Гъатхэм иапэрэ мазэу гъэтхапэр фабэу ыкIи шынэгъакIэ иIэу икIыгъ. Темыр атлантикэм къикIырэ жьы чъыIэм ощх ыкIи ощх-ос зэхэлъ къыхьыгъ.

Джащ фэдэу мафэхэр къы­хэкIыгъэх нэгъэупIэпIэгъум мет­рэ 15 — 20-м ехъоу жьыбгъэр къепщагъэу.

ЛатиныбзэкIэ «априлисым» къикIырэр «къызэIухыгъэныр» ары. Мы мазэр псым иIункIы­бзэу алъытэ. Джащ фэдэу ижъы­кIэ къыщегъэжьагъэу гъатхэр мэлылъфэгъум ибысымэу, ащ нэмыкIэу гъэбэжъум ыкIи ­уашъом, шIулъэгъум итхьэу Афродитэ мыр имазэу аIо.

КIымафэм ифэмэ-бжьымэхэр мэлылъфэгъу мазэм зэкIакIох, Средиземноморьем къикIырэ фабэр къыхьэу регъажьэ. Гъэт­хэпэ мазэм егъэпшагъэмэ, мэ­лылъфэгъум фабэр градуси 9 — 10-кIэ нахьыб. Арэу щытми, арктическэ жьы чъыIэм ыпкъ къикIэу къэучъыIэу къы­хэкIыщт.

ГидрометеорологиемкIэ ыкIи тыкъэзыуцухьэрэ дунаим иуплъэ­кIункIэ Гупчэм ипащэу Александр Митровым тызэрэщи­гъэгъозагъэмкIэ, мэлылъфэгъум температурэр зыпкъ итыщт. Илъэс 60-кIэ узэкIэIэбэжьмэ мэлылъфэгъур нахь чъыIэу къыз­щыхэкIыгъэр 2004-рэ илъэсыр ары, чъыIэу градуси 7 — 6 агъэунэфыгъагъ. Анахь фабэу къызщыхэкIыгъэр 2098-рэ илъэ­сыр ары, ащыгъум градус 37-рэ агъэунэфыгъагъ.

Мэлылъфэгъур зыпкъ итэу фэбэщт ыкIи шынэгъакIэ иIэщт. ГурытымкIэ температурэр ыкIи ощхэу къещхыщтыр шапхъэхэм ашIокIыщтэп.

Апэрэ мэфипшIыр. Чэщым градуси 3 — 8 щыIэщт, чъыIэу градуси 3-м нэсэу, къыгъэщтэу къыхэкIыщт. Мафэм фабэр градус 12 — 17, джащ фэдэу градус 23-м кIахьэуи хъущт.

ЯтIонэрэ мэфипшIыр. Чэщым градуси 5 — 10 щыIэщт, чъыIэр градус 0-м зыщынэсыщти къы­хэкIыщт. Мафэм фабэр градус 13 — 18 ыкIи градус 20-м кIэхьащт.

Ящэнэрэ мэфипшIыр. Мэ­лылъфэгъум икIэухым ом изытет нахь фэбэщт. Чэщым фабэр градуси 6 — 11, мафэм градус 16 — 21-м анэсыщт. КъыхэкIыщтых мафэхэр фабэхэу, градус 25-м кIахьэу.

Мэкъумэщ культурэм икъэ­гъэкIынкIэ мэлылъфэгъум иапэрэ мэзэныкъом гумэкIыгъохэр къыздихьынхэ ылъэкIыщт.

Псыхъохэм адэт псыр шап­хъэу щыIэхэм ашIокIыщтэп. Къушъхьэхэм ателъ осыр къыз­щигъэжъурэ уахътэм ыкIи лъэ­шэу къызещхырэм, псыхъохэм адэт псыр къыдэкIоещт.

КIАРЭ Фатим.