Ипчъэхэр шIэхэу къызэIуихыщтых
Мэлылъфэгъум и 17-м къыщыублагъэу Мыекъуапэ ирайон цIыкIоу Восходым щашIыгъэ IэзэпIакIэм иIофшIэн ригъэжьэщт.
ЗэкIэми апэ цIыфхэр зэкIуалIэхэу псауныгъэм икъэухъумэн фэгъэзэгъэ псэуалъэхэр уахътэм диштэу зэтегъэпсыхьэгъэнхэмкIэ шъолъыр программэм къыдыхэлъытагъэу IэзапIэр ашIыгъ ыкIи аужырэ шапхъэхэм адештэ. IэзапIэр зычIэт унэм иинагъэ квадратнэ метрэ мини 4 фэдиз мэхъу ыкIи мыщ икъутамэхэу къалэм ичIыпIэ зэфэшъхьафхэм ащитэкъухьагъэу щытыгъэхэр ащ ишIуагъэкIэ зы ашIыжьыщтых.
А зы IофшIэгъу уахътэм гъогогъу 450-рэ мыщ къычIэхьанхэ алъэкIыщт, нэбгырэ мин 30 фэдиз къызэлъаубытышъущт. Ячэзыу зэрежэхэрэ уахътэр нахь макIэ хъущт, фэIо-фашIэхэм ядэгъугъэ хагъэхъощт.
Терапевтхэм ямызакъоу, псэолъакIэм чIэсыщтых лъэныкъо хэхыгъэхэмкIэ Iазэхэрэри. Джащ фэдэу узхэм ягъэунэфын, рентген, ультразвук ыкIи нэмыкI уплъэкIунхэр щашIыщтых.
Мэхьанэшхо зиIэхэм ащыщ общественнэ транспорт уцупIэхэм IэзапIэр зэрапэблагъэри. Медицинэ IэпыIэгъур нахь Iэрыфэгъу хъуным ари фэIорышIэщт.