Партийнэ проектэу «ЕджэпIакIэр» зыфиIорэм игъэцэкIэн къыдыхэлъытагъэу партиеу «Единэ Россием» ишъолъыр гъэцэкIэкIо комитет зэIукIэгъу-зэдэгущыIэгъу щыкIуагъ.

Iофыгъо шъхьаIэу ащ къыщаIэтыгъэр Адыгеим ит еджапIэхэм игъэкIотыгъэ гъэцэ­кIэжьынхэр яшIылIэгъэнхэмкIэ дизайн-проектхэм язэхэгъэуцон лъэныкъохэу «Дизайным» ыкIи «Архитектурэм» афеджэрэ студентхэр къыхэгъэлэжьэгъэнхэр ары.

2023-рэ илъэсым респуб­ликэм ит еджэпIи 7-мэ игъэ­кIотыгъэ гъэцэкIэжьынхэр ащы­кIощтых. Мыщ тегъэпсыхьэгъэ программэм кIэщакIо фэхъу­гъэр Урысые Федерацием и Президентэу Владимир Путиныр ары. 2021-рэ илъэсым «Единэ Россием» зэхищэгъэ Зэфэсым къэралыгъом ипащэ къыщыгущыIэзэ а гухэлъым игугъу къы­шIыгъ ыкIи ар партием илъэпкъ программэ илъэныкъо шъхьа­Iэхэм ащыщ хъугъэ. Тишъолъыр иеджапIэхэр зэрагъэцэкIэ­жьыхэрэм ынаIэ тет Адыгеим и ЛIышъхьэу, партием ишъо­лъыр къутамэ и Секретарэу КъумпIыл Мурат. Программэм пшъэрылъ шъхьаIэу иIэр классхэр, шхапIэхэр, нэмыкIхэр гъэкIэжьы­гъэнхэр, джащ фэдэу кIэлэцIыкIухэм Iэрыфэгъоу ыкIи щынэгъончъэу еджэнхэ амал яIэныр ары.

Гъэсэныгъэм иучреждениехэм ягъэцэкIэжьын фытегъэ­псыхьэгъэ проектхэм язэхэгъэ­уцон ныбжьыкIэхэр къыхагъэлэжьэнхэу Адыгеим щагъэнафэ, джащ фэдэу ахэр «партийнэ десантым» хэтхэу IофшIэнхэр зэрэзэшIуахыхэрэм лъыплъэщтых.