КIэлэцIыкIухэр зэрыс унагъохэм IэпыIэгъу афэхъугъэнымкIэ Урысые Федерацием и Президентэу Владимир Путиным пшъэрылъэу къыгъэнэфагъэхэр гъэцэкIэгъэнхэм тегъэпсыхьагъэу кIэлэцIыкIухэр зиIэ унагъохэм ахъщэ IэпыIэгъу зэраратырэ, ны мылъкур зэрагъэфедэрэ шIыкIэр зыщыгъэнэфэгъэ шэпхъэ актхэр къыдэлъытэгъэнхэмкIэ Iофтхьабзэхэр Урысыем и Социальнэ фонд АР-мкIэ икъутамэ зэрехьэх.

ГущыIэм пае, Урысые Федерацием и Президент 2022-рэ илъэсым гъэтхапэм и 31-м ышIыгъэ Указэу N 175-р зытетэу «Сабый зиIэ унагъохэм мазэ къэс ахъщэ IэпыIэгъу зэраратырэм ехьылIагъ» зыфиIорэм диштэу мы илъэсым щылэ мазэм и 1-м ехъулIэу Урысыем и Социальнэ фонд Адыгэ Рес­публикэмкIэ икъутамэ сомэ миллиардрэ миллион 914,6-рэ унагъохэм аIэкIигъэхьагъ.

2023-рэ илъэсым щылэ ма­зэм и 1-м къыщегъэжьагъэу зигугъу къэтшIыгъэ къутамэм хэхъо ин зимыIэ унагъохэм арыс кIэлэцIыкIухэмрэ бзылъ­фы­гъэ лъэ­рымыхьэхэмрэ ахъщэ аритэу ыублагъ.

Пасэу учетым хэуцо— рэ бзылъфыгъэ лъэрымы­хьэ­хэм­рэ илъэс 17-м зыныбжь нэмысыгъэ кIэлэцIыкIухэм янэ-ятэ­хэмрэ ары ащ къыхиубытэхэ— рэр.

Зыныбжь илъэс 17 имыкъугъэ кIэлэцIыкIум ахъщэу къыратырэр сабыир рыщыIэнкIэ ахъщэ анахь макIэу республикэм щагъэнэфагъэм (сомэ 12415-м) ипроцент 50, ипроцент 75-рэ е ипроценти 100 ары. Бзылъфыгъэ лъэрымыхьэм ахъщэу IукIэрэр Iоф зышIэн зылъэкIырэр рыщыIэнкIэ ахъщэ анахь макIэу республикэм щагъэнэфагъэм (сомэ 13476-м) ипроцент 50, ипроцент 75-рэ е ипроценти 100 ары.

2023-рэ илъэсым гъэтхапэм и 1-м ехъулIэу Адыгэ Респуб­ликэм ис унагъохэу кIэлэцIыкIу зиIэхэм сомэ мил­лиони 173-м ехъу аIукIагъ.

2022-рэ илъэсым Урысыем и Социальнэ фонд Адыгэ Рес­публикэмкIэ икъутамэ ны мылъкум телъытэгъэ къэралыгъо сертификат мини 2,8-м ехъу аритыгъ.

2023-рэ илъэсым Урысые Федерацием и Правительствэ ыухэсыгъэ шэпхъакIэхэм ади­штэу ны мылъкум изы Iахь зыныбжь илъэсищым нэмысыгъэ кIэлэцIыкIухэм аратын алъэ­кIыщт. Ащ фэдэ ахъщэ IэпыIэгъур зытефэхэрэр урыпсэункIэ ахъщэ анахь макIэу агъэнэфагъэм фэдитIум нахь макIэ къы­зыIукIэрэ унагъохэр ары.

Ны мылъкум телъытэгъэ къэ­ралыгъо сертификат къызэратыгъэ унагъохэм ар зэрэпсаоу е Iахь-Iахьэу къызыфагъэфедэн алъэкIыщт псэукIэ амалэу яIэр нахьышIу шIыгъэным, сабыим гъэсэныгъэ егъэгъотыгъэ­ным, сэкъатныгъэ зиIэ кIэлэцIыкIу­хэм атегъэпсыхьэгъэ фэIо-фа­шIэхэм ягъэцэкIэн, илъэ­си 3 охъуфэ нэс кIэлэцIыкIум мазэ къэс ахъщэ IэпыIэгъу етыгъэным апае. 2022-рэ илъэ­сым ны мылъкум те­лъытэгъэ серти­фикатхэр зиIэхэм сомэ миллиардрэ миллиони 139-рэ агъэфедагъ.