Адыгеим и ЛIышъхьэу Къум­пIыл Мурат Шэуджэн районым зэкIом, къутырэу Чернышевым дэсхэу республикэм ипащэ тапэкIэ зыкъыфэзыгъэзэгъагъэхэм яIофыгъохэм язэшIо­хынкIэ пшъэрылъэу афигъэуцугъэхэр зэрагъэцэкIэжьыгъэ­хэр ыуплъэкIугъ.

Шъугу къэтэгъэкIыжьы зэIукIэгъум къутырдэсхэмкIэ мэхьанэшхо зиIэ Iофыгъохэм ыкIи ахэм язэшIохыкIэ хъущтхэм игъэкIотыгъэу зэращытегущыIэгъагъэ­хэр. Ахэм ащыщ гурыт еджапIэм игъэцэкIэжьын, спорт, кIэлэцIыкIу джэгупIэхэм яшIын, сабыйхэр кIэлэцIыкIу IыгъыпIэм транспорткIэ нэгъэсыгъэнхэр, псырыкIуапIэхэр къутырым щыгъэпсыгъэнхэр, общественнэ чIыпIэхэм язэтегъэпсыхьан, лъэс гъо­гухэм, гъогу зэпырыкIыпIэхэм язэте­гъэпсыхьан ыкIи нэмыкIхэр. Адыгеим и ЛIышъхьэ ведомст­вэхэм япащэхэм пшъэрылъ гъэ­нэфагъэхэр афишIыгъагъэх.

КъумпIыл Мурат Чернышевым къызэкIом, пшъэрылъэу афи­шIыгъэхэр зэрагъэцэкIэжьыгъэр зэ­ригъэшIагъ, къутырдэсхэм ящы­IэкIэ-псэукIэ зыкъегъэIэтыгъэнымкIэ Iофтхьабзэу зэра­хьэ­хэрэм защигъэгъозагъ. ГущыIэм пае, почтэм игъэцэкIэ­жьын аухыгъ, гъогухэм яшIынкIэ Iоф­шIэн гъэнэфагъэхэр зэшIуа­хы­гъэх, общественнэ чIыпIэхэр зэ­тырагъэпсыхьагъэх, гъогу та­­мыгъэхэр агъэуцугъэх, транспорт къэуцупIэр зыпкъ рагъэуцо­жьыгъ.

Гурыт еджапIэм игъэцэкIэ­жьын рагъэжьагъ, чъыгыжъхэр гурыт еджапIэм щырахыкIыгъэх, тапэкIэ ащ ищагу изэтегъэпсыхьан ыуж ихьащтых. КъумпIыл Мурат мыщкIэ Iофэу ашIэрэм зыщигъэгъозагъ, ищыкIэгъэ пшъэрылъхэр афишIыгъэх. КIэлэцIыкIухэм экскурсиехэр зэрафызэхащэн фэе шIыкIэми тегущыIагъэх.

Гурыт еджапIэм ипащэу Ожъ Руслъан Адыгеим и ЛIышъхьэ тхьауегъэпсэу къыриIуагъ кIэлэеджакIохэм шIэныгъэ куухэр ягъэгъотыгъэнымкIэ амалэу зэ­рихьэхэрэм афэшI. КIэлэцIыкIу­хэр Адыгэ Республикэм и ­Лъэпкъ музей зыкъаплъыхьанэу зэращэгъагъэхэр, Лъэпкъ музеир ахэм агу зэрэрихьыгъэр гурыт еджапIэм ипащэ къыхигъэщыгъ.

Адыгеим и ЛIышъхьэ пшъэ­рылъэу къафишIыгъэр агъэца­кIэзэ, къутырэу Чернышевым дэсхэм хъупIэкIэ къызфагъэфедэн алъэкIыщт чIыгу Iахьхэр агъэнэфагъэх. Мобильнэ офисым дэгъоу Iоф ешIэ, газыр аIэкIэгъэхьэгъэнымкIэ зэхэфынхэр цIыфхэм афашIыгъэх, лъэIу тхылъ­хэм язэхэгъэуцонкIэ Iэ-пы­Iэгъу афэхъугъэх. Къутырэу Чернышевым шIушIэ IэпыIэгъур зыщаугъоищт чIыпIэр къагъо-тыгъ. ЖъоныгъуакIэм ехъулIэу мэкъумэщ гъомылапхъэхэр зыщащэн алъэкIыщт бэдзэрым изэтегъэпсыхьан аухыщт. Илъэсым ыкIэм ехъулIэу псэупIэу Заревым кIэлэцIыкIу IыгъыпIа­кIэу къыдэтэджэщтым кIэлэцIыкIухэр нэзгъэсынхэ зылъэкIыщт автобуси агъэнэфагъ.

Мемориальнэ комплексым изэтегъэпсыхьанрэ спорт джэгупIэм игъэцэкIэжьынрэ ателъы­тэгъэ проект-сметэ документацием игъэхьазырын ыуж итых. Шъолъыр проектэу «Псы къабз» зыфиIорэм къыдыхэлъытагъэу псы IыгъыпIэмрэ псырыкIуапIэ­хэмрэ агъэпсых.

Къутырым дэсхэр зыгъэгумэкIыщтыгъэхэ нэмыкI Iофыгъуи зэшIуахыгъ. Мы илъэсым мэзаем и 27-м къыщегъэжьагъэу къалэу Мыекъуапэ къикIэу къутырэу Веселэм къынэсырэ автобусыр къутырэу Чернышевми къыдахьэ хъугъэ. Къутырэу Ка­саткиным къикIырэ, къуаджэу Хьакурынэхьаблэ къынэсырэ автобусыр Дукмасовскэ, Заревскэ къоджэ псэупIэхэм, къутыр­хэу Чернышеври Веселэри ахэм зэрахэтхэу, адэхьэ.

Лъэпкъ проектэу «Культурэм» къыдыхэлъытагъэу къутырэу Чернышевым дэт культурэм и Унэ игъэцэкIэжьынкIэ 2024-рэ илъэсым телъытэгъэ заявкэр атыщт. Адыгеим и ЛIышъхьэ пшъэрылъ афишIыгъ мы илъэсым агъэцэкIэщтхэм проектыр хагъэ­хьанымкIэ ищыкIэгъэ Iофтхьа­бзэхэр зэрахьанхэу. Къутырэу Веселэм дэс пенсионерхэм язы­гъэпсэфыгъо уахътэ изэхэщэнкIэ предложение заули къа­хьыгъ. Къутырэу Чернышевым дэсхэм медицинэ фэIо-фашIэхэр нахьышIоу афэгъэцэкIэгъэнхэм, районым ифельдшер-мамыку Iэ­запIэхэм ахэр алъыгъэIэсы­гъэнхэм лъэшэу анаIэ тырагъэтыщт. ЦIыфхэм зыкъызэрэфагъэ­зэгъэ IофыгъохэмкIэ пшъэры­лъэу КъумпIыл Мурат афишIыгъэхэр зэрагъэцэкIагъэхэр зеуплъэкIухэ нэуж республикэм и ЛIышъхьэ нэмыкI IофыгъохэмкIи къутырым дэсхэм адэгущыIагъ.

«Къутырдэсхэр зыгъэгумэкIырэ Iофыгъохэм тишъыпкъэу тахэплъагъ, чIыпIэм хэхъоныгъэ ышIынымкIэ апэрэ чэзыоу зэшIохыгъэн фэе пшъэрылъхэр дгъэнэфагъэх. ЗэшIомыхыгъэ Iофхэр тиIэхэ хъущтэп. Псэуа­лъэхэм япланированиекIэ ыкIи япроектированиекIэ лъэпкъ про­ектхэм, къэралыгъо программэхэм амалэу къатыхэрэр, грантхэр къызфэжъугъэфедэх. А пстэуми яшIуагъэкIэ Iофэу зэшIуахын алъэкIырэр нахьыбэ мэхъу. Къутырдэсхэм зэхъокIыныгъэхэм гу нахь алъатэнымкIэ, зигъо Iофыгъохэм анаIэ къатырадзэнымкIэ акIуачIэ нахь ра­хьылIэн фае», — къыIуагъ Къум­пIыл Мурат уплъэкIунхэм якIэуххэр къызэфихьысыжьзэ.

АР-м и ЛIышъхьэ ипресс-къулыкъу