Гъатхэм иапэрэ мазэ кIуагъэ, ом изытет зыпкъ зэримытым къыхэкIыкIэ республикэм ичIыгулэжьхэм яIофшIэн бэрэ зэпыоу къыхэкIыгъ нахь мышIэми, мэфэ ошIухэр къызфагъэфедэхэзэ лэжьыгъэхэм минеральнэ чIыгъэшIухэмкIэ яшIушIэх. IофшIэнхэр ыкIэм факIох.

АР-м мэкъу-мэщымкIэ и Ми­нистерствэ къызэрэщытаIуа­гъэмкIэ, 2023-рэ илъэсым Iуа­хыжьынэу зэкIэмкIи бжыхьэсэ гектар мини 108,3-рэ апхъыгъ. Ащ щыщэу коцым гектар мин 88,4-рэ, хьэм гектар мини 9-м ехъу, рапсым гектар мини 10,7-рэ фэдиз арагъэубытыгъ.

Бжыхьасэхэр специалистхэм ренэу ауплъэкIух. КIымафэм ом изытет, осыр макIэу къызэресыгъэр къягоуагъэми, непэ­рэ мафэр пштэмэ, ахэм уагъэ­рэзэнэу щыт. Мэфэ ошIоу къы­хэкIыгъэхэр къызфагъэфедэхэзэ бжыхьасэхэм ящыкIэгъэ пстэур чIыгулэжьхэм ара­шIэфы. Мэлылъфэгъум и 3-м ехъулIэу гектар мини 106,6-м чIыгъэшIухэмкIэ яшIушIагъэх. А IофшIэныр Кощхьэблэ, Красногвардейскэ, Мыекъопэ, Теуцожь, Шэуджэн районхэм ыкIи Адыгэкъалэ ащаухыгъ.

Мы мафэхэм лэжьыгъэхэм уз зэфэшъхьафхэр къахэмы­хьанхэм ыкIи уцыжъхэр къатемыкIонхэм фэшI химпрополкэр рагъэжьагъ. Джэджэ районыр зэкIэмэ апэ мыщ ыуж ихьагъэ­хэм ащыщ, гектар 3000-м, Шэ­уджэн районым гектар 2320-м, Мыекъопэ районым гектар 1035-м, Кощхьэблэ районым гектар 75-м IофшIэныр ащы­кIуагъ. Джащ фэдэу гъэтхасэхэр зыхалъхьащт чIыгур агъэхьазыры.

Республикэм ичIыгулэжьхэр техникэмкIэ зэтегъэпсыхьагъэх. Аужырэ шапхъэхэм адиштэрэ тракторэу, комбайнэу къащэфыхэрэм япчъагъэ илъэс къэс хэхъо. КъэIогъэн фае ащкIэ къэралыгъор IэпыIэгъу къазэрафэхъурэр. 2023-рэ илъэсым зэрыпхъэщтхэ, зэрыжъощтхэ тракторхэр ыкIи нэмыкI губгъо IофшIэнхэр зэрызэшIуахыщт Iэмэ-псымэхэр икъу фэдизэу зэтырагъэпсыхьагъэх.

ДЕЛЭКЪО Анет.