МэфитIум — нэбгырибл

Зыгъэпсэфыгъо мафэхэм, мэлылъфэгъум и 1 — 2-м, Адыгеим игъогухэм хъугъэ-шIэ­гъитIу къатехъухьагъ, нэбгыри 2-мэ шъобж­хэр хахыгъэх.

ПIалъэу зигугъу къэтшIыгъэм тишъолъыр игъогухэм шъобж зыхамыхыгъэ аварие 16 щагъэунэфыгъ. Ахэр нахьыбэу зыщыхъугъэхэр Тэхъутэмыкъое районыр — 8 ыкIи къалэу Мыекъуапэ — 3.

Адыгеим и Къэралыгъо автоинспекцие къызэритыгъэмкIэ, хъугъэ-шIэгъи 5-мкIэ машинэхэм азыфагу илъын фэе зэпэчыжьагъэр аукъуагъ, 4-мэ зикIогъу автомобилыр благъэкIыгъэп, 1-р дэчъэхыгъ, 2-р щыт транспортым еутэкIыгъэх.

Зыгъэпсэфыгъо мэфитIум къыкIоцI гъогурыкIоным ишапхъэхэр аукъуагъэу хъугъэ-шIэгъэ 553-рэ полицейскэхэм къыхагъэщыгъ. Джащ фэдэу а пIалъэм къыкIоцI ешъуагъэу автомобилыр зезыфэщтыгъэ нэбгыри 7-мэ административнэ пшъэдэкIыжь атыралъхьагъ. Ахэр зыщагъэунэфыгъэхэр къалэу Мыекъуап ыкIи Тэхъутэмыкъое районыр.

ЛъэсрыкIо 21-мэ алъэныкъокIи протоколхэр атхыгъэх. Ахэр амыгъэунэфыгъэ чIыпIэхэм (анахьэу машинэхэр бэу зэрыкIохэрэм) гъогур ащызэпачыгъ.

ГъогурыкIоным ишапхъэхэр шIокI имыIэу агъэцэкIэнхэу Адыгеим и ГИБДД транспорт амалхэр зезыфэхэрэм закъыфегъазэ. Анахьэу мэзэхэ уахътэм сакъыныгъэ къызхагъэфэнэу, псынкIэу мызекIонхэу инспекторхэр къяджэх.

ТхыгъэхэмкIэ зафагъэзагъ

Адыгеим икъэралыгъо автоинспекторхэм ныбжьыкIэ инспекторхэр (ЮИД) ягъусэхэу «Водителым фэкIо» зыфиIорэ Iофтхьабзэр рагъэкIокIыгъ.

Апэрэ илъэсэп мы пэшIорыгъэшъ Iофтхьабзэр тишъолъыр зыщызэхащэрэр. КIэлэеджакIохэм ятхыгъэхэмкIэ, ясурэтшIыгъэхэмкIэ транспорт амалхэр зезыфэхэрэм зафагъазэ. ГъогурыкIоным ишапхъэхэр амыукъонхэу, сакъыныгъэ нахь къызхагъэфэнэу ныбжьыкIэхэр а шIыкIэм тетэу ахэм къяджэх.

Полицейскэхэм зэралъытэрэмкIэ, мыщ фэдэ Iоф­тхьабзэм ежь кIэлэцIыкIухэми макIэп шIуагъэу къыхахырэр. Ащ фэдэ тхыгъэхэр ныбжьыкIэхэм агъэхьазырыфэ творческэ егъэжьэпIэшIу яIэ зэрэхъурэм имызакъоу, гъогур щынэгъончъэным фыщытыкIэу фы­ряIэр мэпытэ, пшъэдэкIыжьэу ахьырэр нахь къагурыIо мэхъу.

Мыекъуапэ игимназиеу N 5-м иныбжьыкIэ инспекторхэм мыщ фэдэ Iофтхьабзэ къалэм игупчэ щызэхащагъ. Ахэм агъэхьазырыгъэ письмэхэр нахьыжъхэр ягъусэхэу водительхэм афагощыгъэх.

КIэлэцIыкIухэм ятхыгъэхэм лъэIоу итыгъэхэр: транспортыр зезыфэхэрэр ешъуагъэу рулым кIэрымытIыс­хьанхэр, псынкIэу мызекIонхэр, щынэгъончъагъэм ибгырыпх ыкIи хэушъхьафыкIыгъэ кIэлэцIыкIу тIысыпIэр агъэфедэнхэр, лъэсрыкIохэр блатIупщынхэр, гъэгурыкIоным хэлэжьэрэ пстэуми лъытэныгъэ зыфашIыныр.

Къыхэдгъэщымэ тшIоигъу ныбжьыкIэхэм рагъэкIокIыгъэ Iофтхьабзэм водительхэр шIукIэ къызэрэпэгъокIыгъэхэр. КIэлэцIыкIухэм яписьмэхэм яджагъэх ыкIи итхэгъэ ушъыйхэм ашIомыкIынхэу къагъэгугъагъэх.

Волонтер— медикхэр къыфэ­джагъэх

Ны-ты ныбжьыкIэхэу автомобилыр зезыфэхэрэм хэушъхьафыкIыгъэ кIэлэцIыкIу тIысыпIэр ыкIи щынэгъончъагъэм ибгы­рыпх зэрагъэфедэнхэ фаер тхьамафэ къэс полицейскэхэм агу къагъэкIыжьы. Ащ епхыгъэ Iофтхьабзэ бэмышIэу Мыекъопэ медицинэ колледжым истудентхэм къэлэ гупчэм щызэхащэгъагъ.

Автомобилыр ошIэ-дэмышIэу къызызэтырагъэуцокIэ къыхэкIын ылъэкIыщт тхьамыкIагъохэр, ащ фэдэ чIыпIэм сабыим шъобжхэр тещагъэ мыхъуным хэушъхьа­фыкIыгъэ тIысыпIэм мэхьанэ зэриIэр волонтер-медикхэм водительхэм къафаIотагъ.

Студентхэм анаIэ зытырагъэтыгъэр хэушъхьафыкIыгъэ кIэлэцIыкIу тIысыпIэр автомобилым зэрибгъэу­цон фаер ыкIи емыжьэхэзэ сабыир тэрэзэу рапхыхьагъэмэ еплъынхэу зэрэщытыр ары. Ащ дакIоу автомобилыр зезыфэхэрэм щынэгъончъэ бгырыпхыр ащымыгъуп­шэу зытыралъхьан зэрэфаер, ащкIэ къакIэхъухьэрэм щысэ арагъэлъэгъунэу зэрэщытыр къэралыгъо автоинспекторхэм агу къагъэ­кIыжьыгъ.

ЗэдэгущыIэгъум икIэухым кIэлэцIыкIухэр зезыщэхэрэ водительхэм шIокI имыIэу гъогурыкIоным ишапхъэхэр агъэцэкIэнхэу, тыдэ кIощтхэми ом изытет къыдалъытэ­ныр зыщамыгъэ­гъупшэным Iофтхьабзэм изэхэщакIохэр къыфэджагъэх.

КIэлэеджакIохэм заIуагъэкIагъ

Еджэгъу уахътэм къы­хэфэрэ зыгъэпсэфыгъо л­ъэхъанхэм кIэлэцIыкIухэм ыкIи Iэта­хъохэм ящынэгъончъагъэ къэухъумэгъэныр къэралыгъо автоинспекторхэр анахь зыгъэгумэкIырэ Iофыгъо­хэм ащыщ. Ащ епхыгъэу ны-тыхэм бэрэ зэдэгущыIэгъухэр адашIых.

КIэлэцIыкIухэм ягъэтхэ зыгъэпсэфыгъо мафэхэм атефэу гъогу полицейскэхэм зыныбжь имыкъугъэхэм яIофхэмкIэ инспекторхэр ягъусэхэу Джэджэ районым ны-тыхэм зэIукIэгъу ащафызэхащагъ.

Автоинспекторхэм ащ къызэрэщыхагъэщыгъэмкIэ, машинэхэр зэрыкIохэрэ гъогум хэукъоныгъэ зэ­фэ­шъхьаф­хэр ныбжьыкIэхэм щызэрахьэх, чIыпIэ зэжъу­хэм арыфэхэу мэхъух. Джащ фэдэу зыныбжь имыкъугъэ кIэлэцIыкIухэм хэбзэукъоныгъэу ыкIи бзэджэшIагъэу зэрахьэхэрэмкIэ ны-тыхэм пшъэдэкIыжьэу яIэр полицейскэхэм къаIотагъ.

Джыри темэ шъхьаIэу зытегущыIагъэхэм ащыщ кушъхьэфачъэр ыкIи мобильнэ транспорт амалхэр Iэтахъохэм зэрэзэрафэхэрэр. Ащ фыкъоныгъэхэр хамыхынхэм фэшI ныбжьыкIэхэр зэрэзекIонхэ фаер инспекторхэм къаIотагъ.

ЗэIукIэгъум зэфэхьысыжь фашIызэ, ныбжь зиIэхэм гъогурыкIоным ишапхъэхэр шIокI имыIэу зэрагъэцакIэрэмкIэ якIэлэцIыкIухэмкIэ щысэтехыпIэхэу щытынхэу хэбзэухъумакIохэм закъыфагъэзагъ.

ЦIыфхэр щынэ­гъончъэу зэращэнхэм фэIорышIагъ

ЦIыфхэр зезыщэхэрэ автотранспорт предприятиехэм ялIыкIохэм Адыгеим икъэралыгъо автоинспекторхэр аIукIагъэх.

Тэхъутэмыкъое районым цIыфхэр щызезыщэрэ автобусхэм ящынэгъончъагъэ ыкIи язытет шапхъэхэм адештэхэмэ инспекторхэм ауплъэкIугъэх.

ЗэдэгущыIэгъум илъэхъан полицейскэхэм анахьэу анаIэ зытырагъэтыгъэр гъогурыкIоным ишапхъэхэр зэрагъэцакIэхэрэр ары, сыда пIомэ цIыфхэр зезыщэрэ автотранспортым илажьэкIэ хъурэ гъогу хъугъэ-шIагъэ­хэр ащ занкIэу япхыгъэх.

Водительхэм яавтобусхэм акIоцI щынэгъончъэ бгырыпххэр, тахограф ыкIи видеорегистратор зэрарытынхэ фаер агу къагъэ­кIыжьыгъ.

Общественнэ транспортыр зыгъэфедэрэ цIыфхэм ящыIэныгъэ мыхэр зезыщэрэ водительхэм язекIуа­кIэ зэрепхыгъэм къыхэкIыкIэ автобусхэр къызы­дагъэ­кIыгъэ илъэсым лъыплъэнхэм полицейскэхэр къыфэджагъэх. Джащ фэдэу щынэгъончъа­гъэм ишапхъэу агъэ­цэкIэнхэ фаехэр автобусхэм яводительхэм къафаIотагъэх.

Iэшъынэ Сусанн. Сурэтхэр: Къэралыгъо автоинспекциер.