Пыдзафэхэр зэтетэжъугъэутых
Пыдзафэхэр зэратэкъонэу щыт контейнерхэм бзэджашIэхэр мытэрэзэу адэзекIохэу къыхэкIы.
ГущыIэм пае, Мыекъуапэ иурамэу Курганнэм тетыгъэ бакэу хэкIыр зэрылъыр ощхым ыуж псыр зыдэуцогъэ кэнаум дадзагъ. ГухэкI нахь мышIэми, ащ фэдэ мыхъо-мышIагъэхэр мымакIэу зэрахьэхэу къыхэкIы.
2023-рэ илъэсыр къызихьагъэм къыщыублагъэу коммуальнэ пыдзэфэ пытэхэм афытегъэпсыхьэгъэ контейнери 10 бгъэфедэжьын умылъэкIынэу ашIыгъ. НахьыбэрэмкIэ ахэм машIор акIадзэ е псэолъэшIыным ипыдзафэхэр аратакъох.
Шъугу къэтэгъэкIыжьы: гъомылэпхъэ пыдзафэхэр, тхылъыпIэжъхэр, зыфэмыежьхэ щыгъынхэр, цуакъэхэр, пхъэр, пластикэр ары ахэр зыфытегъэпсыхьагъэхэр. ПсэолъэшIыным фэхъурэ пыдзафэхэр хъухэщтэп ахэм арыптакъо. Ахэм ахэхьэх штукатуркэ такъырхэр, тенэч бзыгъэхэр, бетон ыкIи гъучIбетоныр, нэмыкIхэри. Автомобильхэм ахэлъ пкъыгъохэу жъы хъугъэхэр, краскэхэр, лакхэр ахэм къахеубытэх. Ахэр зэкIэ пыдзэфэ щынагъохэм ахалъытэх, нэмыкI пкъыгъо горэхэр ахэм ахашIыкIыжьых.
«ЭкоЦентрэм» и Адыгэ къутамэ ипресс-къулыкъу