ЦIыфхэр агъапцIэх

УФ-м и Следственнэ комитет ислед­ственнэ ГъэIорышIапIэу АР-м щыIэм иIофышIэхэм къызэраIуагъэмкIэ, къулыкъум иIофышIэхэу араIозэ гъэп­цIакIохэр цIыфхэм афытеуагъэхэу ыкIи якартэ номерхэр къарагъаIохэзэ ахъщэр арахыгъэу е чIыфэу банкым къаIарагъэхыгъэу хъугъэ-шIагъэхэр 2023-рэ илъэсым къыхагъэ­щыгъэх.

БзэджэшIагъэхэр зэрахьанхэмкIэ хэушъхьафыкIыгъэ программэхэр къызыфагъэфедэх, Мыекъуапэ иследственнэ отдел иномер къытыридзэу гъэпцIакIохэр цIыфхэм афытеох.

ШъунаIэ тешъудз! УФ-м и Следственнэ комитет иследственнэ ГъэIорышIапIэу АР-м щыIэм макъэ къы­шъуегъэIу, къулыкъум иIофышIэу аIозэ къафытеохэрэм цыхьэ афамышIынэу — ахэр гъэпцIакIох.

Урысыем и Следственнэ комитет иIофышIэхэм пэшIорыгъэшъ зэхэфынхэр рагъэкIокIы хъумэ хэбзэгъэуцугъэм диштэу цIыфхэм афытеох, ау ахэр банкым икартэ иреквизитхэм, ащ пчъагъэу тетхэм акIэупчIэнхэ фитхэп.

Следственнэ гъэIорышIапIэм иIофышIэ къыпфытеуагъэмэ къызэрэпшIэщтыр телефон номерэу 8 (8772) 56-04-20-м е следственнэ отделэу Мыекъуапэ щыIэм ителефон номерэу 8(8772) 52-22-87-м шъуазытеокIэ ары.

IофшIэным ишапхъэхэр ыукъуагъэх

Урысыем и Следственнэ комитет иследственнэ ГъэIорышIапIэу АР-м щыIэм Мыекъопэ районымкIэ иследственнэ отдел прокуратурэм къыугъоигъэ материалхэмкIэ унэе предпринимателым ылъэныкъокIэ уголовнэ Iоф къызэIуихыгъ. IофшIэным пылъ шапхъэхэр зэриукъуагъэмкIэ, ащ къыхэкIэу цIыфым идунай зэрихъожьыгъэмкIэ хъулъфыгъэр агъэмысэ.

Следствием къызэритырэмкIэ, 2022-рэ илъэсым бэдзэогъум пхъэм икъыдэгъэкIын фэгъэзэгъэ унэе предпринимателым ицехэу поселкэу Тульскэм дэтым Iоф щызышIэщтыгъэ IофышIэм Iэмэ-псымэмкIэ пхъэр зэпихызэ сакъыныгъэ къызэрэзхимыгъэфагъэм къы­хэкIэу шъобж инхэр тещагъэхэ хъугъэ.

Щынэгъончъэным ылъэныкъокIэ къэзыухъумэрэ пкъыгъохэр IофшIакIом зэрэIэкIимыгъэхьагъэм, ащкIэ шапхъэхэр зэриукъуагъэм къыхэкIэу предпринимателыр агъэмысэ.

Мы мафэм ехъулIэу уголовнэ IофымкIэ следственнэ ыкIи процессуальнэ Iофтхьабзэхэр зэрахьэх. Ахэм кIэухэу афэхъущтым елъытыгъэу предпринимателым пшъэдэкIыжь рагъэхьыщт.

Уголовнэ Iофыр зэхафы

МыекъуапэкIэ следственнэ отделым полицием иуполномоченнэ участковэ нэбгыритIумэ алъэныкъокIэ уголовнэ Iофхэр къызэIуихыгъэх. Къуалъхьэ зэраштагъэмкIэ къулыкъушIэхэр агъэмысэх.

Следствием зэригъэунэфыгъэмкIэ, 2020-рэ илъэсым мэзаем къыщегъэжьагъэу 2021-рэ илъэсым мэзаем нэс хьадэм ифэIо-фашIэхэр зыгъэцэкIэрэ агентствэм иIофышIэ зидунай зыхъожьыгъэхэм якъэбар къызIэкIигъэхьан, нэужым ахэм яIахьылхэм зэзэгъыныгъэ адишIын гухэлъ иIэу, Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм иполицие иуполномоченнэ участковэ иIофышIэ къуалъ­хьэу сомэ мини 10 ритыгъ.

Участковэу зэгуцафэхэрэм мы Iоф дэдэмкIэ 2020-рэ илъэсым шэкIогъум къыщегъэжьагъэу 2021-рэ илъэсым мэзаем нэс къуалъхьэу сомэ мини 10 къа­Iихыгъ.

Мы мафэм ехъулIэу уголовнэ Iофхэм язэхэфын лъагъэкIуатэ.

Къуалъхьэ къаIихыгъэу егуцафэх

Электричествэр аIэкIэзыгъахьэрэ къэлэ организацием иотдел ипащэ къуалъхьэ ыштагъэу егуцафэх.

УФ-м и Следственнэ комитет иследственнэ ГъэIорышIапIэу АР-м щыIэм и Мыекъопэ следственнэ отдел къызэритыгъэмкIэ, ыпшъэкIэ зигугъу къэтшIыгъэ организацием ипащэ уголовнэ Iоф къыфызэIуахыгъ. Хабзэр ыукъозэ къуалъхьэ къазэраIихыгъэм фэшI бзылъфыгъэр агъэмысэ.

АР-м хэгъэгу кIоцI IофхэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным ебэныгъэнымкIэ иподразделение къыугъоигъэ материалхэмкIэ уголовнэ Iоф къызэIуахыгъ.

Мы уахътэм ехъулIэу зэхэфынхэр макIох. Ахэм кIэухэу афэхъущтым елъытыгъэу пшъэдэкIыжьыр агъэ­нэфэщт.

Янэ ыукIыжьыгъ

Илъэс 44-рэ зыныбжь хъулъфыгъэу Мыекъуапэ щыпсэурэм укIыгъэ Iоф зэрэзэрихьагъэм фэшI УФ-м и Следственнэ комитет иследственнэ ГъэIорышIапIэу АР-м щыIэм и Мыекъопэ отдел уголовнэ Iоф къызэIуихыгъ.

Следствием зэригъэунэфыгъэмкIэ, 2023-рэ илъэсым гъэтхапэм икъихьагъум хъулъфыгъэр ешъуагъэу илъэс 77-рэ зыныбжь ным фэгубжыгъ ыкIи ынапэ гъогогъу пчъагъэрэ утынхэр рихыгъэх, нэужым ар ытхьэлагъ. Мэфэ заулэ тешIагъэу бзэджэшIагъэ зэрэзэрихьагъэмкIэ хъулъфыгъэм ежь-ежьырэу полицием макъэ ригъэIугъ. Зэхэфынхэр макIох.

ПшъэдэкIыжьыр агъэнэфэщт

IофшIэным ишапхъэхэр зэраукъуагъэм ыкIи ащ къыхэкIэу цIыфым ипсауныгъэ зэрэзэщыкъуагъэм епхыгъэу Тэхъутэмыкъое межрайон следственнэ отделым район прокуратурэм къыугъоигъэ материалхэмкIэ уго­ловнэ Iоф къызэIуихыгъ.

Следствием зэригъэунэфыгъэмкIэ, гъэстыныпхъэр зэрыкIорэ гъогу Iахьэу «Краснодар — Крымск» зыфиIорэм къутырэу Новый садым дэжь IофшIэнхэр щыкIохэзэ гъэстыныпхъэ шхъуантIэр аIэкIэзыгъэхьэрэ организацием икъутамэу Яблоновскэ дэтым иIофышIэ горэм шапхъэхэр зэриукъуагъэм къыхэкIэу шъобж хьылъэхэр тещагъэхэ хъугъэ.

Хьыкум экспертизэр зэхащагъэу мы мафэхэм уплъэкIунхэр макIох. Ащ зэфэхьысыжьэу афэхъущтым елъытыгъэу пшъэдэкIыжьыр агъэнэфэщт.

Зыгъэхьазырыгъэр КIАРЭ Фатим. Сурэтхэр: ГъэIорышIапIэм ипресс-къулыкъу.