатолий Березовоим фэдэу илъэсыбэкIэ узэкIэIэбэжьмэ космонавт сэнэхьатыр къыхихыгъ, ащкIэ ухьазырыныгъэ гъэнэфагъэ иIагъ. Сы­фэлъаIо ащ игухэлъхэр зэкIэ гъэхъагъэ хэлъэу щыIэныгъэм къыщыдэхъунхэу!», — къыхигъэщыгъ Адыгеим и ЛIышъхьэу КъумпIыл Мурат.