Адыгеим и ЛIышъхьэу КъумпIыл Мурат республикэм икъулыкъушIэхэу хэушъхьафыкIыгъэ дзэ операцием хэлажьэхэрэм Мыекъопэ гарнизоным идзэ часть зэIукIэгъу щадыриIагъ. Ахэм къалэжьыгъэу отпуск къаратыгъ ыкIи ыпэ­кIэ ухьазырыныгъэ зыщагъотыгъэгъэ дзэ частым къэсыгъэх.

Шъугу къэтэгъэкIыжьы, Адыге­им щыщхэу мобилизацием къы­хиубытагъэхэр ары я 3-рэ артиллерийскэ дивизионэу Со­ветскэ Союзым и ЛIыхъужъэу Андырхъое Хъусен ыцIэ зы­хьырэм хэхьагъэхэр.

Мы зэIукIэгъум хэлэжьагъэх федеральнэ инспектор шъхьаIэу Сергей Дрокиныр, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м и Къэралыгъо Совет — Хасэм и Тхьаматэ игуадзэу Цэй Эдуард, республикэм идзэ комиссарэу Александр Авериныр, я 227-рэ артиллерийскэ дивизионым ипащэ ипшъэрылъхэр зыгъэцэкIэрэ Алексей Косиновыр.

ДзэкъулыкъушIэхэм адэгущыIэ зэхъум республикэм и ЛIышъхьэ ахэм япсауныгъэ изытет кIэупчIагъ. Джащ фэдэу мобилизацием къыхиубытагъэ­хэм социальнэ IэпыIэгъу зэра­фэхъущтхэм, хэбзэ къулыкъухэм япшъэрылъхэр зэрагъэца­кIэхэрэм япхыгъэ Iофыгъохэм къащыуцугъэх.

«ДзэкъулыкъушIэхэм ыкIи ахэм яунагъохэм ящыкIагъэр зэкIэ аIэкIэгъэхьэгъэным еп­­хыгъэ пшъэрылъхэр зэшIотхынхэ фае. Шъо, шъхьафитныгъэм фэбэнэрэ кIалэхэм, шъуи­пшъэ­рылъхэр жъугъэцэкIэнхэм, псаоу къэжъугъэзэжьыным апае шъуищыкIагъэр зэкIэ шъод­гъэгъотыным тыпылъ. Ау ащ дакIоу шъуиунагъохэри зыми фэ­мыныкъонхэм, игъом ыкIи икъоу социальнэ IэпыIэгъу ятыгъэным мэхьанэшхо яIэу щыт», — къыIуагъ КъумпIыл Мурат.

Мобилизацием къыхиубытэу къулыкъум ащэгъэ кIалэхэм республикэм ипащэхэм ыкIи Адыгеим зэкIэ щыпсэухэрэм ренэу анаIэ къызэратетым, IэпыIэгъу къызэрафэхъухэрэм апае зэрафэразэхэр къаIуагъ. Адыгеим и ЛIышъхьэ къызэрэхигъэщыгъэмкIэ, непэ фронтым деIэрэ пстэуми Урысыер зэрэтекIощтым яцыхьэ телъ ыкIи яIофшIэн еIолIэнчъэу агъэцэкIэным фэхьазырых.

Адыгеим и ЛIышъхьэ ащ да­кIоу къызэриIуагъэмкIэ, дзэ­къулыкъушIэхэм ялъэIу тхылъхэр гъэцэкIагъэ хъунхэм ежь ышъхьэкIэ ынаIэ тырегъэты. Къулыкъу гъэнэфагъэхэм му­ниципалитетхэр яIэпыIэгъухэу къэуцурэ Iофыгъохэр зэкIэ чэщи мафи ямыIэу зэшIуахых.

АР-м и ЛIышъхьэ ипресс-къулыкъу Сурэтхэр: А. Гусев.