«Урысыем илъэпкъхэм я Ассамблее» АдыгеимкIэ ишъолъыр отделение ипащэу, Адыгеим иобщественнэ движениеу «Адыгэ Хасэм» итхьаматэу ЛIымыщэкъо Рэмэзан дунэе Iоф­тхьабзэу «ШIэжьым ичъыгхат» зыфиIорэм хэлэжьагъ.

— Iофтхьабзэу «ШIэжьым ичъыгхат» зыфиIорэм сигуапэу сыхэлэжьагъ, Хэгъэгум иухъумакIохэм яшIэжь згъэлъапIэзэ, чъыг згъэтIысхьагъ. Мы Iофтхьабзэм ныбжьыкIэхэр фепIух я Хэгъэгу шIу алъэгъуным, къэ­зы­у­цухьэхэрэ дунаим фэсакъынхэм. Джащ фэдэу лъэпкъ зэпхыны­гъэм игъэпытэни ар фэIоры­шIэ. Ащ нэмыкIэу мэзэу зэщыкъуагъэ­хэр зыпкъ игъэуцожьыгъэнхэми мы Iоф­тхьабзэр фэлажьэ, — къыIуагъ ЛIымыщэкъо Рэ­мэзан.

Автоном мысатыушI организациеу «ШIэжьым ичъыг­хат» зыфиIорэмрэ Урысые общественнэ движениеу «ТекIоныгъэм иволонтерхэр» зыцIэмрэ ары зигугъу къэтшIырэ дунэе Iофтхьабзэм кIэщакIо фэхъугъэхэр. Президент грантхэм я Фонд къызыдыригъэштэгъэ Iофтхьабзэм хэлажьэх Урысыем чIыопсым икъэухъу­мэнкIэ и Министерстви, мэз хъызмэтымкIэ Федеральнэ агентствэри. Лъэпкъ проектэу «Экологием» къыдыхэлъытагъэу ар зэхащэ.

2020-рэ илъэсым къыщегъэжьагъэу мыщ фэдэ Iоф­тхьабзэр рагъэкIокIы. Хэгъэгу зэошхом хэкIодэгъэ нэбгырэ пэпчъ телъытагъэу Урысыеми, IэкIыб къэралыгъохэми илъэс къэс чъыг миллион 27-рэ ащагъэтIысхьэ. Илъэси 4-м къыкIоцI нэбгырэ миллиони 5-м ехъу проектым хэлэжьагъ, чъыг миллион 95-м ехъу агъэтIысхьагъ. Хэгъэгу зэошхом лIыхъужъныгъэ щызезыхьагъэхэр цIыфхэм яшIэжь къыхэгъэнэжьыгъэнхэм мы Iофтхьабзэр фэлажьэ. Ащ нэмыкIэу паркхэм нахьыбэу чъыгхэр ащыгъэтIысхьэгъэнхэми, мэзхэр зыпкъ игъэуцожьыгъэнхэми ар афэIорышIэ.