Сыд фэдэрэ ошIэ-дэмышIэ Iоф къэхъугъэми, ащ фэгъэхьыгъэ шIэныгъэ уиIэ зыхъукIэ узэрэзекIощтыр пшIэщт. Гъэсэныгъэм иучреждениехэм ащызэрагъашIэрэ ОБЖ-м щыIэныгъэмкIэ мэхьэнэ ин иI, лъэныкъо зэфэшъхьафхэмкIэ кIэлэцIыкIухэр епсыхьэх, патриотическэ пIуныгъэ ахелъхьэ. Лицееу N 19-м мы предметыр зэрэщызэрагъашIэрэр мы мафэхэм нэрылъэгъу тфэхъугъ. Тыгъужъ Олег илъэс 20-м ехъу­гъэу ащкIэ шIэныгъэхэр кIэлэ­еджакIохэм арегъэгъоты. — БлэкIыгъэ илъэсхэм ялъы­тыгъэмэ, программэм зэхъокIыныгъэхэр ащ фэдизэу фэхъугъэ­хэп, ау патриотическэ пIуны­гъэм ылъэныкъо нахь игъэкIотыгъэу Iоф датшIэ тыхъугъ. 2022-рэ илъэсым тхылъыкIэхэр къыдэкIыгъэхэу ахэмкIэ Iоф тэшIэ. Класс пэпчъ зэригъэшIэщт лъэныкъор шъхьафы. ЫпэрапшIэу ошIэ-дэмышIэ Iофхэм афэгъэхьыгъэу кIэлэеджакIохэр етэгъаджэх, нэужым зекIом фэгъэхьыгъэу, псыр къыдэкIыгъэмэ, машIом зыкъыIэтыгъэмэ узэрэзекIон фаем ыкIи нэмыкI лъэныкъохэм танэсы. Апшъэрэ классхэм арысхэр дзэ къулыкъум нэIуасэ фэтэшIых. Автомат зэдгъэгъотыгъэу такъикъ заулэкIэ тикIэлэеджакIохэм къызэпкъырахы ыкIи зэхалъхьажьы. ХэушъхьафыкIыгъэ тир тиI, щэрыоным фэтэгъасэх, — еIо тигущыIэгъу. ИгъэкIотыгъэ гъэцэкIэжьынхэм ауж гурыт еджапIэр къызэIуахыжьыгъакI, мы предметым епхыгъэ кабинетыр зэтырагъэ­псыхьанэу джыри игъо ифагъэ­хэп, ау ищыкIэгъэ Iэмэ-псымэхэр яIэх. ДжырэкIэ агъэкIэжьырэ лицееу N 8-м икIэлэеджа­кIохэри мыщ зэрэщеджэхэрэм ыпкъ къикIыкIэ кабинет нэкI щыIэп. Тыгъужъ Олег класс пэпчъ кIозэ шIэныгъэ арегъэгъоты. — КIэлэеджакIохэм нахь ашIогъэшIэгъоныр автоматыр ары. ТиеджапIэ къэзыухыгъэ нэбгыри 10 фэдиз дзэм епхыгъэ апшъэрэ еджэпIэ зэфэшъхьаф­хэм ащеджэх, бэмышIэу летчик хъугъэ кIалэр хьакIэу къытфэкIогъагъ, — еIо О. Тыгъужъым. Урысые ныбжьыкIэ движе­ниеу «Юнармия» зыфиIорэм иотрядэу еджапIэм щызэхащагъэм илъэс пчъагъэ хъугъэу Тыгъужъ Олег икомандир. Ар урокым хэмыхьэу зэхащэ, нэбгырэ 30 фэдиз хэт. КIэлэеджакIохэр республикэм щызэхащэрэ Iофтхьэбзэ зэфэшъхьафхэм ахэлажьэх. Джащ фэдэу жъоныгъуакIэм и 9-м зэхащэрэ мэфэкI Iофтхьабзэхэм чанэу ахэлажьэх. Мыгъи ащ изыфэгъэхьазырын аублагъ. Непэ къэралыгъом щыхъурэ хъугъэ-шIагъэхэм кIэлэеджакIо­хэр нэIуасэ афашIых. ХэушъхьафыкIыгъэ дзэ операцием тикIа­лэхэр зэрэхэлажьэхэрэр, яхэ­гъэгу къызэраухъумэрэр кIэлэегъаджэм ренэу къафеIуатэ. КIэ­лэеджакIоу мыщ щеджэрэм ятэу хэушъхьафыкIыгъэ дзэ операцием гъогогъуитIо щыIа­гъэр бэмышIэу къырагъэблэгъагъ, пшъэрылъэу агъэцакIэхэрэр ащ къафиIотагъ. Джащ фэдэу «Боевое братство» зыфиIорэ движением идзэ специалистхэри къэкIонхэу яжэх. Класс пэпчъ зэригъэшIэрэ лъэныкъор зэфэшъхьаф, гущыIэм пае, машIом зыкъыштагъэмэ пшIэн фаер, терроризмэм узэрэпэшIуекIощтыр, нэмыкIхэри. Я 4-рэ четвертыр практическэ IофшIэнкIэ кIощт. ОшIэ-дэмышIагъэм хэфэгъэ цIыфыр псаоу къэгъэ­нэжьыгъэным пае шIэ­гъэн фаер, уIагъэ зытелъым узэрэдэзекIощтыр, нэмыкIхэри зэгъэшIэгъэнхэр пшъэрылъ шъхьаIэх. Ахэр зэкIэ псынкIэу пшIэнхэ фае, сыда пIомэ мыщ фэдэ тхьамыкIагъо къызыхъукIэ зы такъикъыми мэхьанэшхо иI. ОБЖ-р щыIэныгъэмкIэ анахь ящыкIэгъэ предметхэм ащыщ. Сыда пIомэ, ошIэ-дэмышIагъэ къызыхъукIэ къэбарыр зымы­шIэрэм щтагъэм хэтэу зыгорэ къехъулIэн ылъэкIыщт. КIэлэегъаджэм тыдэгущыIэзэ мэкъэгъэ­Iур къыхэнагъ, еджапIэм машIом зыкъыщиштагъэу, псынкIэу учIэкIын зэрэфаер къыIуагъ. Классхэм арыс кIэлэеджакIохэр къычIэкIыгъэх, гуIэхэзэ шъхьадж нахь пэблэгъэ дэкIояпIэм ехыгъэх ыкIи площадкэм къыщызэрэугъоигъэх. МэкъэгъэIур нэпцIэу зэрэщытыр къазыраIор ары ныIэп зычIэхьажьыгъэхэр. — Мыщ фэдэ Iофтхьабзэхэр зэхэтэщэх, кIэлэеджакIохэр мыщтэхэу, псынкIэу еджапIэм къы­зэрэчIэкIыщтхэм етэгъасэх. ЕджапIэм укъызэрэчIэкIыщт чIыпIи 5 тиI, шъхьадж нахь пэблагъэр егъэфедэ. ШапхъэмкIэ такъикъи 3 — 4,5-кIэ площадкэм къыщызэрэугъоинхэ фае. Терроризмэм пэшIуекIогъэным ылъэныкъокIи игъэкIотыгъэу Iоф тэшIэ, кIэлэеджакIохэм зызэрагъэпсын фаер агурытэгъаIо, — еIо кIэлэегъаджэм. КIэлэеджэкIо анахь чанхэм гущыIэгъу тафэхъугъ, мы предметым шIуагъэу пылъыр, гъэ­хъагъэу яIэхэр къытфаIотагъэх. Александр Колодкиным мы илъэсым лицеир къеухы. Дзэм фэгъэхьыгъэ лъэныкъом нэIуасэ зэрэфашIырэр лъэшэу ыгу рехьы. — ЩыIэныгъэмкIэ зишIуагъэ къысэкIыщт лъэныкъо пчъагъэмэ мы предметым нэIуасэ сафешIы. Анахьэу къыспэблагъэр дзэ къулыкъум фэгъэхьыгъэу зэдгъа­шIэхэрэр ары, сыда пIомэ ащ епхыгъэу апшъэрэ еджапIэм сычIахьэ сшIоигъу, сятэ илъэуж сырыкIощт, — еIо кIэлэ ныбжьыкIэм. — ОБЖ-м ишIуагъэкIэ, гу­зэжъогъу ифэгъэ цIыфым апэрэ IэпыIэгъу зэребгъэкIыщтыр дэгъоу зэдгъэшIагъ, дзэ политикэм фэгъэхьыгъэу къытфаIуатэрэр бэ. «Юнармием» сыхэт ыкIи Iофтхьэбзэ зэфэшъхьафхэм сигуапэу сахэлажьэ. ТекIоныгъэм и Мафэ фэгъэхьыгъэ мэфэкIым илъэс къэс тыхэлажьэ, — еIо Виктория Кирпаневам. Михаил Назаренкэм мы предметымкIэ шIэныгъэ дэгъухэр иIэх, игъахъагъэхэмкIи къахэщы. — ТикIэлэегъаджэ хэгъэгур шIу тлъэгъуным тыфепIу, автоматым изэхэлъыкIэ хэшIыкI фытиIэным, противогазыр зыIутлъхьаным ыкIи практическэ Iоф­шIэнхэр дгъэцэкIэнхэм тафегъасэ. Зэнэкъокъу зэфэшъхьафхэм тахэлажьэ ыкIи тикомандэ анахь дэгъухэм ащыщ зэпыт. ГъэрекIо щэрыонымкIэ кубок къысфагъэшъошагъ. Ап­шъэрэ еджапIэм сызычIахьэкIэ дзэм фэгъэхьыгъэу джыри сишIэныгъэхэм ахэзгъэхъощт, — еIо Михаил. Хэгъэгур шIу плъэгъунын фэгъэхьыгъэ Iофтхьабзэу зэхащэхэрэм зэкIэми Анна Растворовар ахэлажьэ. Анахьэу ыгу къэкIыжьырэр мэфищ зекIо зэрэщыIагъэхэр ары. ЧIыопсым идэхагъэ нахь зэхишIагъ, Хэ­гъэгу зэошхом илъэхъан къефэхыгъэгъэ кухьэлъатэм ипкъыгъохэм алъыхъугъэх. Мы предметым ишIуагъэкIэ зэригъэшIагъэр зэкIэ ищыIэныгъэкIэ къызэрэфэфе­дэжьыщтыр пшъэшъэжъыем къыIуагъ. Мы предметымкIэ шъолъыр олимпиадэм хагъэунэфыкIырэ чIыпIэ къыщыдэзыхыгъэхэм ахэтыгъ Анна Спиваковар. — ЦIыфым апэрэ IэпыIэгъу зэребгъэкIыщтым ыпэрапшIэу уфегъасэ. Мафэ къэс узэутэлIэрэ лъэныкъуабэ мыщ къыделъытэ. Мы предметыр Iэпэдэлэл пшIынэу щытэп, уищыIэныгъэкIэ къыпшъхьапэжьыщт. Олимпиадэм сшIогъэшIэгъонэу сыхэлэжьагъ. УпчIэхэр къысфэкъиныгъэхэп, сыда пIомэ предметыр сыгу рехьы ыкIи сшIогъэшIэгъонэу зэсэгъашIэ. Дзэ патриотическэ клубэу «Юность России» зыфиIорэм, джащ фэдэу дзэ тарихъым, зекIоным ыкIи нэмыкI лъэныкъо­хэм афэгъэхьыгъэ секциехэм яIофшIэн къэкIорэ илъэсым ауб­лэжьынэу зэрагъэнафэрэр Тыгъужъ Олег къытиIуагъ. КIэухым кIэлэеджакIохэм автоматыр зэрэзэхахырэр ыкIи зэрэзэхалъхьажьырэр къытагъэ­лъэгъугъ. ДЕЛЭКЪО Анет. Сурэтхэр Iэшъынэ Аслъан тырихыгъэх.