ЦIыфхэм яшIошIхэр къыдалъытэщт
Общественнэ чIыпIэхэу къихьащт илъэсым зэтырагъэпсыхьажьыщтхэм якъыхэхынкIэ муниципальнэ образованиехэм мэкъэтыныр ащызэхэщэгъэным тегъэпсыхьэгъэ Iофхэр Адыгеим щырагъэжьагъэх. Проектэу «Джырэ уахътэм диштэрэ къэлэ псэукI» зыфиIорэм къыдыхэлъытагъэу илъэс къэс мыщ фэдэ Iофхэр зэрахьэх ыкIи АР-м и ЛIышъхьэу КъумпIыл Мурат ахэм гъунэ алъефы. Мы аужырэ илъэси 5-м къыкIоцI щагуи 182-рэ, общественнэ чIыпIэ 94-рэ зэтырагъэпсыхьажьыгъ. ГъэрекIо республикэм щагу 32-мэ, общественнэ чIыпIэ 22-мэ ащ фэдэ IофшIэнхэр ащыкIуагъ. Мыгъэ джыри республикэм имуниципалитетхэм яобщественнэ чIыпIи 10-рэ ящагу 30-рэ зэтырагъэпсыхьажьынэу щыт. Проектым къыдыхэъытагъэу АР-м и ЛIышъхьэ пшъэрылъ зэрафишIыгъэм тетэу муниципальнэ образование пэпчъ мыгъи, къыкIэлъыкIощт илъэсхэми Iофэу агъэцэкIэщтхэм япланхэр зэхигъэуцуагъэх. ЦIыфхэм яшIошIхэр къыдалъытэзэ, 2024-рэ илъэсым зэтырагъэпсыхьажьыщт зичэзыу псэуалъэхэм яспискэ изэхэгъэуцон лъэшэу анаIэ тырагъэтынэу КъумпIыл Мурат пшъэрылъ афишIыгъ. 2021-рэ илъэсым къыщегъэжьагъэу нэбгырэ мин 20-м ехъу зыщыпсэурэ муниципальнэ образованиехэм рейтинг мэкъэтыныр илъэс къэс ащэкIо. АдыгеимкIэ Мыекъуапэ, Инэм, Яблоновскэ ащ къыхеубытэх. АР-м псэолъэшIынымкIэ, транспортымкIэ, псэупIэ-коммунальнэ хъызмэтымкIэ и Министерствэ къызэритыгъэмкIэ, мэкъэтыным хэлажьэхэрэм япчъагъэ илъэс къэс хэхъо. 2021-рэ илъэсым нэбгырэ мин 33,2-м ехъу, 2022-рэ илъэсым нэбгырэ мин 36-рэ фэдиз ащ хэлэжьагъ. Зэтырагъэпсыхьажьынэу щыт чIыпIэхэм якъыхэхынкIэ мэкъэтыныр зэрэкIорэм, IофшIэнхэр зэрэзэхащэрэм обществэм гъунэ зэрэлъифырэм, цIыфхэр ахэм зэрахэлажьэхэрэм мэхьанэшхо зэряIэр АР-м и ЛIышъхьэ къыхигъэщыгъ. «Федеральнэ IэпыIэгъумрэ Адыгеир лъэпкъ проектым зэрэхэлажьэрэмрэ яшIуагъэкIэ мы аужырэ лъэхъаным тиреспубликэ итеплъэ хэпшIыкIэу зихъожьыгъ: щагухэр, общественнэ чIыпIэхэр нахь зэтырагъэпсыхьагъэх, зыгъэпсэфыпIэ чIыпIакIэхэр агъэпсыгъэх. Ау джырэ шапхъэхэм адиштэрэ щыIэкIэ-псэукIэ тиIэным пае джыри бэ тшIэн фаеу тапэ илъыр. МыщкIэ цIыфхэм яеплъыкIэхэр къыдэлъытэгъэнхэм мэхьанэшхо етэты. Рейтинг мэкъэтыным хэлажьэхэрэм япчъагъэ илъэс къэс къызэрэхахъорэм къыушыхьатырэр республикэм исхэр гъэпсын Iофхэм нахь чанэу зэрахэлажьэхэрэр, ямуниципалитетхэм язэтегъэпсыхьан яIахь хашIыхьэ зэрашIоигъор ары. Джащ фэдэ екIолIакIэм тырыгъуазэзэ, ткIуачIэ зэдетхьылIэмэ ары ныIэп республикэм ипсэупIэ пэпчъ нахь къабзэ, нахь дахэ, нахь теплъэ иIэ тшIын зытлъэкIыщтыр», — къыIуагъ КъумпIыл Мурат. Урысые Федерацием ишъолъырхэм апае Урысыем псэолъэшIынымкIэ и Министерствэ зэхищэгъэ платформэ зыкIым мэлылъфэгъум и 15-м къыщегъэжьагъэу жъоныгъуакIэм и 31-м нэс мэкъэтыныр щыкIощт. ПэIудзыгъэ шIыкIэм тетэу http://za.gorodsreda.ru зыфиIорэ сайтымкIи ащ фэдэ чIыпIэр къыхахын амал щыI. Илъэс 14 зыныбжьхэм къащегъэжьагъэу хэти мэкъэтыным хэлэжьэн ылъэкIыщт. Мэкъэтыным изыфэгъэхьазырынкIэ Iофтхьабзэхэр джыдэдэм муниципалитетхэм ащэкIох. Амакъэ зыфатыщт чIыпIэхэр агъэнэфагъэх. Ахэр къалэу МыекъуапэкIэ: 1. ТекIоныгъэм ия 55-рэ илъэс ибульвар; 2. Хэгъэгу зэошхом хэкIодагъэхэм афэгъэхьыгъэ къэлэ мемориалыр; 3. В. И. Лениным ыцIэ зыхьырэ пчэгур; 4. Культурэм и Унэу станицэу Ханскэм дэтым къыпэблэгъэ скверыр. Инэм къэлэ псэупIэмкIэ: Къутырэу Суповскэм культурэм и Унэу дэтым ипчэгу; Общественнэ чIыпIэу «Зэкъошныгъэм ипчэгу». Яблоновскэ къэлэ псэупIэмкIэ: 1. Спорт джэгупIэу Титовым ыцIэ зыхьырэ урамым тетыр, 68/1; 2. Спорт джэгупIэу Кочубеим ыцIэ зыхьырэ урамым тетыр, 5/1; 3. Урамэу Космическэм, 39-м тет спорт джэгупIэр; 4. Урамэу Космическэм, 5-м тет спорт джэгупIэр. Зэтырагъэпсыхьажьын фэе общественнэ чIыпIэхэр къыхахыхэ зыхъукIэ, цIыфхэм яшIошIхэр нахь икъоу къыдэлъытэгъэнхэм пае мэкъэтыным изэхэщэнкIэ ищыкIэгъэ амалхэр зэрахьанхэу Адыгеим и ЛIышъхьэ пшъэрылъ афишIыгъ. АР-м и ЛIышъхьэ ипресс-къулыкъу