Адыгеим и ЛIышъхьэ ишIухьафтын студентхэм япроект къыфагъэшъошагъ
Iофтхьабзэу «НэмыкI Мыекъуап» зыфиIорэр Адыгэ къэралыгъо университетым и Научнэ тхылъеджапIэ щыкIуагъ. Ащ хэлэжьагъэхэм зекIоным Мыекъуапэ зыщезыгъэушъомбгъущт проектхэр къагъэхьазырыгъэх.
Нэбгырэ тфырытф зыхэт купи 9 шIухьафтын шъхьаIэм фэбэнагъ. МыIэрысэхэм яфестиваль изэхэщэн, Мыекъуапэ игастрономическэ картэ изэхэгъэуцон, лъэпкъ паркым игъэпсын, Урысые спорт мэфэкIэу «Нарт джэгукIэхэр» зыфиIорэм афэгъэхьыгъэ проектхэр мыщ къащыхалъхьагъэх.
АР-м и ЛIышъхьэ ишIухьафтынэу сомэ мин 50 хъурэр зыхьыгъэр «Нартым къышъуфиIотэщт» зыфиIорэ проектыр къэзыгъэхьазырыгъэ купыр ары. Мыекъуапэ илъэсрыкIо гъогухэм якартэхэр зэрыт пхъэмбгъухэр зэрэщымыIэхэр ащ хэтхэм къаIуагъ. Проектыр къыхэзыхыгъэхэм зэралъытэрэмкIэ, гъусэ ямыIэу зекIохэр къалэм щызекIонхэр ащ къегъэхьылъэ.
— Мы Iофыгъор зэшIохыгъэным фэшI къалэм илъэгъупхъэ чIыпIэхэм ястенд-картэ зэхагъэуцонэу, къалэм ежь-ежьырэу щызекIонхэм пае гъогууанэхэм ясхемэ агъэхьазырынэу игъо афалъэгъугъ, — къытыгъ АКъУ-м ипресс-къулыкъу.
МыIэрысэхэм яфестиваль изэхэщэн фэгъэхьыгъэ проектым Мыекъуапэ культурэмкIэ и ГъэIорышIапIэ осэшхо къыфишIыгъ, ар пхыращынэу рахъухьагъ.
Мыекъуапэ имэр ыцIэкIэ агъэнэфэгъэ шIухьафтыныр лъэпкъ паркэу «За жизнь» зыфиIорэ проектыр къэзыгъэхьазырыгъэ купэу «Яблочный треш» къыфагъэшъошагъ. Проектэу «Временные реликты города Майкопа» зыфиIорэм пае АКъУ-м иприз Адыгэ къэралыгъо университетым и Мыекъопэ къэралыгъо гуманитарнэ техническэ колледж истудентхэм афагъэшъошагъ. Научнэ тхылъеджапIэм ишIухьафтын зэратыгъэр АКъУ-м истудентхэр ары. МыIэрысэхэм яфестиваль Мыекъуапэ зэрэщызэхащэщтым фэгъэхьыгъэ проектыр ахэм къагъэхьазырыгъ.
Мыекъуапэ игастрономическэ картэ фэгъэхьыгъэ проектым пае купэу «Точка невозврата» зыфиIорэм призыр къыхьыгъ. Ахэм шхапIэу «Мэздахэм» ыпкIэ хэмылъэу пчыхьэшъхьашхэ щарагъэшIыщт. Урысые унэгъо спорт мэфэкIэу «Нарт джэгукIэхэр» зыфиIорэ проектым пае сатыушIыпIэу «Титан» ишIухьафтын купэу «Дети Вассермана» зыфиIорэм фагъэшъошагъ.
Проектэу «Адыгея — территория здоровья» зыфиIорэм къыдыхэлъытэгъэ Iофтхьабзэр зэхэзыщагъэр Адыгэ къэралыгъо университетыр ары.