Урысые Федерацием и Президентэу Владимир Путиныр Хэгъэгум иухъумакIохэм атегъэпсыхьэгъэ къэралыгъо фонд шъхьаф Урысыем зэрэщызэхащэщтым ехьылIэгъэ Указым бэмышIэу кIэтхэжьыгъ. Ар зыфэгъэзэгъэщтыр хэушъхьафыкIыгъэ дзэ операцием иветеранхэм, 2014-рэ илъэсым къыщегъэжьагъэу Донбасс щыкIорэ зэпэуцужьхэм ахэлажьэхэрэм, дзэкъулыкъушIэу фэхыгъэхэм яунагъохэм IэпыIэгъу ягъэгъотыгъэныр ары. Фондым икъутамэ Адыгеими щызэхащэщт.

«Къутамэм изэхэщэн тыфежьэгъах. Мыекъуапэ игупчэ ар зычIэтыщт унэр къыщыдгъотыгъ, мы охътэ благъэм ащ игъэцэкIэжьын ыуж тихьащт. Юридическэ, психологическэ, социальнэ-медицинэ IэпыIэгъу языгъэгъотыщт, щыIэныгъэм хэгъэгъозэгъэнхэмкIэ, псауныгъэр зыпкъ игъэуцожьыгъэнымкIэ фэIо-фашIэхэр зыщызэхащэщт кабинетхэр ащ хэтыщтых. Мэкъуогъум и 1-м ехъулIэу фондым икъутамэ къызэIутхын тимурад. Ау ащ нахь пасэу иIофшIэн ригъэжьэщт. Мыекъуапэ социальнэ ухъумэнымкIэ игупчэ пIалъэ горэкIэ фондыр чIэтыщт. Къутамэм Iоф щызышIэщтхэм якъыхэхын джыдэдэм макIо. Республикэм ирайон гупчэ пстэуми ащ фэдэ IофшIэныр ащэкIо», — къыIуагъ КъумпIыл Мурат.

Адыгеим и ЛIышъхьэ АР-м IофшIэнымрэ социальнэ хэхъоныгъэмрэкIэ и Министерствэ пшъэрылъ фишIыгъ фондым ипшъэрылъхэу хэгъэгум и Президент Указым къыщигъэнэфагъэхэм ягъэцэкIэнкIэ ищыкIэгъэ амалхэр зэрихьанхэу.

Хэгъэгум иухъумакIохэм атегъэ­псы­хьэгъэ къэралыгъо фондым ишъолъыр къутамэ Iоф ышIэу зыригъажьэкIэ, чIыпIэ пчъагъэм мыкIохэу, зырамыгъэу­кIыхьэу яIофыгъохэр зы чIыпIэм щызэхафын алъэкIыщт. Зыкъызэрафа­гъэзэрэ тхылъ пэпчъ зэшIуахыфэ социальнэ гъэзекIуакIом гъунэ лъифыщт.

«Мы лъэныкъомкIэ Iоф зэрэтшIэщт шIыкIэ-амалхэр тIэ къидгъэхьагъэх, хэушъхьафыкIыгъэ дзэ операцием хэла­жьэхэрэм ыкIи ахэм яунагъохэм Iэпы­Iэгъу зэрафэхъущтхэ амалхэр агъэнэфагъэх, ахэм яIофыгъохэм язэшIохын яшъыпкъэу екIуалIэх. «Единэ Россием» ишъолъыр къутамэрэ волонтерхэмрэ тидзэкIолIхэм, ахэм яунагъохэм, егъэзы­гъэкIэ Украинэр къэзыбгынэн фаеу хъугъэ­хэм, Херсон хэкум и Геническэ район исхэм IэпыIэгъу ягъэгъотыгъэнымкIэ шIушIэ Iофтхьабзэхэм чанэу ахэла­жьэх, ащкIэ проектхэм кIэщакIо афэхъух. Хэгъэгум иухъумакIохэм атегъэпсыхьэгъэ фондыр зызэхащэкIэ, мы лъэныкъомкIэ республикэм нахь Iоф­тхьэбзабэ зэрэщызэрахьащтым, ыпшъэ­кIэ зигугъу къэтшIыгъэхэм ящыкIэгъэ IэпыIэгъур псынкIэу агъотын зэралъэ­кIыщтым сицыхьэ телъ», — къыкIи­гъэтхъыгъ КъумпIыл Мурат.