Шъолъырхэм къарыкIыгъэ ныбжьыкIэ пэрытхэр зыхэлэ­жьэ­хэрэ этнокультурнэ форумэу «Адыгэ къуадж» зыфиIорэр Адыгеим непэ къыщызэIуахыгъ. ПсэупIэу Дахъом дэт зыгъэпсэфыпIэхэм ащыщ ныбжьыкIэ зэхахьэм къагъэкIогъэ лIыкIохэр къыщызэфэсыгъэх.

Культурнэ Iофтхьабзэхэм я Президент фонд игрант IэпыIэгъукIэ проектыр зэшIуахы. Урысыем ишъолъыр 12-мэ къа­рыкIыгъэ ныбжьыкIэ 40 ащ хэлажьэ. Урысыем иныбжьыкIэхэм я Союз хэтхэр, къэралыгъом ит апшъэрэ еджэпIэ зэфэшъхьафхэм ацIэкIэ къэкIуагъэхэри щыIэх. Москва, Санкт-Петербург, Севастополь, Астрахань, Ростов, Краснодар краим, Къэбэртэе-Бэлъкъарым, Къэрэщэе- Щэрджэсым, Къалмыкъ ыкIи Чэчэн республикэхэм, Дагъыстан, Ставрополь краим яныбжьыкIэ пэрытхэу Адыгеим къэкIуагъэхэр нэIуасэ зэрэзэфэхъущтхэм имызакъоу, къэралыгъо грантхэм якъи­хын, ахэм уазэрэдэлэжьэн фаем афэгъэхьыгъэ десэхэр арагъэкIущтых. ЗэгурыIоныгъэм, зэдэлэжьэныгъэм фэлэжьэрэ зэхахьэм ныбжьыкIэхэр проект зэхэтхэм язэшIохын кIэгъэгушIугъэнхэр пшъэрылъэу иIэхэм ащыщ. ЦIыфхэм IэпыIэгъу ягъэгъотыгъэнымкIэ Адыгеим иресурснэ Гупчэ форумым изэхэщэн кIэщакIо фэхъугъ. Ежь проектыр зигу­къэкIыр АР-м IофшIэнымкIэ ыкIи социальнэ хэхъоныгъэмкIэ и Министерствэ социальнэ фэIо-фашIэхэмкIэ иотдел ипащэу ЦIыпIынэ Жанет.

«ХэзгъэунэфыкIынэу сызыфаер — амалэу тиIэхэр тиныбжьыкIэхэм ядгъэшIэн фае. Тикультурэ ибаигъэ нэмыкI шъолъырхэм къарыкIыгъэхэми лъэшэу ашIогъэшIэгъон. Тишэн-хабзэхэр, тизэхэтыкIэ, тинахьыжъхэм къыднагъэсыжьыгъэ пстэур тэ ныбжьыкIэхэм джы ядгъэ­шIэн, ахэтлъхьан фае. Къалэм щыпсэухэрэм ямызакъоу, адыгэ чылэхэми лъэпкъым икультурэ идышъэ кIэн ащы­ухъумагъ. Ахэр къэдгъэлъагъозэ зэхэтыкIэ дахэм тиныбжьыкIэхэр фэдгъэсэщтых, зыщыщ лъэпкъыр ашIэу неущырэ мафэм хэуцощтых», — къытфиIотагъ Жанетэ.

Форумым изэхэщэнкIэ, игъэзекIонкIэ АР-м IофшIэнымкIэ ыкIи социальнэ хэхъоныгъэмкIэ и Министерствэ, АР-м культурэмкIэ и Министерствэ, Мыекъопэ къэлэ администрацием культурэмкIэ и ГъэIорышIапIэ, АР-м и Общественнэ палатэ, общественнэ организациехэу «Бзылъфыгъэхэм я Союз», республикэ Адыгэ Хасэр IэпыIэгъу хъугъэх .

Апэрэ мафэм ныбжьыкIэхэр нэIуасэ зэфэхъугъэх. ХьакIэу Адыгеим къеблэгъагъэхэр Iэнэ хъураехэм, зэIукIэгъу, зэдэгущыIэгъу зэфэшъхьафхэм ахэлэжьэщтых, шъолъырым икультурэ нэIуасэ фашIыщтых, Мыекъуапэ ичIыпIэ хьалэмэт­хэр арагъэлъэгъущтых.

Къэбэртэе-Бэлъкъарым къикIыгъэ купым хэтэу Алима Гелястановар Къэ­бэртэе-Бэлъкъар къэралыгъо мэкъумэщ университетым щеджэ, лъэпкъ зэфэ­шъхьафхэм яклуб ипащ, форумым осэ гъэнэфагъэ фишIыгъ: «ТшIогъэшIэгъонэу Адыгеим тыкъэкIуагъ. НыбжьыкIэхэр зэрэшIэнхэмкIэ мыщ фэдэ форумхэм мэхьанэшхо яI. ГущыIэм пае, сэ сызипэщэ клубэу тиуниверситет щызэхэщагъэм абхъазхэр, къэбэртаехэр, бэлъкъархэр, нэгъойхэр, индусхэр, арабхэр хэтых. Лъэпкъыбэу узэхэты зыхъукIэ, шъхьаджи къызхэкIыгъэ культурэм ихабзэхэр къыгъэлъагъомэ, тизэпхыныгъэ, тизэгурыIоныгъэ нахь пытэ мэхъу, ащ тыкъегъэбаи».

Форумым хэлажьэхэрэр непэ Мые­къуапэ къащэщтых, АР-м и Лъэпкъ музей нэIуасэ зыфашIыщт, «Мыекъуапэ инэфылъэхэр» зыфиIорэ къэшъокIо купым ихудожественнэ пащэу, УФ-м культурэмкIэ изаслуженнэ IофышIэу Нэныжъ Айдэмыр адыгэ къашъомкIэ мастер-класс афызэхищэщт, дышъэ идагъэмкIэ IэпэIасэхэм аIукIэщтых.

Форумым мэлылъфэгъум и 7-м нэс Iоф ышIэщт. НыбжьыкIэхэр зэрэзэдэлэжьэнхэ алъэкIыщт лъэныкъохэмкIэ проектэу къызэхагъэуцощтхэр кIэух зэхахьэм къыщагъэлъэгъощтых, къыщаIотэщтых. Тэу Замир.