Мыекъопэ къэралыгъо технологическэ университетым итхылъеджапIэ биологие шIэныгъэхэмкIэ докторэу, профессорэу, мы апшъэрэ еджапIэм чIыгум игъэфедэнкIэ икафедрэ ипащэу Iэшъынэ Юныс итхылъэу «Габукай — Теучежхабль» зыфиIорэм илъэтегъэуцо щыкIуагъ.

Iофтхьабзэр къызэIуихыгъ университетым ипрезидентэу, профессорэу ТхьакIущынэ Ас­лъан. Ащ къызэриIуагъэмкIэ, Iэшъынэ Юныс апшъэрэ еджапIэм икафедрэ ипащэу илъэс пчъагъэ хъугъэ Iоф зишIэрэр, шIэныгъэ куу зыIэкIэлъ спе­циалист хъугъэ пчъагъэ ригъэ­джагъ. Университетым хэхъоныгъэхэр ышIынхэм иIахьышIу зэрэхэлъыр къыхигъэщыгъ.

ШIэныгъэхэмкIэ Урысые Академием иакадемикэу, Пшызэ IофшIэнымкIэ и ЛIыхъужъэу, тхылъыр зытхыгъэ Iэшъынэ Юныс икIэлэегъаджэу Шэуджэн Асхьад нэужым гущыIэ ратыгъ. Ащ къызэриIуагъэмкIэ, Юныс шIэныгъэ дэгъу иI, IофшIэкIэ амал инхэр IэкIэлъ хъугъэ, сыдым фежьагъэми, лъэшэу егугъу, ащ къыхэкIыкIэ гъэхъэгъэшIухэр ешIых.

— Тхылъым купкI дэгъу иI. Ар бзитIукIэ тхыгъэ, ащ къы­хэкIыкIэ еджэщтхэм япчъагъэ хэхъощт. Гъобэкъуае къыкIугъэ гъогур, ащ цIыфэу дэсхэр зэрэ­лэжьакIохэр, сыдигъуи уахътэм диштэу зэрэщыIэхэр, Хэгъэгу зэошхом къоджэдэсхэр псэемы­блэжьэу зэрэхэлэжьагъэхэр, зэо ужым щыIэкIэ гупсэфыр зэрагъотыжьыгъэр, лъэныкъо зэ­фэшъхьафхэмкIэ шIэныгъэ куу зы­IэкIэлъ, цIэрыIо хъугъэ цIыфы­бэ къуаджэм къызэрэдэкIыгъэр мы тхылъым къеушыхьаты, — къыIуагъ А. Шэуджэным.

Биологие шIэныгъэхэмкIэ докторым итхылъэу 2021-рэ илъэсым къыдэкIыгъэм гъэ­шIэгъонэу бэ дэтыр, къызщы­хъугъэ Гъобэкъуае итарихъ къыщегъэжьагъэу непэрэ ма­фэхэм анэсыжьэу. Iофтхьабзэм къекIолIагъэхэм къызэраIуагъэм­кIэ, Iэшъынэ Юныс итхылъ анахь къахэзыгъэщырэр цIыф къызэрыкIохэм, мэкъумэщышIэхэм къызэратегущыIэрэр ары.

— Тхылъыр дэгъоу зэхэгъэуцуагъ. КъыткIэхъухьэрэ лIэуж-хэм ягъэсэныгъэ-пIуныгъэкIэ, яхэгъэгу шIу алъэгъоу къэтэ­джынхэмкIэ амалышIоу щыт. ЫпэкIи гъэхъагъэхэр ышIыхэзэ иIофшIэн хигъэхъонэу фэтэIо, — еIо Адыгэ Республикэм инахьыжъхэм я Совет итхьаматэу ГъукIэлI Нурбый.

Общественнэ движениеу «Адыгэ Хасэм» итхьаматэу ЛIымыщэкъо Рэмэзан, зэлъа­шIэрэ сурэтышI-модельерэу, АР-м культурэмкIэ заслуженнэ IофышIэу СтIашъу Юрэ, Гъобэ­къуае къыщыхъугъэу, шъхьадж зыфэгъэзагъэмкIэ гъэхъэгъэшIухэр зышIыхэу Iофтхьабзэм къекIолIагъэхэм гущыIэ фабэхэр авторым къыфаIуагъ. Тхы­лъыр зэрэIофшIэгъэ иныр, къуа­джэмкIэ егъэшIэрэ саугъэтэу ар зэрэщытыщтыр ахэм къа­Iуагъ.

МэфэкI лъэтегъэуцор къагъэ­дэхагъ Гъобэкъуае дэт культурэм и Унэ ифольклорнэ ансамблэу «Лащын» зыфиIорэм иорэдыIохэмрэ ансамблэу «Нар­тым» икъэшъуакIохэмрэ.

Тхылъым иугъоин IэшIэхы­гъэп, илъэси 4-м ехъум ыгу етыгъэу Iоф дишIагъ. IофшIэнышхо зэшIуихыгъ авторым. Хъарзынэщым къыщигъотыгъэ­хэм ямызакъоу, къоджэдэсхэм гущыIэгъу афэхъузэ материал гъэшIэгъоныбэ къыугъоигъ, шэп­хъэшIу иIэу зэхигъэуцуагъ.

Iэшъынэ Юныс лъэтегъэуцом ыкIэм къекIолIагъэхэм закъыфигъэзагъ ыкIи тхылъым игъэ­хьазырынкIэ IэпыIэгъу къыфэ­хъугъэхэм зэрафэразэр къы­Iуагъ. Джащ фэдэу апшъэрэ еджапIэм ипрезидентэу, профессорэу ТхьакIущынэ Аслъан, ректорэу Къуижъ Саидэ мыщ фэдэ Iофтхьабзэ зэхащэн амал къызэрэратыгъэм фэшI «тхьа­шъуегъэпсэу ариIуагъ.

ДЕЛЭКЪО Анет. Сурэтхэр Iэшъынэ Аслъан ты­рихыгъэх.