Адыгеим и ЛIышъхьэу КъумпIыл Муратрэ Iахьзэхэлъ обществэу «Рос­телеком» зыфиIорэм и Краснодар къутамэ ипащэу Сергей Поляковымрэ зэдыряIэгъэ зэIукIэгъум илъэхъан зытегущыIагъэхэр компаниемрэ республикэм иминистерствэхэмрэ икъулыкъухэмрэ язэдэлэжьэ­ныгъэ иIофыгъохэр ары.

Адыгеим и ЛIышъхьэ къызэрэхигъэщыгъэмкIэ, язэдэлэжьэныгъэ нахь чаны­гъэ халъхьаным, республикэм исоциальнэ-экономикэ Iофыгъохэм компаниер цыхьэшIэгъоу къахэлэжьэным мэхьанэшхо иI.

«Адыгеимрэ «Ростелекомымрэ» бэшIагъэ IофшIэным епхыгъэ зэпхыныгъэ­шIухэр азыфагу зилъхэр. ЭкономикэмкIэ ыкIи социальнэ политикэмкIэ зэшIуа­хырэ проектыбэмэ компанием иIахь ахэлъ. ГъэхъэгъэшIухэр тизэдэлэжьэныгъэ къы­кIэкIонхэм, телекоммуникационнэ фэIо-фашIэхэр игъом ыкIи тэрэзэу къы­тIэ­кIэхьанхэм бгъуитIумкIи тынаIэ тедгъэтын фае», — къыIуагъ КъумпIыл Мурат.

Лъэпкъ проектэу «Щынэгъончъэ гъогу дэгъухэр» зыфиIорэм къыдыхэлъыта­гъэу 2022-рэ илъэсым хьылъэхэу гъогухэм ащызэращэхэрэм яуплъэкIункIэ пункт гъэнэфагъэхэр Адыгеим щыгъэ­псыгъэн­хэм а компаниер къыхэлэжьагъ. Илъэс заулэ хъугъэу республикэм псауныгъэм икъэухъумэнкIэ проектхэр щыгъэцэкIэгъэнхэм, цIыфхэр жъугъэу зыхэлэжьэ­хэрэ культурнэ ыкIи спорт, гъэсэныгъэм епхыгъэ, шIушIэ Iофтхьабзэхэм япхырыщынкIэ ащ ишIуагъэ къегъакIо, федеральнэ ыкIи шъолъыр мэхьанэ зиIэ мэфэкIхэм джащ фэдэу къа­хэлажьэ.

ТапэкIи тазыфагу илъыщт зэдэлэжьэныгъэм къытегущыIэ зэхъум Адыгеим и ЛIышъхьэ анахьэу ынаIэ зытыригъэтыгъэр медицинэ къэбар системэр рес­публикэм щызэхэщэгъэным епхыгъэ Iофыгъохэр ары. Республикэм псауныгъэм икъэухъумэнкIэ и Министерствэ щыкIагъэу ылъэгъугъэхэр псынкIэу дэгъэзыжьыгъэнхэ зэрэфаем АР-м и ЛIышъхьэ анаIэ тыраригъэдзагъ. Iахьзэхэлъ обществэу «Ростелекомым» и Краснодар къутамэ ипащэ КъумпIыл Мурат къыгъэгугъагъ Iофхэм язытет щыкIагъэу фэхъухэрэр дэгъэзыжьыгъэнхэмкIэ амалэу щыIэр зэкIэ ыгъэфедэнэу.

АР-м и ЛIышъхьэ ипресс-къулыкъу