ЗэхъокIыныгъэхэр фэхъущтых
ЖъоныгъуакIэм и 1-м къыщегъэжьагъэу Урысые Федерацием ихэбзэгъэуцугъэ зэхъокIыныгъэхэр фэхъущтых. Джы пенсиер ыкIи социальнэ тынхэр Урысыем и Почтэ закъу язытыщтхэр. ЗэхъокIыныгъэхэр къызэхифыгъэх ыкIи упчIэхэм яджэуапхэр къытыжьыгъ Урысыем и Почтэ Адыгэ РеспубликэмкIэ и ГъэIорышIапIэ ипащэу Наталья Алифиренкэм.
Сыда пенсиер джы Почтэ закъом къыты зыкIэхъугъэр?
Федеральнэ хэбзэгъэуцугъэу N 76-р зиIэу 2023-рэ илъэсым гъэтхапэм и 18-м къыдэкIыгъэ «О внесении изменений в Федеральный закон «О почтовой связи» и отдельные законодательные акты РФ» зыфиIорэм къызэрэщыдэлътагъэу, пенсиер Iэрылъхьэу Урысыем и Почт ары ныIэп зытын фитыр.
ПсэупIэр зыдэщытым ыкIи ащ нэбгырэ пчъагъэу щыпсэурэм ямылъытыгъэу Почтэм ифэIо-фашIэхэр зэпымыоу ыгъэцэкIэщтых. Хэгъэгум истратегическэ предприятиехэм Почтэр ахэхьэ. Ащ иакционер закъор Урысые Федерациер ары, ащ къыхэкIыкIэ, сыд фэдэ ошIэ-дэмышIэ Iоф къэхъугъэми, зыпкъ итыщт, зэпымыоу пенсиер къытыщт ыкIи къырахьакIыщт. НэмыкI организациехэм пенсиер къызыфахьыщтыгъэхэмкIэ сыда зэхъокIыщтыр?
ЦIыфхэу нэмыкI организациехэм пенсиер унэм къафэзыхьыщтыгъэхэмкIэ зи зэхъокIырэп — пIалъэм ахъщэр аIукIэщт. Кассэм екIуалIэщтыгъэхэм почтэ отделениехэм якассэхэм ахъщэр къащаратыщт. Джащ фэдэу нэмыкI социальнэ тынхэр зэратыхэрэм пенсием игъусэу ахъщэр къафахьыщт. Унэм имысхэмэ ахъщэр ятIонэрэ мафэм е почтэ отделением къащаратыщт. Пенсиер цыхьэ зыфишIырэ цIыфым ештэмэ, организациеу ар къыфэзыхьырэр тхьапэу ыIыгъым тетхагъэмэ, ар зэблихъун фае.
Почтэм пенсиер къытыныр нахь Iэрыфэгъуа?
Пенсионерыр е социальнэ IэпыIэгъу зэратырэ цIыфым иахъщэ Почтэм къыщыраты е почтальоным къыфихьы зыхъукIэ, нэмыкI фэIо-фашIэхэри зэшIуихынхэ ылъэкIыщт. ГущыIэм пае, псэупIэ-коммунальнэ фэIо-фашIэхэр, тазырхэр, хъарджхэр, страховкэхэр ыкIи нэмыкIхэм ауасэ ытын амал иI, джащ фэдэу лоторейнэ билет къыщэфын, гъэзет, журнал зэфэшъхьафхэм акIэтхэн ылъэкIыщт. Ащ нэмыкIэу, нэжъ-Iужъхэм ыкIи мызекIохэрэм апае цIыфым нахь ищыкIэгъэ гъомылапхъэхэр почтальоным къыфихьэу мэхъу. Почтэм иIофышIэхэр унагъо пэпчъ мазэм зэ ехьэх. ЦIыфым ипсауныгъэкIэ е ищыIэкIэ-псэукIэкIэ зэхъокIыныгъэхэр фэхъугъэмэ гу лъатэщт ыкIи IэпыIэгъу зэрищыкIагъэмкIэ социальнэ къулыкъухэм макъэ арагъэIущт.
Анахь пэIудзыгъэ псэупIэхэм адэсхэми яахъщэ игъом къафахьынэу Почтэм егъэгугъэх. ОшIэ-дэмышIэ Iоф къэхъугъэми, пенсиер зэрафахьыщтым епхыгъэ схемэ агъэхьазырыгъ.