Адыгеим и ЛIышъхьэу КъумпIыл Мурат къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм тегъэпсыхьа­гъэу Шэуджэн районым щашIыгъэ со­циаль­нэ псэолъэ зау­лэмэ ащыIагъ.

Республикэм и ЛIышъхьэ игъусагъэх федеральнэ инспектор шъхьаIэу Сергей Дрокиныр, АР-м мэкъу-мэщымкIэ иминистрэу Къуанэ Анзаур, АР-м культурэмкIэ иминистрэу Аулъэ Юрэ, АР-м гъэсэныгъэмрэ шIэныгъэмрэкIэ иминистрэ ипшъэ­рылъхэр зыгъэцэкIэрэ Евгений Лебедевыр, муниципальнэ образованиеу «Шэуджэн районым» ипащэу Аулъэ Рэщыд, къоджэ псэупIэхэм яIэшъхьэтетхэр.

Республикэм и ЛIышъхьэ къуаджэу Хьакурынэхьаблэ зы­щэIэм былымхэм къяутэлIэрэ узхэм апэуцужьыгъэнымкIэ станцием ишIын зынэсыгъэр зэригъэлъэгъугъ. Сомэ милли- он 14,4-м ехъу зыпэIухьэгъэ унэр илъэсэу икIыгъэм ыкIэхэм адэжь подряднэ органи­зациеу «Унэе предпринимателэу А. Хьакъунэр» зыфиIорэм ышIыгъагъ. КъумпIыл Мурат Iоф ашIэнымкIэ амалэу яIэхэр зэ­рэдэгъухэр къыхигъэщыгъ ыкIи ветеринар къулыкъум иIофшIэн нахьышIоу гъэпсыгъэным иамал ащ къызэритыщтым ицы­хьэ зэрэтелъыр къыIуагъ.

Ащ нэужым КъумпIыл Мурат къуаджэу Хьатыгъужъыкъуае щыIагъ, культурэм и Унэу нэ­бгырэ 210-м телъытагъэм игъэ­псын зэрэкIорэм нэIуасэ зыфишIыгъ. Ащ ипроектнэ уасэ сомэ миллион 75-рэ мэхъу. 2022-рэ илъэсым ащ ишIын рагъэжьагъ, мы илъэсым ыкIэм ар аухынэу щыт. Подрядчикыр компаниеу «Уют» зыфиIорэр ары. НепэкIэ унэм ыпкъ агъэ­псы­­гъах, унашъхьэр тыралъ­хьагъ, коммуникациехэмрэ унэ кIыбым­рэ япхыгъэ IофшIэнхэр макIох.

Къуаджэу Къэбыхьаблэ зыщэ­Iэм культурэм и Унэу зэтыра­гъэпсыхьажьырэм изытет ащ зэригъэлъэгъугъ. IофшIэнхэм со­мэ миллион 13-м ехъу апэIу­хьащт. Мыщ унашъхьэр зэрэ­псаоу щызэблахъугъ, ин­женер коммуникациехэри агъэ­кIэжьы­гъэх. КъыпэIулъ чIыпIэм игъэ­дэхэн ыуж ихьагъэх. Пшъэдэ­кIыжьэу ыхьырэмкIэ гъунэпкъэ гъэнэфагъэ зиIэ обществэу «Ар­тель» зыфиIорэм ЛIышъхьэр къызэригъэгугъа­гъэмкIэ, псэо­лъэшI-монтаж Iоф­тхьабзэхэр зэкIэ ипIалъэм аухы­щтых.

Адыгеим и ЛIышъхьэ районымрэ культурэм и Минис­тер­ствэрэ япащэхэм анаIэ зытыраригъэдзагъэр мы учреждениехэм япхыгъэ псэо­лъэшIын IофшIэнхэр дэгъоу зэ­шIохы­гъэн­хэр, ащ дакIоу псэуалъэхэм къапэIулъ чIыпIэ­хэри нахьышIоу зэтегъэпсы­хьэгъэнхэр ары.

«ЦIыфхэм зызщагъэпсэфыщт, гуIэтыпIэу щытыщт гупчэхэр псэу­пIэхэм къадэтэджэнхэм мэхьанэшхо иIэу щыт. Проектхэм ягъэцэкIэнкIэ пIалъэхэм ауж зыкъырагъанэ хъущтэп, культу­рэм иунэхэм тапэкIи яIофшIэн зэрэзэхэщэгъэщтым пэшIоры­гъэшъэу егупшысэнхэ фае. Джащ фэдэу кружокхэм, тхылъеджапIэхэм, секциехэм нахь шIуагъэ хэлъэу япшъэрылъхэр агъэцэ­кIэнхэм епхыгъэ Iофтхьабзэхэр зэшIуахынхэ фае. Анахьэу ты­наIэ зытедгъэтын фаехэм ащыщ культурэм иунакIэхэм респуб­ликэм иколлектив анахь дэгъу­хэм закъыщагъэлъагъозэ ашIыным епхыгъэ IофшIэныр тэрэзэу зэхэщэгъэныр», — къыIуагъ КъумпIыл Мурат.

Адыгеим и ЛIышъхьэ культу­рэм иучреждениехэр зыщагъэ­псыхэрэ чIыпIэхэр къызекIухьэхэ нэужым къуаджэу Пщычэурэ псэупIэу Заревэмрэ кIэлэцIыкIу IыгъыпIэхэу ащагъэпсыхэрэм язытет нэIуасэ зыфишIыгъ.

ПсэупIэхэм мы илъэсым ыкIэм ехъулIэу еджапIэм джыри мыкIохэрэр зычIэсыщтхэ учреж­дение зырыз къадэтэджэщт, нэбгыри 120-рэ кIэлэцIыкIу IыгъыпIэ пэпчъ чIэфэщт. IофшIэнхэр зэшIозыхыхэрэр компаниехэу «Марк-сервис» зыфиIорэмрэ «СМУ-38-мрэ». Пщычэу ща­шIырэ кIэлэцIыкIу IыгъыпIэм ыуасэ миллион 25,5-м ехъу, псэупIэу Заревэм — сомэ миллион 22-рэ фэдиз.

«Ащ фэдэ проектхэмкIэ рес­публикэм бэшIагъэ кIэлэцIыкIу IыгъыпIэхэр зыщашIыхэрэр. ЧIыпIэу зыщагъэпсырэм елъытыгъэу зэтекIукIыныгъэ мыинхэр яIэх, ау псэуалъэхэм зэрифэшъуашэм тетэу зыфытегъэ­псы­хьагъэхэр агъэцэкIэшъуным пае шэпхъэ лъагэхэр тыдэкIи укъуагъэ щымыхъунхэм бэ елъытыгъэр», — къыIуагъ КъумпIыл Мурат.

Республикэм и ЛIышъхьэ муниципальнэ къулыкъухэм пшъэрылъ къафишIыгъ псэуа­лъэхэр дэгъоу ыкIи игъом агъэ­псынхэм епхыгъэ Iофхэр зэ­рагъэцакIэхэрэр ауплъэкIузэ ашIынэу.

Сурэтхэр: А. Гусев.