Мэлылъфэгъум и 4-м чэщым сыхьатыр 12 хъункIэ такъикъ 20 иIэжьэу Теуцожь районым хэхьэрэ чъыгхэтэ псэупIэхэм псыр акIэхьагъ.

Сантиметрэ 20-м нэсэу унэ 15-мэ псыр арыхьагъ, псэупIэхэу «Здоровье» ыкIи «Дружба» зыцIэхэм яунэе дачэ чIыгу 60-мэ псыр акIэтыгъ. Щынэгъончъэным иIофыгъохэр зэрахьэхэзэ нэбгырэ 65-р псэупIэхэм къаращыхи, агъэ­кощыгъэх.

ОшIэ-дэмышIэ IофхэмкIэ къулыкъум АдыгеимкIэ и ГъэIорышIапIэ зэригъэ­унэфыгъэмкIэ, Краснодар псыубытыпIэм ипсыкIэгъэхъо рыкIуапIэ ишлюз псыр зэрэзэтыраIажэу хэтым иэлектрическэ Iахь зэрэкъутагъэм ар къыпкъырыкIыгъ.

Адыгеим и ЛIышъхьэ ынаIэ тетэу

Теуцожь районым къыщыхъугъэ ошIэ-дэмышIагъэм фэгъэхьыгъэ къэбарым КъумпIыл Мурат ежь ышъхьэкIэ ынаIэ тет. Оперативнэ штабым чIыпIэм Iоф щишIэным фэгъэхьыгъэ унашъо ащ зэкIэм къышIыгъ, ошIэ-дэмышIэ IофхэмкIэ къулыкъум, нэмыкIхэу мы Iофыгъом фэгъэзэгъэщтхэм Iоф зэдашIэнэу, цIыфхэу IэпыIэгъу щыкIэхэрэм ар арагъэгъотынэу пшъэрылъ афигъэуцугъ. Оперативнэ къулыкъу пстэуми чанэу яIоф зэрагъэцэкIагъэм ишIуагъэкIэ хъу­гъэ-шIагъэм къызыдихьын ылъэкIыщтыгъэ гумэкIыгъохэр охътэ кIэкIым агъэ­мэкIагъэх, чэщныкъом техническэ зэщыкъоныгъэр дагъэзыжьыгъ. Чъыгхэтэ псэупIэхэм адэс нэбгыри 100-м ателъы­тагъэу агъэкощынхэ фае хъумэ зэрэIуа­щыщтхэ автобусхэр ыкIи охътэ гъэнэфагъэрэ цIыфхэр зыщаIыгъыщтхэ чIыпIэхэр агъэхьазырыгъагъэх. Тыгъоспчэдыжь ехъулIэу щагу кIоцIхэмрэ унэхэмрэ псыр адэтыжьыгъэп, пстэури зэтеуцожьыгъ.

— ЦIыфхэм зэрарэу ахьыгъэр къэлъытэгъэным тегъэпсыхьэгъэ хэушъхьафыкIыгъэ комиссие зэхащэнэу унашъо афэсшIыгъ, щагу пэпчъ адахьэхэзэ псым иягъэу якIыгъэр дагъэзыжьынэу афэзгъэпытагъ, — къыIуагъ КъумпIыл Мурат.

Прокуратурэм Iофыр зэхефы

Адыгеим ипрокурор пшъэрылъ зэрэфишIыгъэм тетэу Теуцожь межрайон прокуратурэм зэхефы Краснодар псыубытыпIэм ипсыкIэгъэхъо рыкIуапIэ ишлюз псыр зэрэзэтыраIажэу хэтым иэлектрическэ Iахь зэрэкъутагъэм фэгъэхьыгъэ Iофыр.

— Къулыкъу пстэуми язе­кIуакIэ прокуратурэм уасэ къыфишIыщт ыкIи уплъэкIунхэм къагъэлъэгъощт зэфэхьысыжьхэм ялъытыгъэу унашъохэр ышIыщтых, — къыIуагъ Теуцожь межрайон прокурорым иIэпыIэгъу шъхьаIэу Ирина Кибиткинам.

Сурэтхэр: ошIэ-дэмышIэ IофхэмкIэ АР-м и ГъэIорышIапIэ ипресс-къулыкъу