Гъэзетэу «Адыгэ макъ». ЦIэу иIэм изакъоми, уегъэгушхо, тамэ къыуеты, укъеIэты; шэн-хэбзэ дахэхэм уафепIу, уафещэ.

«Адыгэ макъэм» уеджэ зы­хъукIэ, республикэм ичIыпIэ зэфэшъхьафхэм ащашIэрэр, ащыхъурэр уапашъхьэ къырегъэуцо. Хэгъэгу зэошхом апсэ емыблэжьхэу хэлэжьагъэхэм афэгъэхьыгъэ статьяхэм тари­хъыр нахь куоу уагъашIэ, Адыгэ Республикэм и ЛIышъхьэу КъумпIыл Мурат пшъэрылъэу къыгъэуцухэрэм, къэралыгъо къулыкъу пстэуми зэпхыныгъэ яIэу зэрэзэдэлажьэхэрэм, Адыгеим хэхъоныгъэ ышIыным ахэр зэрэфэIорышIэхэрэм, къа­дэхъоу нэрылъэгъу гъэзетым къытфишIыхэрэм уагъэгушхо. Мыхэм афэгъэхьыгъэ тхыгъэхэр зэрыт гъэзетхэм тиунагъокIэ тибиблиотекэ чIыпIэ щаубыты.

Сэри «Адыгэ макъэм» сы­къат­хэу къыхэкIыгъ. Ахэр къыхаутыхэу, нэмыкIхэми къатхыхэрэм сызяджэкIэ, сижабзэ нахь бай зэрэхъурэр зэхэсэшIэ. ГухэкIми, тиадыгэ унагъохэм къарыхъухьэрэ сабыйхэм яна­хьыбэм адыгабзэр икъу фэдизэу ашIэрэп, рыгущыIэхэрэп. Адыгабзэр сабыйхэм ягъэшIэгъэным пае апэ лъэIу зыфэтшIын фаер ны-тыхэр ары.

Уадыгэмэ укъызэрашIэщтыр адыгабзэр пшIэу, лъэпкъым ишэн-хабзэхэр бгъэцакIэхэ зыхъукIэ ары. Бзэ лые щыIэп. ЦIыф лъэпкъ зэфэшъхьафхэр зэхахьэх, зэIокIэх, дэгъуба узыIукIэгъэ цIыфым ыбзэ пшIэу удэгущыIэмэ.

АдыгабзэкIэ тэгущыIэ, теджэ, тэтхэ, тауж къикIырэ ныбжьыкIэхэм яныдэлъфыбзэ ашIэным тыфэлажьэ, ау къыхэкIы уахътэ нэмыкI бзэкIэ тхыгъэр адыгабзэкIэ тэрэзэу зэбгъэкIуныр мыIэшIэхэу. БэмышIэу ащ фэдэ къиныгъо сэри сырихьылIагъ. Джащыгъум «Адыгэ макъэм» щылажьэу Тхьаркъохъо Сафыет телефонымкIэ сыфытеуагъ. СилъэIу псынкIэу къысфигъэцэкIагъ, тхьаегъэпсэу.

Мары гъэтхапэм и 7-м, 2023-рэ илъэсым къыдэкIыгъэ «Адыгэ макъэр» сапашъхьэ илъ. УеплъынкIи, уеджэнкIи зэгъэфагъэу щыт. Гъэзетым иIофы­шIэхэр, нэбгырэ пэпчъ, зыфэгъэзэгъэ IофшIэныр, ахэр зэрагъэцакIэхэрэр зэгъэфагъэу къыщытфеIуатэ, сурэт дэхаби иолъагъо. НэкIубгъохэр дахэу ыкIи дэгъоу зэрэгъэпсыгъэхэм гу лъыуегъатэ ащ фэдэу яIоф­шIэни зэрагъэцакIэрэм.

Сыд фэдэрэ IофшIэни къин Iахь пылъ. Тхэным, егъэджэным афэгъэхьыгъэ IофшIэныр зэрэмыпсынкIэр сэ икъу фэдизэу къызгурэIо. «Адыгэ макъэм» къыкIугъэ гъогур къэзыIотэрэ тхылъэу «Лъэпкъым ымакъ» зыфиIоу ЛIэхъусэжъ Хьаджэрэт­бый ыгъэхьазырыгъэу 2008-рэ илъэсым гъэтхапэм и 8-м «Адыгэ макъэм» иапэрэ номер къызыдэкIыгъэр илъэс 85-рэ зэхъум къыхаутыгъэу Адыгэкъа­лэрэ Теуцожь районымрэкIэ гъэзетым исобкорыгъэу Нэхэе Рэмэзанэ къысфигъэшъошагъэр лъэшэу сэгъэлъапIэ.

Гъэтхапэм и 7-м къыдэкIыгъэ «Адыгэ макъэм» итэлъагъо Адыгэ телевидениер зызэхащагъэр илъэс 30 зэрэхъугъэр. Статьяу КIарэ Фатимэ къытхыгъэм щыгъуазэ тешIы ЖакIэмыкъо Вячеслав зипэщэ Адыгэ телевидением щылажьэхэрэм яIофшIэн щытхъу хэлъэу зэрагъэцакIэрэм, хэхъоныгъэхэр ашIызэ апэкIэ зэрэлъыкIуа­тэхэрэм.

«Адыгэ макъэр» къызыдэкIырэр илъэси 100 зэрэхъугъэм, Адыгэ телевидениер зызэхащагъэр илъэс 30 зэрэхъугъэм афэшI мыхэм ащылажьэхэрэм ямэфэкI мафэхэмкIэ сафэгушIо, сафэлъаIо псауныгъэ пытэ яIэнэу, яIофшIэн непэрэ ма­фэхэм зэрагъэцакIэрэм фэдэу тапэкIи щытхъу хэлъэу агъэцэкIэнэу, ясабыйхэм, ягупсэхэм яхъяр бэрэ алъэгъунэу, щыIэкIэшIу яIэнэу.

КIыкI Вячеслав. Егъэджэн-пIуныгъэм иветеран. Нэшъукъуай.