Мыекъопэ къэралыгъо технологическэ университетым апшъэрэ гъэсэ­ны­гъэ программэмкIэ — сэнэхьатэу 31.08.02 «Анестезиология — реаниматология» зыфиIорэмкIэ — ординатурэм специалистхэр ыгъэ­хьазырынхэмкIэ фитыныгъэ иIэ хъугъэ, лицензие ащкIэ къыратыгъ.

Анестезиологиемрэ реаниматологиемрэ шIэныгъэ куухэр зиIэ специалистхэр ары Iоф ащызышIэн зылъэкIыщтхэр. Ординаторхэр илъэситIум къыкIоцI фагъэхьазырыщтых сы­мэджэ дэим ыкIи операцие ужым цIыфым узэрэдэзекIон фаем, теорием ылъэныкъокIэ шIэныгъэу яIэр IофшIэным зэ­рэщыбгъэфедэщтыр арагъэ­шIэщт. «Анестезиолог-реаниматологым зэкIэ ышIэн фае» — джащ къы­пкъырыкIыхэзэ ординаторхэр агъэхьазырыщтых.

Егъэджэнхэм ялъэхъан хэу­шъхьафыкIыгъэ тренажерхэу ыкIи манекенхэу клиническэу сымаджэр чIыпIэ хьылъэ, чIыпIэ щынагъо изыгъэуцон зылъэ­кIыщт— хэмкIэ IофшIэнэу къапыщылъым ординаторхэр фагъэсэщтых. Ахэр ащыкIощтых «симуляцион­нэ гупчэкIэ» заджэхэу МКъТУ-м хэтым ыкIи Адыгэ республикэ клиническэ сымэджэщым анестезиологие-реаниматологием- кIэ иотделение.

Сэнэхьатэу 31.08.02 «Анестезиология — реаниматология» зыфаIорэр АР-м псауныгъэр къэухъумэгъэнымкIэ и Минис­терствэ яIэпыIэгъоу егъэджэн программэм хагъэхьагъ. Ординатурэм лъэныкъуакIэу зыщыфагъэхьазырыщтхэм фэгъэзэгъэщтых Урысыем ыкIи Адыгэ Республикэм яшIэныгъэлэжьхэр, врач пэрытхэр: Урысыем псауныгъэр къэухъумэгъэнымкIэ и Министерствэ ианесте­зиолог-реаниматолог шъхьаIэу, медицинэ шIэныгъэхэмкIэ докторэу, профессорэу, Урысыем псауныгъэр къэухъумэгъэнымкIэ и Министерствэ епхыгъэ апшъэрэ еджапIэу «Российская медицинская академия непрерывного профессионального образования» (РМАНПО) зыфиIорэм анестезиологиемрэ реаниматологиемрэкIэ икафедрэ ипащэу Молчанов Игорь Владимир ыкъор, медицинэ шIэныгъэхэмкIэ докторэу, мы академие дэдэм анестезиологиемрэ реаниматологиемрэкIэ икафедрэ ипрофессорэу, Урысыем псауныгъэр къэухъу­мэ­гъэнымкIэ и Министерствэ ане­стезиологиемрэ реанима­тологиемрэкIэ ипрофильнэ комиссие исекретарэу Гридчик Ирина Евгений ыпхъур, Адыгэ республикэ клиническэ сы­мэ­джэщым анестезиологие-реа­ниматологиемкIэ иотделение ипащэу, апшъэрэ категорие зиIэ врачэу, УФ-м псауныгъэр къэу­хъумэгъэнымкIэ иотличникэу, УФ-м ианестезиолог-реаниматологхэм я Федерацие хэтэу Мэкъулэ Ахьмэд Хъусен ыкъор.

Сурэтыр: зэIухыгъэ къэбарлъыгъэIэс амалхэр.