Анахь дэгъухэр къыхагъэщыгъэх
Урысые фестиваль-зэнэкъокъоу «Хрустальнэ жъогъожъыехэр» зыфиIорэм иапэрэ едзыгъо гъэсэныгъэм иучреждениеу «Лицееу N 34-у» Мыекъуапэ дэтым щыкIуагъ.
Шъугу къэдгъэкIыжьын, илъэс 16 хъугъэу сэнаущыгъэ зыхэлъ кIэлэцIыкIухэр мыщ зэрещалIэх. Iофтхьабзэм икIэщакIор хьыкум приставхэм я Федеральнэ къулыкъу.
Фестиваль-зэнэкъокъум иапэрэ уцугъо къызэIуихагъ хьыкум приставхэм я Федеральнэ къулыкъу АдыгеимкIэ и ГъэIорышIапIэ ипащэ ипшъэрылъхэр зыгъэцэкIэрэ Шэхъые Налбый. Ащ къызэриIуагъэмкIэ, мыщ фэдэ Iофтхьабзэхэм унагъом имэхьанэ агъэпытэ, лъэпкъ зэфэшъхьафхэм яшэн-хабзэхэм хэхъоныгъэ ашIы, кIэлэцIыкIухэм ыкIи Iэтахъохэм творческэ амалэу аIэкIэлъхэм заушъомбгъу.
Зэнэкъокъум ишъолъыр едзыгъо мыгъэ кIэлэцIыкIу 80-м ехъу хэлэжьагъ. Ахэм аныбжь елъытыгъэу купитIоу гощыгъагъэх, лъэныкъуищкIэ заушэтыгъ.
ОсэшIхэм ахэтыгъэх Камернэ музыкальнэ театрэу А.А. Хьанэхъум ыцIэ зыхьырэм ибалетмейстер-постановщикэу, Адыгеим инароднэ артистэу, АР-м искусствэхэмкIэ изаслуженнэ IофышIэшхоу, Грузием изаслуженнэ артистэу Исуп Аслъан, Адыгеим и Къэралыгъо ансамблэу «Ислъамыем» исолисткэу, АР-м изаслуженнэ артисткэу Асият Тюмер, искусствэхэмкIэ Адыгэ республикэ колледжэу Тхьабысымэ Умар ыцIэ зыхьырэм икIэлэегъаджэу Дэхъу Аминат.
Зэнэкъокъум лъэныкъо зэфэшъхьафхэмкIэ текIоныгъэр ыкIи апэрэ шъуашэ зиIэ дипломхэр къыщыдэзыхыгъэхэр къэнэфагъэх. Ахэм ащыщых: Кира Котяк, Пэрэныкъо Анзор, кIэлэцIыкIу ансамблэу «Мыекъуапэ инэфылъхэр».
«Хореография» зыфиIорэ лъэныкъомкIэ нахьыжъхэм якуп текIоныгъэр къыщыдахыгъ зэшыпхъухэу Влада ыкIи Велина Прокофьевахэм. Мыекъопэ пивэшI заводым ихэушъхьафыкIыгъэ шIухьафтын мыхэм афагъэшъoшагъ. Анахь дэгъоу зыкъэзыгъэлъэгъуагъэхэм ахэхьагъ шыкIэпщынэм къезыгъэIогъэ ШъхьапцIэжъыкъо Самирэ. КъашъохэмкIэ нахьыжъхэм якупкIэ Гран-при къызыфагъэшъошагъэр «Мыекъуапэ инэфылъхэр» ары, солистхэр Теунэ Амин ыкIи Шэхъые Джанета.
Зэнэкъокъум ишъолъыр едзыгъо текIоныгъэр къыщыдэзыхыгъэхэм явидеоматериалхэр Москва агъэхьыщтых, фестивалым иятIонэрэ уцугъо ащ щыкIощт.
Хьыкум приставхэм я Федеральнэ къулыкъу АдыгеимкIэ и ГъэIорышIапэ ипресс-къулыкъу.