Японием итамыгъэу декоративнэ чэрэз чъыг лъэпкъэу сакурэр мы уахътэм къэтIэмы. КъокIыпIэм щыпсэурэ лъэпкъхэм яискусствэк1э къэралыгъо музеим и Темыр-Кавказ къутамэу Мые­къуапэ щыIэм мыщ фэдэ чъыг 63-рэ дэт. Ахэм ядэхэгъу уахътэ фагъэшъошэгъэ фестивалэу «Цветение сакуры в музее Востока» зыфиIорэр тхьаумафэм мыщ щыкIуагъ, ар ящэнэрэу зэхащэ.

Сакурэ чъыгхэр музеим ищагу дязгъэгъэтIысхьэгъагъэр Кушъу Нэфсэт. Музеим ипащэу ШъэуапцIэкъо Аминэт къызэриIорэмкIэ, мыщ фэдэ чъыг лъэпкъищ ящагу дэт. Апэрэ сакурэ лъэпкъым ичъыгхэм якъэтIэмыгъо текIыгъах, тхьэпэ фыжьыбзэу къырихыгъагъэхэри пытэкъу­жьыгъэх. ЯтIонэрэ чъыг лъэпкъым икъэгъагъэ­хэр шэплъыбзэу къырехы къодый. Ащ ыуж ящэнэрэ сакурэр къэтIэмыщт. «Тибзылъфыгъэ­хэр зэрэдахэм фэдэу, гъатхэм ичъыг къэтIэмыгъо уахътэ дэхэдэд, арышъ, ащ тефэу Адыгеим щыпсэухэрэм ыкIи ихьакIэхэм апае мы фестивалыр зэхэтщагъ, — хигъэунэфы­кIыгъ ШъэуапцIэкъо Аминэт. — Тикультурэхэр сыдкIэ зэтехьэрэ пIомэ, тишыкIэпщынэ фэдэ музыкальнэ Iэмэ-псымэхэр ежьхэми яI, ти­адыгэ шъолъыр ит чэрэз чъыгхэри мы уахътэм къэ­тIэмых. Ежь сакурэм икъэгъагъ щэ зэтекIэу, дахэу къызэрэрихырэр ары бгъэшIэгъонэу хэтыр. Арышъ, а уахътэр блэдгъэкIырэп».

Фестивалым ипрограммэ гъэшIэгъонэу зэхэщэгъагъ. КIэлэцIыкIу къэшъокIо куп зэфэшъхьаф­хэр музей щагум щызэхащэгъэ концертым хэлэжьагъэх: хореографическэ купэу «Сюрприз», искусствэм ихэхъоныгъэ игупчэу «Шпаргалка», адыгэ къашъомкIэ кIэлэцIыкIу купэу «Мыекъуапэ инэфылъэхэр» зыфиIохэрэм ахэт къэшъокIо цIыкIухэм хореографическэ композицие гъэшIэгъонхэр къагъэлъэгъуагъэх. ХьакIэу къекIолIагъэхэр агъэчэфыгъэх, къокIыпIэ куль­турэмрэ адыгэ къашъомрэ зэрэзэдиштэхэрэм уяплъынкIэ гъэшIэгъоныгъ.

IэпэIасэхэм ямастер-классхэр музей щагум джащ фэдэу щызэхэщэгъагъ. Iуданэм хэшIыкIыгъэ нысхъапэхэр, псэушъхьэхэр гъэлъэгъуа­пIэхэм ателъыгъэх, ахэм къаготыгъ адыгэ Iэпэщысэхэм якъэгъэлъэгъон – пхъэм хэшIыкIыгъэ пкъыгъо зэфэшъхьафхэр, адыгэ Iанэм щыублагъэу тхьацуфхэм анэсыжьэу, фестивалым къыщызыгъэлъэгъуагъэр Гостэкъо Рус­лъан, адыгэ шыуанэр, шыкIэпщынэр, къамылыр, къэ­латыр – ПIатIэкъо Айдэмыр.

Сакурэ чъыгхэм къапэIулъ гъэхъунэжъыеу аммонитхэр зытетым сурэтышI ныбжьыкIэхэм ямольбертхэр къыщызэтырахыгъэу, чIыопсым идэхагъэ къырагъэлъэгъукIэу сурэтхэр ашIыщтыгъэх. Художественнэ классхэм ыкIи искусствэхэмкIэ колледжэу Тхьабысым Умар ыцIэ зыхьырэм ащеджэхэрэм яIэшIагъэхэм якъэгъэ­лъэгъон къыщызэIуахыгъ. Чэрэз чъыгхэм акIэпхъэгъэ къэрабэхэм ахэсхэу сурэтхэр зытезыхыжьыщтыгъэхэри къахэкIыгъэх. Музеим ищагу зэрэщытэу фестивалым иIофтхьабзэхэм зэлъаубытыгъ.

Ежь музей кIоцIым щыкIорэ къэгъэлъэгъонхэми фестивалым хэлэжьэрэ сабыйхэм ыпкIэ хэмылъэу нэIуасэ зафашIын алъэкIыгъ. Мыекъо­пэ пивэшI заводым чIэхьапкIэр афитыгъ. Урысыем исурэтышIхэм я Союз хэтэу Сергей Филатовым имастер-класс музеим иапэрэ къат щыкIуагъ. Ащ къышIыгъэ нэпэеплъ сурэтыр щысыгъэ студент ныбжьыкIэхэм ащыщ шIухьафтынэу ритыжьыгъ.

ИскусствэхэмкIэ колледжым истудент орэдыIохэу Нэхэе Тамарэрэ Анас­тасия Ментаса­швилирэ рагъа­джэхэрэр ыкIи АР-м и Къэралыгъо филармоние иорэдыIоу, АР-м изаслуженнэ артисткэу Даутэ Сусанэ зыхэ­лэжьэгъэхэ концертыр фестивалым кIэух фэ­хъугъ. Пчыхьэ охъуфэ нэс Iоф­тхьабзэм хэлэ­жьэгъэ хьакIэхэм гухахъо хагъуа­тэу языгъэпсэфыгъо уахътэ агъэкIуагъ.

Тэу Замир.