ЩыIэх цIыфхэр мэфэ заулэрэ умылъэгъухэмэ укъэгумэкIэу, «тыдэ щыI мыр шъуIуа, зыгорэ илажьа, сымаджа, гъой-щая?» пIоу. Ахэр ащ фэдэ чIыпIэ ифэнхэм уегупшысэрэп. Ащ фэдагъ ЕмтIылъ Нурбый. Аужырэ мэзэ зытIущым Нурбый къэлъэгъуагъэп. Сымаджэ хъугъэу зызэхэсэхым, сшIошъгъэхъугъоягъ. ПсынкIэу кIоныр ишэнэу, елъэкIонзэ, фотоаппаратыр ыблыпкъ шIохэлъагъэу Мыекъуапэ иурам гупчэ рычъэу е филармонием, театрэм иутыгу къуапэ Iутэу, артистхэм сурэт атырихэу сымылъэгъужьыныр сшIагъэп.

ЕмтIылъ Нурбый е, загъорэ къызэ-рэкIитхэщтыгъэу, Сахьидэкъо Нурбый гъэзетэу «Адыгэ макъэм» ибренд пIоми хъущт. Ащ истатья имытэу зы номер къыдэкIыгъэп. Аужырэ нэкIубгъор Нурбый иягъ, ащ къыригъэхьан къэбар сыдигъокIи IэкIэлъыгъ. Спортым щыхъурэ-щышIэрэмрэ лъэпкъ культурэм, искус-ствэм ягъэхъагъэхэмрэ икъэлэмыпэ зэ нэмыIэми аблэкIыгъэп. НахьыбэрэмкIэ спорт ыкIи культурнэ зэIукIэхэр пчыхьэрэ е зыгъэпсэфыгъо мафэхэмрэ зызэ-хащэхэрэр. Нурбый имэфэ IофшIэн сыхьатхэр ыухыгъэми, а зэхахьэхэм ямыкIуалIэу зэ къыхэкIыгъэп. ЕтIани а зы уахътэм хъугъэ-шIэгъэ заулэ зэтефэми, зэкIэ чIыпIэхэм якIолIэн ылъэкIыщтыгъ. Емызэщыжьэу, иIофшIэн шIу зэрилъэгъурэр къыхэщэу, ыгурэ ыпсэрэ етыгъэу ар ыгъэцакIэщтыгъ. ЦIыф псынкIэ дэдагъ, зэрелъэкIонрэм фэдагъ итхэни къысшIошIы. Ыныбжьи къэпшIэнэу щытыгъэп, а зы пкъым итэу, а зы теплъэр ыIыгъэу къыхьыгъ игъашIэ-кIэ иятIонэрэ Iахь.

Илъэс щэкI фэдиз хъугъэ Нурбый зысшIэрэр. Бэрэ сэри, телевидением щылэжьэрэ сиIофшIэгъухэми къытфэтхагъ, тигугъу гъэзет нэкIубгъохэм къащишIыгъ, тигъэхъагъэхэм мэкъэгъэIу афишIыгъ, сурэтыбэ ттырихыгъ. Сэ сыдигъокIи сэIо: Iоф сшIэу, интервью тестхэу е концерт зесщэу сурэтхэр сиIэхэмэ, ахэр зихьатырыр ЕмтIылъ Нурбый, сурэтхэр къызысфихьыжьхэкIэ, «сиархив оры сфэзыугъоигъэр, опсэу» есIощтыгъ. Сыгу къеорэр тызэготэу сурэт зэрэтимыIэр ары. Ежьым икIэсагъэп сурэт тепхынэуи, видео тепхынэуи. КъэсэшIэжьы, илъэс 70-рэ зэхъум, сыфэягъ зы телекъэтын горэ фэсшIынэу. Бэрэ ыуж ситыгъ селъэIоу, сызхигъэзэгъагъэп, сыд зысэIуи къешIугъагъэп. ЦIыф къызэрыкIоу, шъырытэу, укIытапхэу зэрэщытыгъэм пае игугъу пшIыныр, укъыщытхъуныр къыригъэкIущтыгъэп. Мары джы сыкъыфэтхэ, ау мы къэстхырэм ушъхьагъоу фэхъугъэм гур егъэузы. Лъэшэу гухэкI Нурбый зэрэтхэкIыжьыгъэр. ЗымышIэрэ Адыгеим исыгъэп, зэкIэмэ агу къеуагъ. Къэбарыр сэ апэу къысэ-зыIуагъэр сикIал, ащ Нурбый дунаим зэрехыжьыгъэр дунэе хъытыум къырилъэ-гъуагъ. СикIалэ зэриIуагъэу, «нэкIмэзэ лъапIэм дунаим ехыгъэмэ, ар цIыф дэгъугъ». Ары зэрэщытыр ыкIи – уцIыфышIугъ, Нурбый.

Тхьэм джэнэтым ипчъэ къызфы- зэIуихыщтхэм ащыщ уешI.

ТIЭШЪУ Светлан, Адыгеим изаслуженнэ журналист.