Урысые зэнэкъокъоу «Живая клас­сика» зыфиIорэм ишъолъыр уцугъо мы мафэхэм зэхащагъ.

Республикэм икъалэхэм ыкIи ирайонхэм къарыкIыгъэ нэбгырэ 33-рэ ащ хэлэжьагъ. Анахь дэгъоу зыкъэзыгъэлъэгъогъэ нэбгырищыр дунэе кIэлэцIыкIу гупчэу «Артекым» кIощтых.

Урысыем гъэсэныгъэмкIэ и Министерствэ, президент грантхэмкIэ Фондыр, нэмыкI къулыкъухэр Iофтхьабзэм кIэщакIо фэхъугъэх. КъыткIэхъухьэрэ лIэужхэр еджэным нахь фэщэгъэнхэр, агукIэ къыхахырэ тхы­гъэм мэхьанэу иIэр къыда­лъытэзэ къеджэнхэр ары пшъэ­рылъ шъхьаIэу зэхэщакIохэм зыфагъэуцужьырэр.

Зэнэкъокъум хэлэжьагъэхэм аныбжь илъэси 10-м къыще­гъэжьагъэу илъэс 17-м нэсыщтыгъ. ТекIоныгъэм уфэкIоным пае едзыгъуи 5 зэпыпчынэу щытыгъ. Апэрэ уцугъом классым исхэм ащыщэу анахь дэгъоу къеджэхэрэр къыхахыгъэх. Нэужым гурыт еджапIэмкIэ текIоныгъэ къыдэзыхыгъэр муниципальнэ уцугъом щызэнэ­къокъугъэх ыкIи шъолъыр уцугъом къекIолIагъэх.

КIэлэцIыкIухэм якIэсэ про­изведениехэм къахахыгъэ пы­чыгъохэм езбырэу, зыкъыда­шIызэ къяджагъэх. Ащ мэхьанэу, купкIэу иIэр къэзэрэугъоигъэхэм алъагъэIэсыныр ары ахэр зыпылъыгъэхэр. Жюрим хэтхэм анахь дэгъухэр къыхахынхэр IэшIэх къафэхъугъэп. Iофтхьабзэм хэлэжьагъэхэм зэкIэми дипломхэр афагъэшъо­шагъэх, лауреат хъугъэхэм ацIэ къыраIуагъ. Анахь дэгъоу зыкъэзыгъэлъэгъогъэ нэбгыри- щыр «Артекым» гъэмафэм кIощтых.

Шъхьэлэхъо Дианэ текIоныгъэ къызэрэдихыгъэм лъэшэу ыгъэ­гушIуагъ, еджэныр икIас ыкIи цIыфхэм апашъхьэ зыкъыщишIыным гухахъо хегъуатэ. Бэшкэкъо Асхьад сэмэркъэу нэшанэ хэлъэу къызэджэгъэ пычыгъор лъэшэу агу рихьыгъ. ТекIоныгъэ къыдэзыхыгъэ кIалэр «Артекым» зэрэкIощтым ыкIи ащ исэнаущыгъэ къызэрэщигъэлъэгъощтым зэрагъэгушхорэр къытиIуагъ.

ДЕЛЭКЪО Анет.