IофшIэн къафэгъотыгъэнымкIэ Урысые ермэлыкъэу «Работа России. Время возможностей» зыфиIорэм иапэрэ чэзыу мэлылъфэгъум и 14 — 15-м Адыгеим щыкIощт. Бизнес цIыкIумрэ гурытымрэ апылъхэри, корпорацие инхэу IофшIэн язытыхэрэри, IофшIапIэ лъыхъухэрэри ащ къекIолIэнхэ алъэкIыщт.

Республикэм IофшIэпIэ чIыпIэ нэкIэу иIэхэр ермэлыкъым къыщынэфэщтых. IофшIэн лъыхъухэрэм яIэпэIэсэныгъэ хагъэхъон, нэмыкI сэнэхьат аIэ къырагъэ­хьан зэралъэкIыщтыр, IофшIапIэ заштэхэкIэ е нэмыкI шъолъыр зыкощыжьхэкIэ къэралыгъо IэпыIэгъоу къаратыщтыр зэрагъэшIэнэу амал яIэщт. Мэлылъфэгъум и 14-м ермэлыкъыр мыщ фэдэ чIыпIэхэм ащыкIощт:

— къалэу Мыекъуапэ, ур. Краснооктябрьскэр, 1А (культурэм и Унэу «Гигант»);

— Адыгэкъал, Лениным иур., 12а;

— станицэу Джаджэ, Ушаковым иур., 29;

— Кощхьэблэ районыр, къуаджэу Кощхьабл, Лъэпкъхэм язэкъошныгъэ иур., 14/а;

— Красногвардейскэ районыр, селоу Красногвардейскэр, Лениным иур., 147;

— Мыекъопэ районыр, поселкэу Тульскэр, ур. Первомайскэр, 181;

— Тэхъутэмыкъое районыр, къуаджэу Тэхъутэмыкъуай, Хьахъуратэм иур., 65;

— Теуцожь районыр, къуаджэу Пэнэжьыкъуай, Лениным иур., 54;

— Шэуджэн районыр, къуаджэу Хьакурынэхьабл, Шэуджэным иур., 20.

2023-рэ илъэсым мэлылъфэгъум и 15-м сыхьатыр 10-м къыщегъэжьагъэу 1-м нэс ермэлыкъыр къалэу Мыекъуапэ иурамэу Пионерскэм тет унэу N 300-м (Къэралыгъо филармониер зычIэт унэм) щыкIощт.