Къэбар гухэкIышхо непэ къытлъыIэсыгъ — илъэс 40-м ехъурэ ыгуи ыпси етыгъэу, чэщи мафи имыIэу «Адыгэ макъэм» щылэжьэгъэ журналист IэпэIасэу, АР-м изаслуженнэ жур­налистэу ЕмтIылъ Нурбый мэлылъфэгъум и 6-м идунай ыхъожьыгъ.

Нурбый 1950-рэ илъэсым Iоныгъом и 10-м къуаджэу Щынджые къыщы­хъугъ. 1982-рэ илъэсым «Адыгэ макъэм» IофшIэныр щыригъэжьагъ, Адыгеим культурэм, спортым, искусствэм алъэ­ныкъокIэ гъэхъагъэу ышIыхэрэр итхыгъэхэм къащигъэлъагъощтыгъ.

Ом изытет, уахътэм ямылъытыгъэу сыд фэдэрэ Iофтхьабзэу республикэм щызэхащэхэрэм ар анэсыщтыгъ, ахэлажьэщтыгъ, а мэфэ дэдэми ахэм афэгъэхьыгъэ тхыгъэхэр къыгъэхьазырыщтыгъэх сурэтхэри ежь тырихыгъэ­хэу. ИIофшIэн шIу ылъэгъущтыгъ, «Адыгэ макъэр» ищыIэныгъэ хэпхынэу щытыгъэп, игъашIэ ащ фигъэлэжьагъ. Лъэпкъ гъэзетым изы нэкIубгъо мафэ къэс къызэригъэхьазырыщты­гъэм имызакъоу, общественнэ организа­циеу «Адыгэ Хасэм» илъэс зэкIэлъыкIохэм къыдигъэкIыщтыгъэ гъэзетэу «Гъуазэм» иредакторыгъ.

Нурбый Iофыгъо зэфэшъхьафхэу лъэпкъымкIэ мэхьанэ зиIэхэр гъэзет нэкIубгъохэм къащиIэтыщтыгъэх. Ахэм ащыщ Ным исаугъэт Мыекъуапэ щыгъэуцугъэн фаеу зэрилъытэщтыгъэр. IэкIыбым къикIыжьыгъэ тилъэпкъэгъухэр щыIэныгъэм зэрэхэгъозэ­жьы­хэрэм Нурбый лъэшэу ынаIэ теты­щтыгъ. Косово къыращыжьыгъэ тилъэпкъэгъу­хэм Адыгеим щыпсэухэу заублэм, лъэшэу алъыплъэщтыгъ, иныбджэгъубэ ахэм ахэт хъугъагъэ.

ИIофшIэнкIэ гъэхъагъэу иIэхэм апае тиIофшIэгъу щытхъубэ къылэжыгъ, анахь шъхьаIэу ащ ылъытэщтыгъэр жуналистикэм ылъэныкъокIэ АР-м и ЛIышъхьэ ишIухьафтын къызэрэфагъэ­шъошагъэр ары.

«Адыгэ макъэм» щылажьэхэрэм лъэшэу тыгу къеуагъ пшъыр зыфэдэр ымышIэу мафэ къэс хьалэлэу лажьэщтыгъэ Нурбый зэрэчIэтынагъэр, шIо­шъ­­гъэхъугъуай ар къытхэмытыжьэу. Нурбый игупсэхэм, иIахьылхэм тафэтхьаусыхэ, якъин адэтэгощы.