Мыекъуапэ дэт гурыт еджапIэу N 10-м икIэлэеджэкIо-юнармейцэхэр къэлэ лIыхъужъэу Волгоград бэмышIэу къикIыжьыгъэх. Дзэ-патриотическэ Iофтхьабзэу «Волна памяти» зыфиIорэм къыдыхэлъытагъэу ахэр ащ ащэгъагъэх.

ТарихъымкIэ мэхьанэ ин зиIэ чIыпIэ зэфэшъхьафхэр кIэлэ­еджакIохэм къалъэгъугъэх. Ма­маев курган ахэр щыIагъэх ыкIи зэлъашIэрэ скульптурэу «Родина-мать зовет!» зыфиIорэр зэрагъэлъэгъугъ. Джащ фэдэу музееу «ШIэжьым» чIащагъэх. Павловым иунэ ыкIи Гергардт ишъхьал нэрылъэгъу къафэ­хъугъ, Сталинград щыкIогъэ заор анэ къыкIэуцуагъ.

АР-м шIэныгъэмрэ гъэсэныгъэмрэкIэ и Министерствэ къы­зэрэщаIуагъэмкIэ, юнармейцэ­хэм ащыщхэм а къалэм присягэр щаштагъ. Яхэгъэгу ыкIи юнармием афэшъыпкъэхэу гущыIэ пытэ атыгъ. Мыщ ыпэкIэ Беслан къыщыхъугъэ тхьамыкIагъом епхыгъэ шIэжь Iофтхьабзэм кIэлэеджакIохэр хэлэжьэгъагъэх.

Мы мафэхэм АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр кIэлэеджакIохэм аIукIагъ.

— КIэлэеджакIохэм агу рихьыгъэу бэ къаIуатэрэр. Хэгъэгум итарихъ ашIэнымкIэ мыщ фэдэ Iофтхьабзэхэм мэхьанэшхо яI, ар зэшIопхыныр IэшIэхэу щытэп, арышъ, зэхэщакIохэу шIоигъоныгъэ зиIэу къытэуалIэхэрэм IэпыIэгъу тафэхъу. КъыткIэхъухьэрэ лIэужхэм тарихъыр зэрашIогъэшIэгъоныр, зэрэзэрагъа­шIэрэр зытлъэгъукIэ, тегъэгушхо, — еIо Евгений Лебедевым.