Сабый ибэхэм унэхэр ягъэгъотыгъэнхэм пае 2023-рэ илъэсым сомэ миллиони 177,5-рэ къыдалъытагъ, ащ щыщэу миллиони 150-р республикэ бюджетым къикIынэу, миллион 27,5-р федеральнэм къытIупщынэу рахъухьэ.

Унэ зэрагъэгъотынэу агъэнэфагъэр сабый ибэ 70-рэ. Адыгэ Республикэм и Къэралыгъо Совет — Хасэм бюджетымкIэ икомитет изэхэсыгъо ар къыщаIуагъ.

— Урысые Федерацием исубъектмэ зэкIэмэ хъар­джэу ашIырэм щыщ сабый ибэхэм псэупIэхэр ягъэгъотыгъэнхэр. Ау УФ-м ишъолъырхэм якъэралыгъо органхэм язакъоу а Iофыгъор зэшIуахын алъэкIырэп, ащ тырагъэкIодэнэу щыт мылъкур аIэкIэлъэп,— къы­Iотагъ Адыгэ Республикэм и Къэралыгъо Совет — Хасэм и Тхьаматэ игуадзэу, профильнэ комитетым ипащэу Iащэ Мухьамэд.

2023-рэ илъэсым сабый ибэхэу ыкIи ны-тыхэр зылъымыплъэжьхэу къэнэгъэ кIэлэцIыкIухэм псэупIэ ягъэгъотыгъэным фэшI ахъщэ IэпыIэгъу федеральнэ гупчэм къытIупщыным щыгугъхэу АР-м и Къэралыгъо Совет — -Хасэм иджэпсалъэ ипроект ыгъэхьазы­рыгъ, ар Урысые Федерацием и Правительствэ и Тхьаматэ игуадзэу Марат Хуснуллиным фагъэхьыщт.