Адыгеим и ЛIышъхьэу Къум­пIыл Му­рат Урысыем и Социальнэ фонд Адыгэ Респуб­ликэмкIэ и Къутамэ ипащэу МэщлIэкъо Хьамидэ ригъэблэгъагъ.

Илъэсэу икIыгъэм Къутамэм Iофэу ышIагъэм икIэуххэм атегущыIагъэх, мы илъэсым ащ зэ­шIуихын фаехэм, джащ фэдэу республикэм ихэбзэ къу­лыкъухэм зэрадэлэжьэщтхэм, Адыгеим щыпсэухэрэм ахъщэ тын лъэпкъ зэфэшъхьафхэр зэ­раIэкIагъэхьащтхэм япхыгъэ Iофыгъохэм анэсыгъэх.

Адыгэ Республикэм и ЛIышъхьэ анахьэу ынаIэ зытыригъэтыгъэр Урысые Федерацием и Президентэу Владимир Путиным Федеральнэ ЗэIукIэм фигъэхьыгъэ Тхылъым зигугъу къыщишIыгъэ пшъэрылъхэр гъэцэкIэгъэнхэм епхыгъэ Iофыгъохэр ары.

«ЦIыфхэм социальнэ IэпыIэгъу ятыгъэнымкIэ Iофтхьабзэ­хэр зэкIэ игъом ыкIи икъоу республикэм щызэшIохыгъэнхэм мэхьанэшхо иI. Хэгъэгум и Президент унагъохэм, ныхэм ыкIи кIэлэцIыкIухэм IэпыIэгъу ятыгъэнымкIэ, демографием хэхъоныгъэ фэшIыгъэнымкIэ пшъэрылъэу къыгъэуцугъэ­хэр ары анахьэу Социальнэ фондым ыгъэцэкIэн фаехэр», — къыхигъэ­щыгъ Адыгеим и ЛIы­шъхьэ.

Урысыем и Социальнэ фонд Адыгэ Республи­кэмкIэ и Къутамэ ипащэ къызэриIуагъэмкIэ, республикэм ихэбзэ къулыкъу­хэм гъусэныгъэ адыриIэу фондым иIофшIэн егъэпсы. Анахьэу ынаIэ зытыри­гъэтырэр цIыф куп гъэнэфагъэхэу социальнэ лъэныкъомкIэ икъоу мыухъумагъэхэм — пенсионер­хэм, сэкъатхэм, сабыибэ зэрыс унагъохэм ыкIи нэмыкIхэм IэпыIэгъу ятыгъэныр ары.

Илъэсэу икIы­гъэм Къутамэм пенсиехэм, ахъщэ IэпыIэгъу­хэм, нэмыкI Iофтхьабзэхэу социальнэ IэпыIэгъум къыдыхэлъытагъэхэм апэ­Iуигъэхьагъэр сомэ миллиард 28,4-м шIокIы. Мыщ дэжьым къэIогъэн фае: Урысые Федерацием и Президентэу Владимир Путиныр кIэщакIо зыфэ­хъугъэ социальнэ тынхэр зэкIэ игъом ыкIи икъоу зыIэкIэхьан фаехэм алъа­гъэIэсыгъэх.

2023-рэ илъэсым ПенсиехэмкIэ фондымрэ Социальнэ страхованиемкIэ фондымрэ зэхагъэхьажьхи Урысыем и Социальнэ фонд зыкI щыIэ хъугъэ. Ащ къыщегъэжьагъэу зэкIэ тынхэр, фэIо-фашIэхэр ыкIи нэмыкI пшъэрылъхэр ащ къыфэгъэзагъэхэ хъугъэ. ЗэхъокIыныгъэм къы­хэкIэу IофшIэпIэ чIыпIэхэр чIанагъэхэп, фондитIуми яспециалистхэр респуб­ликэм къыщагъэнэжьы­гъэх, Урысыем и Социаль­нэ фонд ишъолъыр къута­мэ ахэр хэхьэх.

«ГумэкIыгъо къыпымыкIэу ахэр зэхэдгъэхьа­жьы­гъэх, цIыфхэу зифэIо-фа­шIэхэр агъэцэкIагъэхэми бырсыр ащ къахилъхьа­гъэп. КIэкIэу къэпIон хъу­мэ, ПенсиехэмкIэ фондымрэ Социальнэ стра­хованиемкIэ Фондымрэ цIыфхэм афызэшIуахыщтыгъэ фэIо-фашIэхэр зэкIэ икъоу ыкIи ипIалъэм агъэ­цакIэхэзэ ашIыщт. Пен­сиехэр, социальнэ тынхэр ыпэкIэ зыщаIэкIагъахьэщтыгъэ пIалъэхэр къагъэ­нэжьыгъэх, клиент къулыкъухэр зэхащагъэх, Социальнэ фондым ифэIо-фэшIэ пстэухэмкIи зыгъэгу­мэкIыхэрэ IофыгъохэмкIэ джэуапхэр агъотыщтых», — къыIуагъ МэщлIэкъо Хьамидэ.

Зэхагъэхьажьыгъэ фондым иIофшIэн нахьышIоу зэхэщэгъэным иIофыгъо­хэм ыкIи цифрэ технологиехэм япхыгъэ фэIо-фа­шIэхэм зягъэушъомбгъугъэным, «Ваш контроль» зыфиIорэ системэм диштэу зэрищыкIагъэм тетэу, лъэ­гэпIэ иным нэсэу фэIо-фашIэхэр зэрагъэцакIэщтыгъэхэм джыри тетыщт, 2022-рэ илъэсым фэIо-фашIэхэм ягъэцэкIэн процент 99,6-м нэсыгъагъ.

АР-м и ЛIышъхьэ ипресс-къулыкъу