Мы илъэсым игъэтхэ дзэ дэщыгъо мэлылъфэгъум и 1-м Адыгеим щырагъэжьагъ. Iофтхьабзэр республикэм зэрэщызэхащэрэм, феде­раль­нэ гупчэм къафигъэуцугъэ пшъэрылъхэр зэрагъэцакIэхэрэм зыщате­гу­щыIэгъэхэ пресс-зэIукIэ тыгъуасэ Мыекъуапэ щыкIуагъ.

Iофтхьабзэм хэлэжьагъэх АР-м идзэ комиссариат ипащэу Александр Авериныр, ныбжьыкIэхэр дзэм дэщыгъэнхэмкIэ ыкIи ухьазырыгъэнхэмкIэ отделым ипащэу Виталий Лебедевыр, АР-м идзэ комиссариат идзэ врачебнэ-комиссие итхьаматэу Игорь Буренковыр, районхэм ащыIэ дзэ комиссариатхэм ятхьаматэхэр, журналистхэр.

Пэублэм дзэ комиссариатхэм ащыщэу нахь къахэщыгъэ­хэр Александр Авериным къы­Iуагъэх. Апэрэ чIыпIэр Джэджэ ыкIи Кощхьэблэ дзэ комиссариатхэм, ятIонэрэр Мыекъопэ районым ыкIи ящэнэрэр Адыгэ­къалэ, Теуцожь, Тэхъутэмыкъое дзэ комиссариатхэм япащэхэм афагъэшъошагъ.

Пресс-зэIукIэр къызэIуихызэ, мы илъэс зэкIэлъыкIохэм дзэм къулыкъу щызыхьы зышIоигъо ныбжьыкIэхэм япчъагъэ къызэрэщымыкIэрэр ыкIи адрэ илъэсхэм афэдэу федеральнэ гупчэм къафигъэуцугъэ пшъэ­рылъыр зэрагъэцэкIэщтыр дзэ комиссариатым ипащэ къыхигъэщыгъ.

— УФ-м ухъумэнымкIэ и Ми­нистерствэ иунашъокIэ, Адыге­им щыщ ныбжьыкIэ нэ­бгырэ 550-рэ фэдиз мыгъэрэ гъэтхэ дзэ дэщыгъом къулы­къум ащэщтыр. Апэрэ дзэ дэщыгъор мэлылъфэгъум и 19-м едгъэ­жьэщт, нэбгырипшI гъогу те­хьащт. Къыхэгъэщыгъэн фае ахэр хэу­шъхьафыкIыгъэ дзэ операцием, Донецкэ ыкIи Луган­скэ народнэ республикэхэм, Запорожскэ ыкIи Херсонскэ хэкум зэрамыщэщтхэр. Арышъ, мы лъэныкъомкIэ ны-тыхэр гумэкIыгъо хэтынхэр ищыкIа­гъэп. Темыр Кавказым ыкIи Къыблэ федеральнэ шъолъырым къу­лыкъу щахьыщт, — къы­Iуагъ Александр Авериным.

Дзэ комиссар шъхьаIэм къы­зэриIуагъэмкIэ, 2023-рэ илъэсым щылэ мазэм и 1-м къыщегъэжьагъэу дзэ учетым кIа­лэхэр хагъэуцох, мэзищым къыкIоцI къулыкъу зыхьыщтхэр агъэна­фэх. 2006-рэ илъэсым къэхъугъэ­хэу мыгъэ илъэс 17 хъухэрэр учетым хагъэуцуагъэх, апэрэу электроннэ шIыкIэр къыз­фагъэ­федагъ, базэм дагъэхьагъэх.

ШIоигъоныгъэ зиIэу, ежь­-ежьы­рэу къекIуалIэхэзэ мобилизацием зыхэзыгъэфагъэхэм зэрафэразэр А. Авериным къы­хигъэщыгъ. Непэрэ мафэм зэзэгъыныгъэм кIатхэу дзэ къулыкъум кIохэрэм япчъагъэ зэрэхахъорэр къыIуагъ.

Бжыхьэ дзэ дэщыгъом зэ­фэхьысыжьэу фэхъугъэхэм нэ­ужым ар къатегущыIагъ. Непэ Адыгеим икIыгъэ нэбгырэ 400 фэдизмэ чIыпIэ зэфэшъхьафхэм дзэ къулыкъур ащахьы.

— Непэрэ мафэм ехъулIэу дзэ къулыкъум ехьылIэгъэ хэ­бзэгъэуцугъэм зэхъокIыныгъэ фэхъугъэп, ныбжьым хагъэхъо­нэу е къызэрэтыщтхэ пIалъэр нахьыбэ ашIынэу тегущыIэхэми, ащ епхыгъэ хэбзэгъэуцугъэ джыри щыIэп. 2023-рэ илъэсым дащыхэрэмкIэ зи зэхъокIыгъэ хъущтэп, — къыIуагъ А. Авериным.

Iофтхьабзэм икIэухым журналистхэр зыгъэгумэкIырэ уп­чIэхэм дзэ комиссар шъхьаIэм джэуапхэр къаритыжьыгъ.

ДЕЛЭКЪО Анет.