Адыгеим и ЛIышъхьэу КъумпIыл Мурат пэщэныгъэ дызэрихьэзэ республикэм и Правительствэ зычIэт унэм зэхэщэкIо комитетэу «ТекIоныгъэм» изэхэсыгъо щыкIуагъ.

Зэхэсыгъом хэлэжьагъэх Адыгэ Рес­публикэм и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет и Тхьаматэу КIэрэщэ Анзаур, федеральнэ ыкIи рес­публикэ къулыкъухэм, дзэ комиссариатым, ветеранхэм я Совет, муниципальнэ образованиехэм япащэхэр.

Хэгъэгу зэошхом ТекIоныгъэр къызыщыдэтхыгъэм ия 78-рэ илъэс фэгъэ­хьыгъэ мэфэкI Iофтхьабзэхэм языфэгъэ­хьазырын, цIыфхэр жъугъэу зыхэлэжьэщтхэ Iофтхьабзэхэм язэхэщэн, мэфэкI мафэхэр щынэгъончъэу рекIокIынхэм япхыгъэ Iофыгъохэм атегущыIагъэх.

Республикэм и ЛIышъхьэ къызэрэхигъэщыгъэмкIэ, тихэгъэгу щыпсэурэ цIыф пстэухэмкIи ТекIоныгъэм и Мафэ мэхьанэшхо зиIэ мэфэкIэу щыт, арышъ, зэрифэшъуашэм тетэу республикэми ар щыхэгъэунэфыкIыгъэным ткIуачIэ етхьылIэным мэхьанэ иI.

«ТекIоныгъэшхом и Мафэ тихэгъэгу илIыхъужъ тарихъ итамыгъэу щыт, цIыф лъэпкъ зэфэшъхьафхэм языкIыныгъэ ащ къыушыхьатыгъ. Урысыем и Президентэу Владимир Путиным мызэу, мытIоу хигъэунэфыкIыгъ зэо илъэсхэм хэгъэгум ушэтыпIэ инхэр зэрэзэпичыгъэхэр, а ТекIоныгъэр къэзыгъэблэгъэгъэ пстэуми лIыхъужъныгъэу зэрахьагъэр тщымы­гъупшэныр зэрэтипшъэрылъыр. КъыткIэхъухьэхэрэми Хэгъэгу зэошхом щыгъозэнхэм, тицIыфхэм блэнагъэу зэрахьагъэм, нацизмэм зэрэтекIуагъэхэм афэгъэхьыгъэу шIэныгъэ гъэнэфагъэхэр ягъэгъотыгъэным тынаIэ тедгъэтын фае. Тыгу етыгъэу Iофтхьэбзэ пстэуми язэхэщэн текIолIэн фае», — къыIуагъ Къум­пIыл Мурат.

ХэушъхьафыкIыгъэу Адыгеим и ЛIышъхьэ чIыпIэхэм яIэшъхьэтетхэм пшъэрылъ афишIыгъ ТекIоныгъэм ия 78-рэ илъэс тегъэпсыхьэгъэ Iофтхьабзэ пэпчъ икъоу анаIэ тырагъэтынэу. АР-м цIыфхэр социальнэу ухъумэгъэнхэмкIэ и Министерствэ пшъэрылъ фишIыгъ мэфэкI шIухьафтынхэм ягъэхьазырын ынаIэ тыригъэтынэу. Ветеран пэпчъ фэгумэкIынхэу ащ пшъэрылъ къафигъэуцугъ. Ащ нэмыкIэу мэфэкIым епхыгъэу республикэм ыцIэкIэ ахъщэ аратынэу унашъо афи­шIыгъ. Хэгъэгу зэошхом хэлэжьагъэхэм, Ленинград къызадзыхьэ лъэхъаным ащ щыпсэущтыгъэхэм, концентрационнэ лагерьхэм адэсыгъэхэм сомэ мин 50 зырыз аIэкIагъэхьащт. НепэкIэ респуб­ликэм ахэм афэдэу нэбгыри 114-рэ щэпсэу. ФэгъэкIотэныгъэ зиIэ куп гъэнэ­фагъэхэм ахэхьэрэ нэбгырэ мин 1,3-м ехъумэ мэфэкIым ехъулIэу сомэ мини 5 зырыз аратыщт.

ЗэIукIэм илъэхъан псалъэхэр къашIыгъэх АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, АР-м культурэмкIэ иминистрэу Аулъэ Юрэ, Мые­къуапэ имэрэу Геннадий Митрофановым.

МэфэкIым изыфэгъэхьазырын ыкIи цIыфхэр жъугъэу зыхэлэжьэщтхэ культурэ, спорт, гъэсэныгъэм епхыгъэ Iоф­тхьабзэхэм ателъытэгъэ IофшIэныр непэ муниципалитет пстэуми ащаублагъ. Анахь шъхьаIэхэр, хабзэ зэрэхъугъэу, республикэм икъэлэ шъхьаIэ щыкIощтых. АР-м и Къэралыгъо филармоние мэфэкIым фэгъэхьыгъэ зэIукIэмрэ концертымрэ жъоныгъуакIэм и 5-м щыкIощтых. Республикэм иипподром жъоныгъуакIэм и 7-м шыгъачъэ щыкIощт. ТекIоныгъэм и Мафэ тефэу Мыекъуапэ игупчэ мемориал къэгъагъэхэр кIэлъыралъхьащтых, дзэкъулыкъушIэхэр, хэбзэухъумэкIо къулыкъухэм ялIыкIохэр ыкIи юнармейцэхэр къырыкIощтых.

ЗэрэгугъэхэрэмкIэ, анахь цIыфыбэ зыхэлэжьэщтыр «МыкIодыжьыщт полкыр» зыфиIорэ Iофтхьабзэр ары. Хабзэ зэ­рэхъугъэу, республикэм щыпсэурэ нэбгырэ мин пчъагъэ ащ хэлажьэ. Адыгеим къыщыхъугъэхэу Советскэ Союзым и ЛIыхъужъхэм, Щытхъум иорден къызыфагъэшъошагъэхэм ясурэтхэр аIыгъхэу юнармейцэ 58-рэ колоннэм ыпэ итыщтых. Мы Iофтхьабзэм хэлажьэхэрэм яIахьыл-ветеранхэм анэмыкIэу, хэушъхьафыкIыгъэ дзэ операцием хэлэжьэгъэ дзэкъылыкъушIэхэу фэхыгъэхэм ясурэт­хэри аIыгъын алъэкIыщт. Лениным ыцIэкIэ щыт пчэгум къыщырагъэжьэнышъ, урамхэу Краснооктябрьскэр —Пушкиныр — Гагариныр къыхиубытэхэу къэлэ паркым икъокIыпIэ лъэныкъо нэсыщтых. Ащ концертхэр ыкIи нэмыкI Iофтхьабзэхэр щыкIощтых, чIыпIэ 15-мэ заом илъэхъан агъэхьазырыщтыгъэ шхынхэр цIыфхэм щапагъохыщтых.

Мы мэфэ дэдэм пчыхьэм сыхьатыр 7-м зэрэ Урысые фэдэу Адыгеири зы такъикъэ шъыгъощт. Ащ нэужым Лениным ыцIэкIэ щыт гупчэм мэфэкI концертрэ мэшIоустхъорэ щыIэщтых. МэфэкIым къыдыхэлъытагъэу культурэм иучреждениехэм патриотизмэ нэшанэ зиIэ Iофтхьэбзэ 250-м ехъу зэшIуахынэу рахъухьагъ. Ахэм ахэхьэх щагухэм ащыкIощт концерт цIыкIухэр, АР-м и Сурэт къэгъэлъэгъуапIэ чIэлъхэм ащыщхэм, республикэм имузейхэм якъэ­гъэлъэгъонхэр, искусствэхэмкIэ кIэлэцIыкIу еджапIэхэм къашIыщтхэр, тхылъеджапIэм епхыгъэ зэIукIэгъоу щызэхащэщтхэр, коллектив зэфэшъхьафхэм къатыщт концертхэр ыкIи нэмыкIхэр. Культурэм и Унэу «Гигантым» къыпэIулъ чIыпIэ шъхьэихыгъэм Хэгъэгу зэошхом фэгъэхьыгъэ фильмхэм щяплъынхэ алъэ­кIыщт.

Мэлылъфэгъум и 20-м нэс респуб­ликэм икъэлэ шъхьаIэ щызекIорэ общественнэ транспортыр, джащ фэдэу скверхэр, цIыфхэм жъугъэу зызщагъэ­псэфырэ чIыпIэхэр къэралыгъо бзитIумкIэ тхыгъэ мэфэкI пкъыгъо зэфэ­шъхьафхэмкIэ агъэкIэрэкIэщтых.

Мы мафэхэм щынэгъончъэу цIыфхэм загъэпсэфыным пае АР-м и МВД иполицие ипащэ игуадзэу Андрей Федосеевым Iофтхьабзэу зэрахьащтхэм афэгъэхьыгъэу къыIотагъ. Ащ фэдэу цIыфхэр жъугъэу къызщызэрэугъоихэрэм хэбзэукъоныгъэхэр ащызэрамыхьанхэм мэхьанэшхо зэриIэр республикэм и ЛIышъхэ къыхигъэщыгъ. Къулыкъу пстэуми «народнэ дружинэкIэ» заджэхэрэм зэпхыныгъэ-зэдэлэжьэныгъэу адыряIэм изытет джыри зэ ауплъэкIужьын фае.

АР-м и ЛIышъхьэ ипресс-къулыкъу