Iофтхьабзэу «ШIэжьым ичъыгхат» («Сад памяти») зыфиIорэм диштэу Адыгеим чъыг цIыкIухэр щагъэтIысхьагъэх.

Дунэе Iофтхьабзэм ия 4-рэ уцугъо гъэтхапэм и 18-м Урысыем щырагъэжьагъ. Хэгъэгум и Президентэу Владимир Путиным пшъэрылъ къызэрафишIыгъэм тетэу ар зэхащэ. Ежь Президентми Ржевскэ мемориалым дэжь чъыг щи­гъэтIыс­хьагъ. Дунаими, Урысыеми ащыпсэурэ нэбгырэ минишъэ пчъагъэ зыхэлэжьэщт Iофтхьабзэм Хэгъэгу зэошхом щыфэхыгъэ нэбгырэ пэпчъ те­лъытагъэу чъыг миллион 27-рэ щагъэтIысхьащт.

Iофтхьабзэм хэлажьэхэрэм Мыекъопэ районымкIэ псэупIэу Первомайскэм гъэсэныгъэм и Гупчэу дэтым пчэи, чъыгэе, туе 450-м ехъу щагъэтIысхьагъ.

«Илъэс къэс проектым хэлэжьэрэ ныбжьыкIэхэр нахьыбэ мэхъу. Ятэжъ пIашъэхэм лIы­хъужъныгъэшхо зэрэзэрахьагъэр ахэм ащы­гъупшэрэп. Iоф­тхьабзэм лIэужыбэ зэрепхы, советскэ цIыфхэм лIыгъэшхо зэрэзэрахьагъэр агу къегъэкIыжьы. Донбасс джыдэдэм щызэорэ дзэкIолIхэр тиджырэ лъэхъан илIыхъужъых, ахэми лъытэныгъэ афэшIыгъэныр атефэ. Джащ фэдэу къалэхэм нахьыбэу чъыгхэр ащыгъэтIысхьэгъэнхэми, мэз­хэр зыпкъ игъэуцожьыгъэнхэми мы Iофтхьабзэр афэIорышIэ. Интерактивнэ картэм зы­фэехэ шъолъырыр къыщыхагъэщызэ, официальнэ сайтымкIэ мы Iофтхьабзэм къыхэлэжьэнхэ алъэкIыщт», — къыIуагъ партиеу «Единэ Россием» и Генеральнэ совет хэтэу, Адыгеим и НыбжьыкIэ гвардие ипащэу, Мыекъуапэ икъэлэ думэ идепутатэу Бэрзэдж Асиет.