Монополием пэшIуекIорэ федеральнэ къулыкъум и ГъэIорышIапIэу Адыгэ Республикэм щыIэм 2022-рэ илъэсым Iоф зэришIагъэр зыщызэфахьысыжьыгъэ пресс-конференцие зэхищагъ. Ар зэрищагъ ГъэIорышIапIэм ипащэу ХьапэкIэ Аслъан.

Пэублэм пащэм къызэри­IуагъэмкIэ, хэбзэгъэуцугъэм къыдилъытэрэ лъэныкъо пстэури гъэцэкIэгъэным, рекламэм, къэралыгъо ыкIи муниципальнэ фэIо-фашIэхэмкIэ заказхэр, нэмыкIхэри зэшIохыгъэнхэм лъыплъэгъэныр 2022-рэ илъэсым монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ ипшъэ­рылъ шъхьэIагъ. Джащ фэдэу мы федеральнэ къулыкъум ес­тественнэ монополиехэм Iоф зэрашIэрэми гъунэ лъефы. А IофшIэныр зыфытегъэпсыхьа-­гъэр ахэм къыдагъэкIырэ товар­хэр, агъэцэкIэрэ фэIо-фа­шIэхэр къызIэкIагъэхьанхэмкIэ зэкIэми зэфэдэ амал яIэныр ары.

ГъэIорышIапIэм анахьэу ынаIэ зытыригъэтыгъэр унэе предпринимательхэм, хъызмэт субъектхэм ядэо тхылъхэм ахэ­плъэгъэныр ыкIи зэхэфыгъэнхэр ары. Джащ фэдэу респуб­ликэм экономикэ хэхъоныгъэхэр ышIынхэмкIэ зиягъэ къэ­кIорэ ыкIи зэнэкъокъу шIыкIэр тэрэзэу зымыгъэфедэрэ пстэуми пшъэдэкIыжь ягъэхьыгъэным, гъэцэкIэкIо хэбзэ къулыкъухэм, чIыпIэ зыгъэIорышIэ­жьыпIэхэм япшъэрылъхэр шIуа­гъэ къытэу агъэцэкIэнхэм мэхьанэшхо ратыгъ.

2022-рэ илъэсым юридическэ ыкIи физическэ цIыфхэм ядэо ыкIи лъэIу тхылъ 395-рэ къулыкъум къыIэкIэхьагъ. Административнэ пшъэдэкIыжь зэрарагъэхьыщтым епхыгъэ унэшъо 340-рэ ышIыгъ. Сомэ миллиони 5-м ехъурэ тазырыр къарагъэтыжьыгъ.

Монополием пэшIуекIорэ хэ­бзэгъэуцугъэр зэрагъэца­кIэ­рэм ылъэныкъокIэ ГъэIорышIапIэм уплъэкIунхэр зэхищагъэх. Хэу­къоныгъэ анахь инхэу къыха­гъэщыхэрэм ащыщых сатыум ылъэныкъокIэ хэбзэгъэуцугъэр укъуагъэ зэрэхъугъэр, цIыфхэм ыкIи бизнесым пылъхэм яхъыз­мэтхэр электрическэ сетьхэм арапхынхэмкIэ шапхъэхэр гъэцэкIэгъэнхэр, псэупIэ-коммунальнэ хъызмэтым иIофыгъохэр, нэмыкIхэри. Мы лъэны­къохэмкIэ хэукъоныгъэу къыхагъэщыгъэхэр дэгъэзыжьыгъэнхэмкIэ унашъохэр афишIыгъэх.

Административнэ тазырхэр зытыралъхьагъэхэм ащыщых пшъэдэкIыжьэу ахьырэмкIэ гъу­нэпкъэ гъэнэфагъэ зиIэ обществэхэу «Оргтехсервис», «Майкопская ТЭЦ», «Россети Кубань» зыфиIохэрэр.

ГущыIэм пае, медицинэ оборудованиер ыкIи пкъыгъохэр Краснодар краим ыкIи Адыгеим ямедицинэ учреждениехэм аIэкIэгъэхьэгъэнхэмкIэ хъызмэт субъектхэр зэкъуахьэхи, зэнэ­къокъоу зэхащагъэм уасэр щы­зэдаштагъ. УФ-м и Апшъэрэ хьыкум хъызмэтшIэпIэ субъект­хэм зэдашIыгъэ зэзэгъыныгъэр хэукъоныгъэу ылъытагъ.

Джащ фэдэу «Россети Кубань» зыфиIорэ организацием ылъэныкъокIэ 2022-рэ илъэсым къулыкъум даоу къыIэкIэхьа­гъэхэм ахэхъуагъ. ГущыIэм пае, электрическэ сетьхэм запа­шIэным иIофыгъохэм ыкIи ащ тефэщт уасэр тэрэзэу къызэрамылъытагъэм япхыгъэу дэуи 120-рэ ГъэIорышIапIэм къы­IэкIэхьагъ. Мы лъэныкъомкIэ унэшъо 77-рэ ашIыгъ, хабзэр зыукъуагъэхэм тазырэу сомэ миллион 47-м ехъу атыралъ­хьагъ.

РекламэмкIэ монополием пэшIуекIорэ хэбзэгъэуцугъэр аукъуагъэу блэкIыгъэ илъэсым даоу къыIэкIэхьагъэм ипчъа­гъэ къеIыхыгъ. Федеральнэ къулыкъум уасэхэмкIэ ГъэIорышIапIэм зэпхыныгъэ пытэ дыриI. ХъызмэтшIапIэхэм унэе предприятие инхэм, гъэцэкIэкIо хэ­бзэ ыкIи чIыпIэ зыгъэIоры­шIэжьынымкIэ къулыкъухэм ядэо тхылъхэм язэхэфын Гъэ­IорышIапIэм лъэшэу ынаIэ тырегъэты. Джащ фэдэу гъэстыныпхъэ шхъуантIэм, углево­до­роднэ газым ыкIи гъомылап­хъэхэм ащыщхэм ауасэхэр къа­мыIэтынхэм фытегъэпсыхьэгъэ уплъэкIунхэр зэхещэх.

Журналистхэм яупчIэхэм яджэуапхэр къаритыжьызэ ХьапэкIэ Аслъан къызэриIуагъэмкIэ, цIыфым ипсауныгъэкIэ анахь ищыкIэгъэ медицинэ пкъыгъохэм ыкIи Iэзэгъу уцхэм я Перечень хэмыхьэхэрэм ауасэ къэралыгъо екIолIакIэ иIэу гъэпсыгъэным фэIорышIэрэ программэм Iоф ешIэ. Ащ къызэригъэнафэрэмкIэ, гущыIэм пае, мазэм къыкIоцI мыщ фэдэ медицинэ пкъыгъо­хэм ыкIи Iэзэгъу уцхэм ауасэ процент 30-м е ащ ехъоу къазыхахъокIэ, къэралыгъом фи­тыныгъэ иI ежь уасэр ыгъэ­нэфэнэу ыкIи тедзэхэр фи­шIынхэу.

УФ-м и Правительствэ монополием пэшIуекIорэ Федеральнэ къулыкъум пшъэрылъ зэрэфишIыгъэу Урысыем промышленностымкIэ ыкIи сатыушIынымкIэ, джащ фэдэу мэ­къу-мэщымкIэ иминистерствэхэм социальнэ мэхьанэ зиIэ гъомылапхъэу тегъахъо зыфэ­пшIы мыхъущтхэр къыгъэнэ­фагъэх. Монополием пэшIуекIогъэнымкIэ Федеральнэ къулыкъум зэрилъытэрэмкIэ, социальнэ мэхьанэ зиIэ гъомылапхъэхэм тегъахъо афэшIыгъэнымкIэ узышIокIы мыхъущт гъу­напкъэхэр зэрагъэнэфагъэм ишIуагъэкIэ цIыфхэм зыпари пэрыохъу къафэмыхъоу анахь ящыкIэгъэщт продукциер зэрагъэгъотын алъэкIыщт.

КIАРЭ Фатим.