КIэлэцIыкIухэм яцIыкIугъом къыщегъэжьагъэу Iэдэбныгъэ ахэлъэу гъогум щызекIонхэмкIэ нахьыжъхэм пIуныгъэ Iоф­тхьабзэу адызэрахьэхэрэм мэхьанэшхо иI.

Адыгэкъалэ дэт кIэлэцIыкIу IыгъыпIэр асфальт гъогум пэгъунэгъоу зэрэщытым къыхэкIэу лъэс­рыкIо кIэлэцIыкIухэмкIэ ыкIи ахэм янэ-ятэхэмкIэ щынагъо. Ащ къыхэкIыкIэ IыгъыпIэм икIэлэпIухэм мы гумэкIыгъом лъэшэу анаIэ тырагъэты. ГъогурыкIоным ишапхъэхэр къизыIотыкIырэ зэнэкъо­къухэр рагъэкIокIых, сурэт­хэр арагъэшIых, усэхэр ыкIи орэдхэр къарагъа- Iох, тамыгъэхэр, стендхэр агъэуцух.

КIэлэцIыкIу IыгъыпIэу «Созвездием» икупэу «Звез­дочки» зыфиIорэм исхэм гъогурыкIоным ишапхъэхэр ренэу къафаIуатэх, ащ фэгъэхьыгъэ макетышхор агъэфедэзэ кIэлэцIыкIухэр агъасэх. КIэлэцIыкIу IыгъыпIэм дэт автодромыр сабыйхэм якIас, ащ ишIуагъэкIэ нэф­рыгъуазэм ыкIи тамыгъэ­хэм къарыкIыхэрэр дэгъоу ашIэ хъугъэ.

БэмышIэу кIэлэцIыкIу IыгъыпIэм фэгъэхьыгъэ Iофтхьэбзэ гъэшIэгъон щы­зэхащагъ. ГъогурыкIоныр щынэгъончъэнымкIэ Къэралыгъо автоинспекцием иотделэу «Адыгейский» зыфиIорэм иинспекторэу Яна Соколовам пшысэм къыхэхыгъэ лIы­хъужъхэр игъусэхэу гъогу­рыкIоным шапхъэу пылъхэр кIэлэцIыкIухэм къафаIотагъ. Сабыйхэр гъогурыкIоным ишапхъэхэм афэгъэхьыгъэ усэхэм къяджагъэх, гъогу тамыгъэхэм япхыгъэ хыры­хы­хьэхэр къашIагъэх. Нэ­ужым гъогум узэрэщызе­кIон фэе шапхъэхэр зытет плакатхэр аIыгъхэу кIэлэцIыкIухэри зэпырыкIыпIэ­хэм атехьагъэх, машинэ­хэр къагъэуцугъэх.

КIэухым Iофтхьабзэм хэлэжьагъэхэм зэкIэми къэнэфырэ пкъыгъо цIыкIухэр аратыгъэх, а мафэр ахэмкIэ мэфэкI шъыпкъэ хъугъэ.

Адыгэкъалэ дэт кIэлэцIыкIу IыгъыпIэу «Созвездием» икIэлэпIоу Р. ПчыхьалIыкъу.