ЦIыфыр дунаим къызытехъокIэ апэрэ лъэбэкъур езыгъэдзырэр, дунэе дахэм тезыщэхэрэр нымрэ тымрэ. Ащ ыуж цIыфым ищыIэныгъэ гъогу апэрэ чIыпIэр щызыубытырэр еджапIэр, хьалэлэу зиIоф зыгъэцэкIэрэ кIэлэегъаджэу чIэтхэр ары.

ЦIыфым сыд фэдиз ыгъэшIагъэми, игукъэкIыжьхэм ахэт зыщеджэгъэ еджапIэр. Тэри, зэдеджагъэхэмкIэ, тызэIукIэми, тызэхахьэми тыгу имыкIэу тезгъэджагъэхэм дахэкIэ, шIукIэ ягугъу тэшIы. 2023-рэ илъэ­сыр — егъэджэкIо-гъэсакIом и Илъэс. Ащ епхыгъэу игугъу къэсшIы сшIоигъу сичылэ гупсэу, шIэныгъэ-гъэсэныгъэ зыщызгъотыгъэ Щынджые дэт гурыт еджапIэм.

1970-рэ илъэсым Щынджые гурыт еджапIэр, 1975-рэ илъэсым къалэу Налщык дэт Къэ-­бэртэе-Бэлъкъар университетыр къэсыухыгъэх, хьисапымкIэ кIэ­лэегъаджэу илъэс 40-м сисэнэхьат сырылэжьагъ. Илъэс 30-м ехъурэ Хьакурынэхьаблэ дэт кIэлэцIыкIу-интернатым Iоф щысшIагъ.

Нымрэ тымрэ ауж сабыир зыфэдэ хъущтыр бэкIэ зэлъытыгъэр шIэныгъэ гъогум тезыщэщт иапэрэ кIэлэегъадж ары. Непэ дахэкIэ зигугъу къэсшIымэ сшIоигъомэ апэ изгъэуцорэр ублэпIэ классым сыщезгъэджагъэу, шIэныгъэ гъогум сытезыщагъэу, зэфыщытыкIэ дахэм, гукIэгъум, лъытэныгъэм уасэ афэтэзыгъэшIыгъэ Хэшх Хъа­джэт Алый ыпхъур ары. Итеплъэ дахэ, игущыIэ шъабэ, иIэдэб, ыгу ифэбагъэ бэрэ сыгу къэ­кIыжьых.

Сэнэхьатэу хэсхыгъэр шIу сэзыгъэлъэгъугъэр Талъэкъо (Батмэн) Саният Джанкъылыщ ыпхъур ары. НэгушъхьитIур къыхихэу, ымакъэ шъабэу, къы­Iуатэрэр IупкIэу къыдгуригъа- Iоу, исэнэхьат шIу зэрилъэгъу­рэр къыхэщэу щытыгъ. ЗишIэныгъэ хэзыгъахъо зышIоигъом, урокыр къызыгурымыIуагъэми емызэщэу Iоф адишIэщтыгъ. Гъыщ (ЕмтIылъ) Муслъимэт Уцужьыкъо ыпхъум урысыбзэмкIэ сыригъэджагъ. Сэмэркъэу хэлъэу, мыхъун къыпхэфагъэми, игъэсэпэтхыдэхэм уагъэу­кIытэжьэу къытхэтыгъ. Иурок къэ­IотакIэ сишъыпкъэу седэIущтыгъ, тхылъри шIу сигъэлъэгъугъ. Орэд къэIонымкIэ урокыр тэзыгъэхьын щымыIэу Мус­лъимэт ари дихьыщтыгъ. Сабыймэ афэгъэхьыгъи, хэгъэгум идэхагъэ, ибаиныгъэ, илъэшыгъэ къизыIотыкIырэ орэдхэри тигъашIэщтыгъэх. Непэ къызнэ­сыгъэм ахэр сыгу къэкIыжьых. Ахэм анэмыкIэу бэмэ ягугъу къэтшIын тлъэкIыщт: Цуекъо

Г. Х., Талъэкъо Д. Д., Ожъуба­нэкъо С. Ч., Хэшх К. И. (Тхьэм джэнэтыр къарет). ЕмтIылъ Разиет Хьаджбирам ыпхъур зэлъашIэрэ шIэныгъэлэжь, тхылъ къыдэгъэкIыгъэхэри иIэх, дахэкIи игугъу арегъэшIы, ригъэ­джагъэхэмкIи тыфэраз.

Тэ тилъэхъан тишIэныгъэ зэ­рэхэдгъэхъон амалэу щыIагъэр тхылъымрэ кIэлэегъаджэмрэ. Непэрэ кIэлэегъаджэхэм нахь къин алъэгъоу сэлъытэ. КIэлэ­еджакIохэм яшIэныгъэхэм ахагъэхъонымкIэ икъу фэдизэу ама­лэу яIэр агъэфедэрэп.

ЕджапIэм имызакъоу, ны­-тыхэри якIэлэцIыкIухэр гъогу занкIэ техьанхэм, кIэлэегъа­джэм, нахьыжъхэм лъытэны­гъэрэ шъхьэкIэфэныгъэрэ афашIэу пIугъэнхэм пылъын- хэ фае.

Непэ еджапIэхэм аIутхэм сафэлъаIо якIэлэеджакIохэр хэгъэгум ицIыф чанхэу, шIу­лъэгъуныгъэрэ гукIэгъурэ ахэлъэу, яжъыхэр агъашIоу, алъы­тэу къэтэджынхэу, псауныгъэ пытэ яIэу бэрэ щыIэнхэу.

Тиуашъо къаргъоу, тилэ­жьыгъэ бэгъуагъэу, тиунагъомэ дэр­мэныр арылъэу, мамыр жъуагъор мыкIуасэу бэрэ Тхьэм тыщегъаIэх!

М. А. Къадыр. Хьакурынэхьабль.