УФ-м лъэпкъ гвардиемкIэ и Федеральнэ къулыкъу и ГъэIорышIапIэу АР-м щыIэр зызэхащагъэр илъэси 7 зэрэхъугъэм фэгъэхьыгъэ мэфэкI зэхахьэ щыIагъ.

ЗимэфэкI хэзыгъэунэфыкIырэ къулыкъушIэхэм къафэгушIуагъ АР-мкIэ лъэпкъ гвардием и ГъэIорышIапIэ ипащэу, полицием игенерал-майорэу Олег Якушевыр.

— Лъэпкъ гвардиер къэралыгъо дзэ организациеу щыт, къэралыгъо ыкIи общественнэ щынэгъончъэным, цIыфхэм яфитыныгъэхэр ыкIи яшъхьафитыныгъэ къэухъумэгъэнхэм афэIорышIэ. Тихэгъэгу лIы­хъужъ къэралэу щыт. Зэо пчъагъэ ащ къызэринэкIыгъ, яхэгъэгу пае апсэ емыблэжьхэу тилIыхъужъхэм лIыблэнагъэ зэрахьагъ. Лъэпкъ гвардием и ГъэIорышIапIэ щысэ зытепхын къулыкъу­шIэхэр мымакIэу хэтых, япшъэ­рылъхэр дэх имыIэу агъэцакIэ. Ахэм япатриотизмагъэ хэткIи щысэтехыпIэу щыт. Мыщ дэжьым зыщыдгъэгъупшэхэ хъущтэп яхэгъэгу къаухъумэзэ, зыпсэ зытыгъэ къулыкъушIэхэр. Ахэр егъашIэм тыгу илъыщтых, — къыIуагъ О. Якушевым.

Iофтхьабзэм хэлэжьагъ Урысыем и ЛIыхъужъэу Цэй Эдуард, ветеранхэм я Совет итхьаматэу, милицием иподполковникэу отставкэм щыIэ Павел Шевченкэр ыкIи хэушъхьафыкIыгъэ подразделением иветеранхэр.

Къулыкъум къафигъэуцугъэ пшъэрылъхэр щытхъу хэлъэу зыгъэцэкIэгъэ къулыкъушIэхэу непэ псаоу къытхэмытыжьхэм зы такъикърэ къэзэрэугъоигъэ­хэр афэшъыгъуагъэх.

Нэужым Цэй Эдуард къулыкъушIэхэм ямэфэкIкIэ къафэгушIуагъ. Iоф мыпсынкIэу агъэ­цакIэрэм гухахъо хагъотэнэу, щыIэкIэшIу яIэнэу къафэлъэ­Iуагъ. Къэралыгъо Советым —Хасэм ирэзэныгъэ тхылъхэр къулыкъушIэхэм ащыщхэм ари­тыжьыгъ.

Iофтхьабзэм икIэухым чIыпIэ къулыкъум ипащэ зиIофшIэнкIэ къахэщыгъэ къулыкъушIэхэм званиехэр, джащ фэдэу ве­домственнэ медальхэр, щытхъу тхылъхэр ыкIи нэпэеплъ шIу­хьафтынхэр афигъэшъошагъэх.

КIАРЭ Фатим.